ՓՆՏՐՈՒՄ ԵՎ ԳՏՆՈՒՄ ԵՆ

ՓՆՏՐՈՒՄ ԵՎ ԳՏՆՈՒՄ ԵՆ

Ոստիկանության Լոռու մարզային վարչության եւ Սպիտակի բաժնի ծառայողները Լուսաղբյուր գյուղից բերման էին ենթարկել 1978 թ. ծնված Սամվելին: Այս անձը ապրիլի 29-ից ՌԴ Դոնի Ռոստով քաղաքի իրավապահների կողմից հետախուզվում էր ծանր մարմնական վնասվածք պատճառելու մեղադրանքով:
Բագրատաշենի աչալուրջ իրավապահները մաքսատան հարակից տարածքում հայտնաբերել էին 1978 թ. ծնված Տիգրանին, որը 2010 թ. հունիսի 7-ից ՌԴ Ստավրոպոլի երկրամասի իրավապահների կողմից հետախուզվում էր` փաստաթղթեր կեղծելու մեղադրանքով:
Իսկ 35-ամյա ՙմատնիչ՚ Եղիսաբեթին հաջողվել էր խուսափել օրենքից ու հավանական պատժից ընդամենը մեկ շաբաթ: Նրան բռնել էին Ոստիկանության Բաղրամյանի բաժնի ծառայողները Արմավիր քաղաքի Հանրապետության փողոցում գտնվող սրճարանում: Նա մայիսի 26-ից հետախուզվում էր ՀՀ քրեական օրենսգրքի 333 հոդվածի 1-ին մասի մեղադրանքով (Սուտ մատնություն):


ՕՐԸ ՄԵՋ ԻՆՔՆԱՍՊԱՆՈՒԹՅԱՆ ՓՈՐՁ

Երեկ Տավուշի մարզի Բերդավան գյուղում երակները կտրելու միջոցով ինքնասպանության փորձ կատարած անձը 33-ամյա Նազելի Աթոյանն էր, ով գրեթե ամեն օր նման ձեւով փորձում է իր վրա ուշադրություն գրավել: Այս մասին մեզ հետ զրույցում ասաց Բերդավանի գյուղապետ Արարատ Գաբրիելյանը:
- Հավատացեք, դա մեզ` գյուղացիներիս համար սովորական բան է դարձել: Նա եթե ոչ ամեն օր, ապա հաստատ օրը մեջ նման մի օյին խաղում է գլխներիս: Բայց երբեք իրեն չի վնասի, դա հաստատ: Նազելին արդեն հոգնեցրել է բոլորին, բառիս բուն իմաստով ձեռ  առնում ամենքին ու դրանից հրճվում: