ՙՍԻՐԻԱՀԱՅԵՐՆ ԱՆԽՏԻՐ ԻՐԵՆՑ ՁԱՅՆԸ ՏՎԵԼ ԵՆ ԱՍԱԴԻՆ՚

ՙՍԻՐԻԱՀԱՅԵՐՆ ԱՆԽՏԻՐ ԻՐԵՆՑ ՁԱՅՆԸ ՏՎԵԼ ԵՆ ԱՍԱԴԻՆ՚

Երեկ Սիրայում նախագահական ընտրություններ էին: Նախագահի պաշտոնի համար պայքարում են գործող նախագահ Բաշար Ասադը, Սիրիայի խորհրդարանի պատգամավոր Մահեր Աբդուլ Հաֆիզ Հաջարը, կառավարության նախկին անդամ Ասադ Հասան Աբդալլա Նուրին:
Գործող նախագահ Ասադը նախագահի պաշտոնում վերընտրվել է 2007թ.-ի հուլիսի 17-ին. այն ժամանակ նրա օգտին էր քվեարկել ընտրություններին մասնակցած քաղաքացիների 97,62%-ը: Իսկ, առհասարակ, նա Սիրիան ղեկավարում է 2000թ.-ից, երբ մահացավ 30 տարի իշխանության ղեկին գտնվող նրա հայրը` Հաֆեզ Ասադը:
Թե ինչպիսի մթնոլորտ է տիրում Սիրիայում նախագահական ընտրության օրը, եւ թեկնածուներից ով է ավելի շատ հավակնում նախագահի պաշտոնը ստանձնելուն, փորձեցինք պարզել Հալեպի հայ ավետարանական համայնքի համայնքապետ Վերապատվելի ՀԱՐՈՒԹՅՈՒՆ ՍԵԼԻՄՅԱՆԻՑ.
-Ես ողջ օրը շրջել եմ տարբեր ընտրատարածքներում, զրուցել եմ թե° տեղացիների եւ թե° սիրիահայերի հետ: Եվ, հավատացեք, սիրիացիների մեծ մասը կրկին նախընտրում են Բաշար Ասադին տեսնել որպես նախագահ: Ժողովուրդը նշում էր, որ բոլոր թեկնածուներին էլ ճանաչում եւ հարգում է, բայց իրենց ձայնը տվել են Բաշար Ասադին: Հեւտեւաբար, իմ ստացած տպավորություններից ելնելով, ինչպես նաեւ հաշվի առնելով ժողովրդի անչափ վստահությունը Ասադի հանդեպ, ինձ թույլ է տալիս ենթադրել, որ Սիրիայի հաջորդ նախագահը նա է լինելու:
Ընտրություններին սիրիահայերը հիմնականում մասնակցել են, եւ իրենց ձայնը անխտիր տվել են Ասադին, քանի որ նրան վստահում եւ հավատում են:
- Այս օրերին կան խոսակցություններ, որ ընտրությունների ժամանակ Սիրիայում վերստին թեժացել են մարտական գործողությունները:
- Ընդհանրապես իրականությանը չեն համապատասխանում խոսակցություններն այն մասին, որ վերջին օրերին գրոհայինների հարձակումները աննախադեպ շատացել են: Ես, նույնիսկ, ընդհակառակը կարող եմ ասել, որ վերջին երկու օրերին Սիրիո ընդդիմադիր գրոհայինների հարձակումները նվազել են, ինչն էլ թույլ է տալիս մտածել, որ շատ հնարավոր է գրոհայինները քիչ-քիչ նահանջում են:
Մեր զրուցակիցը նաեւ անդրադարձավ Նուրսուլթան Նազարբաեւի հայտնի հայտարարությանըª նշելով.
- Իհարկե, շատերն են երազում, որ Հայաստանը հեռանա Ղարաբաղից: Բայց ես, որ բոլոր սիրիահայերի անունից եմ խոսում, համոզված եմ, որ ՀՀ նախագահը շատ իմաստուն եւ խորիմաստ գործիչ է եւ երբեւէ ոչ ոքի եւ ոչ մի ժամանակ թույլ չի տա Ղարաբաղը անջատեն Հայաստանից, քանի որ Ղարաբաղը Հայաստանի անբաժանելի մասն է:

ԻԼՈՆԱ ԱԶԱՐՅԱՆ