ՎԵՐՋԻՑ ԱՌԱՋԻՆԸ, ԲԱՅՑ ԵՐՐՈՐԴ-ՉՈՐՐՈՐԴԱԿԱՆ ԿԱԶՄՈՎ

ՎԵՐՋԻՑ ԱՌԱՋԻՆԸ,
ԲԱՅՑ ԵՐՐՈՐԴ-ՉՈՐՐՈՐԴԱԿԱՆ ԿԱԶՄՈՎ

Թեհրանում կայացած հունահռոմեական ըմբշամարտի աշխարհի գավաթի խաղարկությունում, որին մասնակցում էին տասը հավաքականներ, Հայաստանի հավաքականը երկրորդ կազմով գրավեց վերջին տեղը: Հայաստանի ընտրանին Թեհրան էր մեկնել հետեւյալ կազմով. Նարեկ Խաչատրյան (59 կգ), Գեւորգ Սահակյան (66 կգ), Ռաֆայել Ալեքսանյան (71 կգ), Կարապետ Չալյան (75 կգ), Ռաֆիկ Մանուկյան (80 կգ), Հրաչյա Հովհաննիսյան (85 կգ), Մովսես Ադամյան (98 կգ) եւ Վաչիկ Եղիազարյան (130 կգ): 9-րդ տեղի համար պայքարում Հայաստանի եւ ԱՄՆ-ի հավաքականների մրցակցությունն ավարտվեց 4:4 հաշվով: Անհատական միավորների հաշվարկով ամերիկացիները հաղթեցին 21:15 հաշվով:

Մրցաշարի արդյուքնների մասին ՙԻրավունքը՚ խոսեց Հայաստանի հունահռոմեական ըմբշամարտի երիտասարդական հավաքականի գլխավոր մարզիչ Արմեն Բաբալարյանի հետ, ով ՄՈՎՍԵՍ ԿԱՐԱՊԵՏՅԱՆԻ հետ գլխավորել էր թիմն այս մրցաշարում:
-Հայաստանի հավաքականը մրցաշարում գրավեց վերջին տեղը: Թեկուզեւ թիմը ոչ ուժեղագույն կազմով էր, բայց արդյոք տղաները հանդես եկա՞ն իրենց ողջ հնարավորություններով:
- Մեր թիմը, կարելի է ասել, ոչ թե 2-րդ կազմով էր, այլ՝ 3-4-րդ: Ես թիմը գլխավորել եմ այս մրցաշարում, նրանց այնտեղ դիմավորել եմ, բայց չգիտեմ, թե ինչպես էին նրանք նախապատրաստվել մրցաշարին: Իհարկե, կարող էին եւ ավելի լավ հանդես գալ: Շատ հարցեր կային. մեկի մոտ հոգնածություն, մյուսի մոտª քաշի խնդիր: Չմոռանանք նաեւ, որ գրավել ենք վերջին տեղը, բայց մրցել ենք շատ ուժեղ մրցակիցների հետ: Հաղթեցին Կորեայի հավաքականին, ԱՄՆ-ի ընտրանու հետ պայքարը 4:4 ավարտեցինք: Մինչդեռ այդ մյուս հավաքականները մրցաշարին մասնակցում էին իրենց լավագույն կազմերով:
- Առանձնացող մարզիկներ եղա՞ն: Թիմում էին նաեւ Վաչիկ Եղիազարյանն ու Կարապետ Չալյանը, ինչպե՞ս տղաները դրսեւորեցին իրենց:
- Եթե Կարապետը երիտասարդների մեջ չեմպիոն է դարձել, դա դեռ չի նշանակում, որ այստեղ էլ պիտի դառնար. անցումային տարիքի է` իր բարդություններով: Կարող եմ ասել, որ շատ լավ հանդես եկավ Ռաֆայել Ալեքսանյանը. չորս շատ լավ գոտեմարտ անցկացրեց, մինչդեռ նրա քաշային կարգում գերհզոր չեմպիոն-մարզիկներ էին:
Ավելացնենք, որ  Հայաստանի ըմբշամարտի հավաքականի առաջին համարները Իտալիայի Սասարի քաղաքում նույն ժամանակահատվածում մասնակցեցին հունահռոմեկան ոճի ըմբշամարտի ՙMilone Trophy՚ 33-րդ մրցաշարին եւ նվաճեցին 4 ոսկե եւ 2 արծաթե մեդալներ: 

ՔՐԻՍՏԻՆԵ ՊԵՏՐՈՍՅԱՆ