ԿԱՐԻՆԵ ՄԻՆԱՍՅԱՆՆ ԱԶԱՏՎԵԼ Է ՀՀ ԷԿՈՆՈՄԻԿԱՅԻ ՆԱԽԱՐԱՐԻ ԱՌԱՋԻՆ ՏԵՂԱԿԱԼԻ ՊԱՇՏՈՆԻՑ

ԿԱՐԻՆԵ ՄԻՆԱՍՅԱՆՆ ԱԶԱՏՎԵԼ Է ՀՀ ԷԿՈՆՈՄԻԿԱՅԻ ՆԱԽԱՐԱՐԻ ԱՌԱՋԻՆ ՏԵՂԱԿԱԼԻ ՊԱՇՏՈՆԻՑ

Այսօր Հայաստանի Հանրապետության վարչապետ Հովիկ Աբրահամյանի որոշմամբ ԿԱՐԻՆԵ ՄԻՆԱՍՅԱՆՆ ազատվել է Հայաստանի Հանրապետության էկոնոմիկայի նախարարի առաջին տեղակալի պաշտոնից՝ իր դիմումի համաձայն: Նշենք, որ ՀՀ-ի Մաքսային միության անդամակցության գործում Կ. Մինասյանը համակարգում էր հայաստանյան բանակցային խմբի աշխատանքները: «Իրավունքի» հետ իր հարցազրույցներից մեկի ժամանակ, տիկին Մինասյանը` խոսելով կարիերայի մասին նշել էր. «Չէի երազում այսպիսի կարիերայի մասին, բայց ես Մոսկվայի Ս. Օրջոնիկիձեի անվան կառավարման ինստիտուտում սովորելով` միշտ համոզված էի, թե կառավարումն այն ոլորտն է, որն ինձ համար հետաքրքիր է, քանի որ ենթադրում է որոշումների փնտրտուք, նաեւ պատասխանատվություն: Ընդհանրապես, կառավարումն ու պատասխանատվությունն ինձ համար միշտ եղել են հիմնական ուղենիշեր: Իսկ ինչ վերաբերում է նպատակներին, որոնք ես ունեի ուսանողական տարիներին, իհարկե, ենթադրում էի, որ պետք է աշխատեմ եւ պատկերացնում էի, որ աշխատանքս կարեւոր դեր պետք է խաղա իմ կյանքում: Այդ թվում մտածում էի նաեւ  կարիերա ստեղծելու մասին, որն, ըստ իս, ցանկացած անձի ինքնահաստատման համար կարեւոր  հարց է, որովհետեւ բացի այն, որ պետք է լինես քո հասարակության անդամ, ընտանիքի անդամ, պետք է նաեւ ինչ-որ բան ստեղծես քո կյանքում եւ կարողանաս ստեղծածովդ հպարտանալ: Այդ ժամանակ է կյանքդն իմաստավորվում»:

ՀՐԱՆՏ ՍԱՐԱՖՅԱՆ