Այն ժամանակվանից ի վեր, ինչ ՎԱՀԱՆ ՀՈՎՀԱՆՆԻՍՅԱՆԸ...

Այն ժամանակվանից ի վեր, ինչ ՎԱՀԱՆ ՀՈՎՀԱՆՆԻՍՅԱՆԸ նշանակվեց Գերմանիայում ՀՀ դեսպան, նրա մասին առանձնապես տեղեկատվություն չկար: Սակայն նա բավականին զարմացրել էր Գերմանիայի հայ համայնքին մայիսի 28-ի ընդունելության ժամանակ, երբ նաեւ գրքի շնորհանդես էր անցկացվում: Բնական կլիներ, որ ելույթները լինեին հայերեն եւ գերմաներեն, սակայն զարմանալիորեն Վահան Հովհաննիսյանը որոշել էր հանդես գալ... անգլերեն: Թե ինչ անելիք ունի այդ լեզուն տվյալ միջոցառմանը` մնում է զարմանալ ու զարմանալ, քանզի սովորական հարգանքը ՀՀ պետական լեզվի հանդեպ ենթադրում էր, որ դեսպանը պետք է ելույթ ունենա հայերեն, եւ միգուցե ի նշան հարգանքի Գերմանիայի նկատմամբ մեկ-երկու նախադասություն նաեւ գերմաներեն ասեր: Բայց երեւի թե զարմանալիորեն, այսպես կոչված, գլոբալացման հովերը ընկեր Վահանին էլ էին տարել, եւ նա վարվեց ճիշտ ու ճիշտ այնպես, ինչպես վարվում է որեւէ չտես երիտասարդ...
Մեզ զարմացրեց եւ Վահան Հովհաննիսյանի կուսակից ԱՐԾՎԻԿ ՄԻՆԱՍՅԱՆԸ` հայտարարելով. ՙԻշխանությունը չի պատկերացնում ինչ բան է վերահսկողություն, ինչ բան է հակակոռուպցիոն քաղաքականություն: Եթե ընդդիմությունը այս երկրի պատասխանատուն եւ կառույցն է, պետք է կարողանա արդյունավետորեն մասնակցել պետության կառավարմանը՚: Զարմանալի է, ինչպես կարող է ժամանակին իշխանության մեջ եղած կուսակցության ներկայացուցիչը հավատալ, որ իշխանությունը պատկերացում չունի վերահսկողության եւ հակակոռուպցիոն քաղաքականության վերաբերյալ: Ինչ վերաբերում է ընդդիմությանը լծակներ տալու միջոցով միանգամից վերահսկողությունը եւ կոռուպցիայի դեմ պայքարը արդյունավետ դարձնելուն, ապա միգուցե անձամբ Արծվիկ Մինասյանը այդպիսի լծակները չչարաշահի ստանալու դեպքում, բայց հո նրանով չի սկսվում ու ավարտվում ընդդիմությունը: Մի±թե պարոն Մինասյանը մոռացել է, թե օրինակ, ՀԱԿ-ի ներկայացուցիչները ինչպիսի ագահությամբ լափում էին երկիրը, երբ ՀՀՇ-ն իշխանության գլուխ էր: Հիմա պատկերացնո±ւմ եք, եթե հանկարծ սրանց ձեռքը լծակ ընկնի, ապա ինչեր կանեն...  
Իսկ վերականգնված ՀՀՇ-ի առաջնորդ ԱՐԱՐԱՏ ԶՈՒՐԱԲՅԱՆԸ հայտարարեց. ՙԿարծում եմ, իրականում Հայաստանի քաղաքական համակարգը երբեւէ չի եղել այսքան լղոզված, այսքան անգաղափար ու այսքան անսկզբունք, որքան կա այսօր՚: Պարոն Զուրաբյանը ճիշտ է ասում, օրինակ, որեւէ մեկը տեսե±լ է, թե ինչ գաղափարախոսություն ունի, ասենք, ԲՀԿ-ն, նույնիսկ ամենահմուտ քաղաքագետը գլուխ կհանի± ՙԺառանգության՚ ներկայացուցիչների գաղափարական կողմնորոշումից, երբ նրանք վեց հոգով 16 կարծիք են ունենում: Կամ որեւէ մեկը գլուխ կհանի±, թե ինչքանով է գաղափարական ՀՅԴ-ի վարքագիծը, երբ պաշտոնապես ընկերվարություն դավանող դաշնակները հանկարծ ատամներով պաշտպանում էին միանգամայն լիբերալ օրինագծերն ու առաջարկությունները: Բայց ամենազարմանալի իրողությունն այն է, որ անգաղափարության ու անսկզբունքայնության կնքահայրը հենց ՀՀՇ-ն էր, եւ ՀՀՇ-ի երբեմնի առաջնորդ ԼՏՊ-ին է պատկանում ՙազգային գաղափարախոսությունը կեղծ կատեգորիա է՚ զազրելի բանաձեւը: Եվ հիմա էլ ՀՀՇ-ի ժառանգորդ ՀԱԿԿ-ն չունի ոչ մի գաղափարախոսություն, միայն մի գլուխ ասում են` իշխանությունը տվեք մեզ, մենք ավելի լավն ենք: Ինչեւէ, զարմանալով հանդերձ, այնուամենայնիվ, գնահատենք Արարատ Զուրաբյանի սկզբունքայնությունը` որ տեր կանգնեց ՀՀՇ անվանը, հաշվի չառնելով, որ շատերի համար այդ անունը հայհոյանքի պես է հնչում:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ