ՄԻՋՆԱԴԱՐՅԱՆ ԲԱՐՔԵՐ ԲՆԱՊԱՀՊԱՆՈՒԹՅԱՆ ՆԱԽԱՐԱՐՈՒԹՅՈՒՆՈՒՄ

ՄԻՋՆԱԴԱՐՅԱՆ ԲԱՐՔԵՐ
ԲՆԱՊԱՀՊԱՆՈՒԹՅԱՆ ՆԱԽԱՐԱՐՈՒԹՅՈՒՆՈՒՄ

Բնապահպանության նախարարությունում նորանշանակ նախարար  ԱՐԱՄԱՅԻՍ ԳՐԻԳՈՐՅԱՆԻ հայտնվելուց հետո այդտեղ սկսել է մոլեգնել տեռորը: ՙՄեջք՚ չունեցող, սակայն երկար տարիներ նախարարությունում բարեխղճորեն աշխատող աշխատակիցները ենթարկվում են վիրավորանքների, նսեմացումների ու անգամ ծեծի:
Նոր ՙօկուպացիոն՚ կարգերը հաստատելու գործը գլխավորում է նախարարը, իսկ ՙդաստիարակչական՚ մասը իրականացնում է իր վարորդը: Ինչպես խոսում են նախարարության աշխատակիցները, նորանշանակ նախարարը իր Ավշար գյուղի օղու բարքերը տեղափոխել է նախարարություն, եւ իրենց հարգող շատ մասնագետներ դուրս են գալիս աշխատանքից: Նախարարությունում կա կարծիք, որ այս ՙգեղական՚ մեթոդներով պարզապես լուծվում է նախարարի մտերիմների համար աշխատատեղեր ապահովելու պարզունակ խնդիրը:
Նույն վիճակն է նաեւ մարզային ստորաբաժիններում, որտեղ զանգվածային կրճատումների տակ ընկան հատկապես նրանք, ովքեր տարիներ շարունակ նվիրված աշխատում էին իրենց բարդ տեղամասերում:
Ուրբաթ օրը Բնապահպանության նախարարությունում տեղի է ունեցել հերթական սկանդալը: Այս անգամ նորանշանակ նախարար Արամայիս Գրիգորյանը խորհրդակցություն անցկացնելու ժամանակ իրեն պահում էր խիստ լկտի եւ կոպիտ: Նախարարության աշխատակիցներին դիմում էր բացարձակապես ՙդու՚-ով` ի խախտումն  ՀՀ նախագահի հանձնարարականի` քաղաքացիների հետ ՙԴուք՚-ով խոսելու վերաբերյալ: Սակայն դրանով նորաթուխ նախարարը չսահմանափակվեց եւ անցավ ավելի վիրավորական բառերի, ավելին` իրեն վերապահեց դպրոցի դասատուի դերը եւ  աշխատակցին դուրս հանեց խորհրդակցությունից. ՙԴո°ւրս արի ստեղից՚: Դուրս եկողին միջանցքում սպասում էր հանդիպում նախարարի թիկնեղ վարորդի հետ, որը հարձակվում է բռունցքներով ու հայհոյանքներով  եւ սկսում է հարվածել նախարարին դուր չեկած աշխատակցին:
Այս խայտառակ դեպքից հետո թվում էր, որ նախարարը կսանձի իր չափից ավելի եռանդուն վարորդին եւ կփորձի լուծում տալ տգեղ իրավիճակին: Սակայն ժամեր անց Բնապահպանության նախարարության լրատվական ծառայությունը տարածել էր մի լրատվություն, որտեղ, ըստ էության, փորձում էր արդարացնել տեղի ունեցածը` բամբասկոտ կնկա նման երկար-բարակ քննարկելով ինչ-որ աշխատանքային խնդիրներ: Թե իբր, մի ՊՈԱԿ-ի աշխատանքը դուր չի եկել նախարարին, իսկ ղեկավարի տեղակալի պատասխանները չեն բավարարել նախարարին: Ապա  նախարարության լրատվական ծառայությունը պատմություններ է հորինում` ներկայացնելու համար, թե որքան վատն է այդ ՊՈԱԿ-ի փոխտնօրենը: Մի կողմ թողնենք, որ այդ ՊՈԱԿ-ի աշխատանքի համար պատասխանատու է տնօրենը, այլ ոչ թե փոխտնօրենը, եւ մի կողմ թողնենք նաեւ այն, որ այդ նույն փոխտնօրենը այդ պաշտոնում 12 տարվա ԱՆԲԱՍԻՐ աշխատանքային փորձ ունի, եւ մինչեւ Արամայիս Գրիգորյանի հայտնվելը, նախարարությունում բարեհաջող աշխատել է նախորդ երկու նախարարների հետ: Սակայն  պարզվում է, որ ըստ նախարարության լրատվական ծառայության, աշխատանքային թերությունների համար մարդուն կարելի է, այնպես հարվածել, որ ստանա ուղեղի ցնցում եւ պատռվի ականջի թմբկաթաղանթը:
Նախարարությունը բամբասկոտ կնկա նման մարդկանց սեւացնելու հետ մեկտեղ` ունի նաեւ գողական ապերոյի մտածելակերպ: Այսպես, ըստ նախարարության խոստովանության, նորանշանակ նախարար Արամայիս Գրիգորյանը իր սենյակից դուրս է վռնդում այն աշխատակիցներին, ում պատասխանները իրեն չեն գոհացնում: Բացի այդ, նախարարի աշխատասենյակից դուրս հանված եւ այդ հանգամանքից դժգոհություն հայտնող աշխատակիցները, ըստ նախարարության` օրինաչափորեն պետք է ենթարկվեն վիրավորանքների ու ծեծի: Մի խոսքով, նախարարությունը խոստովանեց, որ իրենց մոտ տիրում են ստրկատիրական կարգեր, եւ ըստ նախարարի` վատ աշխատողներին ենթարկում են կեղեքումների:
Բայց սա դեռ մի կողմ, նախարարությունը ցույց տվեց, որ գտնվում է անսահման հեռավորության վրա պրոֆեսիոնալիզմի, բարեկրթության ու պարկեշտության հասկացություններից: Նախարարության գողական-բամբասկոտ ապատեղեկատվության մեջ նշվում  է, որ ՙԻրավունքը՚ իբր  ստահոդ նյութ է տարածել իրենց մասին, եւ որ իբր ծեծի ենթարկված աշխատակիցը հանդիսանում է ՙԻրավունք՚ թերթի խմբագիրներից մեկը: Այս անգրագետ նյութը տարածող նախարարության աշխատակիցներին պետք է տեղեկացնենք, որ ՙԻրավունք՚ թերթն ունի ընդամենը մեկ գլխավոր խմբագիր` Հովհաննես Գալաջյան, եւ այլ խմբագիրներ, այդ թվում` Բնապահպանության նախարարության աշխատակիցներ, ՙԻրավունքը՚ չունի: Կոչ ենք անում պետբյուջեից եւ ժողովրդից հավաքած հարկերով ֆինանսավորվող նախարարությանը եւ հատկապես համապատասխան աշխատակիցներին մի փոքր ավելի պատասխանատու վերաբերվեն իրենց աշխատանքին եւ ծառայեն ոչ թե նախարարի անձին, այլ` օրենքին, հասարակությանը ու ճշմարտությանը, իհարկե, եթե դա թույլ տա իրենց բամբասկոտ գողականա-ապերոյական հոգեբանությունը: Հարց է նաեւ` արդյո±ք նախարարությունը վերածելով ստրկատիրական համակարգի եւ այդտեղ ներմուծելով  միջնադարյան բարքեր, հնարավոր է որեւէ դրական տեղաշարժ ակնկալել` ՀՀ-ում կուտակված անթիվ-անհամար բնապահպանական խնդիրները լուծելու համար:

ԱՐՄԵՆՈՒՀԻ ՀԱԿՈԲՅԱՆ