ՀՀ ՔԱՂԱՔԱՑԻՆԵՐԻ ՀԱՄԱՐ ՌԴ ՄԻԳՐԱՑԻՈՆ ՕՐԵՆՔՆԵՐԸ ԿԹԵԹԵՎԱՑՎԵՆ

ՀՀ ՔԱՂԱՔԱՑԻՆԵՐԻ ՀԱՄԱՐ
ՌԴ ՄԻԳՐԱՑԻՈՆ ՕՐԵՆՔՆԵՐԸ ԿԹԵԹԵՎԱՑՎԵՆ

Միգրացիոն ծառայության պետ Գագիկ Եգանյանը մայիսի 29-ից գտնվում էր Մոսկվայում` քննարկելու ՀՀ քաղաքացիների Ռուսաստան այցելելու, այնտեղ մնալու եւ գործունեություն ծավալելու հետ կապված հայտնի միջկառավարական համաձայնագրերը: Հիշեցնենք, որ Միգրացիոն հարցերով հայ-ռուսական համատեղ խումբն աշխատանքային մակարդակով համաձայնեցրել է երկու համաձայնագրերի տեքստերը, որով Հայաստանի Հանրապետությունից Ռուսաստան մեկնող քաղաքացիները հաշվառվելու են ոչ թե 7, այլ 30 օրվա ընթացքում: Բացի դրանից, հայ միգրանտներն աշխատելու են առանց աշխատանքային թույլտվության:
Թե մասնավորապես ինչ հարցերի շուրջ են ընթացել քննարկումները, եւ երբ այդ համաձայնագրերը ուժի մեջ կմտնեն, փորձեցինք պարզել Միգրացիոն ծառայության պետ ԳԱԳԻԿ ԵԳԱՆՅԱՆԻՑ.
-Նախ նշեմ, որ ռուսաստանյան եւ մեր ծառայության միջեւ համաձայնագրերի տեքստերը համաձայնեցված են: Բայց որպեսզի այն դառնա գործող համաձայնագիր, անհրաժեշտ է, որպեսզի այն ներպետական գործընթացով անցնի, եւ դրա համար մենք պայմանավորվեցինք, որ արագ կարգով իրենքª ՌԴ-ի, մենքª ՀՀ պատկան մարմինների հետ համաձայնեցնենք, որ արդեն պատրաստ լինի ստորագրության: Կարծում եմ, որ առաջիկա ամիսներին արդեն համաձայնագրերը կստորագրվեն, եւ ուժի մեջ կմտնեն որոշումները:
- Քննարկումների ընթացքում, մասնավորապես, ո±ր հարցերն են շեշտադրվել:
- Կարեւոր հարցերից է, որ ՌԴ մուտք գործելուց հետո մեր քաղաքացիները կարող են հաշվառվել ոչ թե 7, այլ 30 օրվա ընթացքում: Հաջորդը. մեր միգրանտները կկարողանան աշխատանքային գործունեություն ծավալել` առանց աշխատանքային թույլտվության: Նաեւª աշխատանքային պայմանագիր կնքած միգրանտի ու վերջինիս ընտանիքի կեցությունը տվյալ քաղաքում օրինական կհամարվի:
- Վերջին շրջանում ՌԴ արտագնա աշխատանքների մեկնող քաղաքացիները դժգոհում էին, որ կես ճանապարհից նրանց հետ են ուղարկում կամ ընդհանրապես նրանց մուտքն արգելվում է: Այդ խնդիրը կարգավորվե±լ է:
- Այո, ճիշտ եք, տարբեր պատճառներով մեր քաղաքացիներին արգելում են ՌԴ մուտք գործել, դա միայն հայերի դեմ չէ ուղղված, այլ բոլոր այն անձանց, ովքեր ՌԴ-ում գտնված ժամանակ տարբեր վարչական խախտումներ են թույլ տվել: Դա ՌԴ-ի ներքին հարցն է, իրենք իրենց օրենսդրությունը` ներքին պահանջներից ելնելով են մշակել, եւ հիմա, այո, կան բազմաթիվ անձինք, որոնք հայտնվել են անցանկալի ցուցակում, որոնց մուտքն արգելված է որոշակի ժամկետներով: Ամեն դեպքում, այդ մարդկանց պետք է խորհուրդ տրվի, որպեսզի իրենք դիմեն ՌԴ-ի Դաշնային ծառայություն` խնդիրը կարգավորելու համար:
Միգրացիոն ծառայության պետը տեղեկացրեց նաեւ, ըստ ուղեւորահոսքերի վերաբերյալ տվյալների` համեմատած նախորդ տարիներին, այս տարի ՌԴ մեկնող ուղեւորների թիվը նվազել է:

ԻԼՈՆԱ ԱԶԱՐՅԱՆ