«ՄԻՆՉԵՎ ՀՈՒՆԻՍԻ ԿԵՍԸ ՊԱՏՐԱՍՏ ԿԼԻՆԵՆՔ ՄԻԱՆԱԼ ԵՎՐԱՍԻԱԿԱՆ ՏՆՏԵՍԱԿԱՆ ՏԱՐԱԾՔԻՆ»

«ՄԻՆՉԵՎ ՀՈՒՆԻՍԻ ԿԵՍԸ ՊԱՏՐԱՍՏ ԿԼԻՆԵՆՔ
ՄԻԱՆԱԼ ԵՎՐԱՍԻԱԿԱՆ ՏՆՏԵՍԱԿԱՆ ՏԱՐԱԾՔԻՆ»

Հունիսի 9-ին ՀՀ Ազգային ժողովի նախագահ Գալուստ Սահակյանի առաջարկությամբ` ԱԺ հերթական նիստի օրակարգում կլինի «Հայաստանի Հանրապետության 2013 թ. պետական բյուջեի կատարման մասին» տարեկան հաշվետվության նախագիծը ընդգրկելու եւ քննարկումները շարունակելու մասին հարցը: Իսկ մինչ այդ, արդեն իսկ ԱԺ մշտական հանձնաժողովներում ավարտված «ՀՀ 2013թ. պետական բյուջեի կատարման մասին» տարեկան հաշվետվության քննարկումների, ինչպես նաեւ ՀՀ-ի` ՄՄ անդամակցության եւ քառյակի նախաձեռնած հանրահավաքի մասին «Իրավունքը» զրուցեց ԱԺ ֆինանսաբյուջետային հարցերի մշտական հանձնաժողովի նախագահ, ԱԺ ՀՀԿ խմբակցության պատգամավոր ԳԱԳԻԿ ՄԻՆԱՍՅԱՆԻ հետ:

«ՆԱԽՈՐԴ ՏԱՐՎԱ ԲՅՈՒՋԵԻ
ԿԱՏԱՐՈՂԱԿԱՆԻ ՀԵՏ ԿԱՊՎԱԾ` ՈՒՆԵՆՔ ՉԿԱՏԱՐՎԱԾ ԵՎ
ԳԵՐԱԿԱՏԱՐՎԱԾ ՑՈՒՑԱՆԻՇՆԵՐ»

-Պարոն Մինասյան, ամփոփելով արդեն երկու շաբաթ ընթացող բյուջեի կատարողականի վերաբերյալ ԱԺ բոլոր մշտական հանձնաժողովների ու ֆինանսավարկային եւ բյուջետային հարցերի մշտական հանձնաժողովի համատեղ նիստերը, ի՞նչ կասեք արդյունքների մասին:
- Ընդհանրապես բյուջեի քննարկումները Ազգային ժողովում կարելի է երկու մասի բաժանել: Առաջին մասը մշտական հանձնաժողովների համատեղ նիստում բյուջեի քննարկումն է, որն արդեն ավարտվել է: Եվ կա նաեւ երկրորդ մասը` լիագումար նիստում բյուջեի քննարկումները: Ուղղակի, այս քննարկումները թույլ են տալիս, որ լիագումար նիստի քննարկումներն ավելի փաստարկված լինեն: Արդեն իսկ ավարտված քննարկումների մասին պետք է ասեմ, որ բավականին արդյունավետ էին: Իհարկե, եղան հարցեր եւ պատասխաններ, ու կարծում եմ` սա թույլ տվեց ավելի մանրամասն խորամուխ լինել բյուջեի առանձնահատկությունների մեջ: Որեւէ արտառոց հարց, որը բարդ պատասխան էր ենթադրում, չեղան: Եվ, կարծես թե, ամեն ինչ այնպես էր, ինչպես գործնականում յուրաքանչյուր տարի է եղել: Գտնում եմ, որ այս քննարկումները թույլ կտան, որպեսզի բյուջեի կատարողականի քննարկումները ԱԺ դահլիճում շատ ավելի առարկայական, հիմնավոր ու փաստարկված ընթանան: Ինքս քննարկումների այս առաջին փուլից, իսկապես գոհ եմ:
- Հանձնաժողովների նիստերի ժամանակ նկատվեց, որ, կարծես թե, թվերի հետ կապված` քաղաքական ուժերը լուրջ առարկություններ չունեն: Իսկ բողոքներ ու հակասություններ լինում էին նիստի բովանդակության հետ կապ չունեցող հարցերում: Կարո՞ղ ենք համարել, որ, ըստ էության, մյուս քաղաքական ուժերն էլ էին գոհ արդյունքից:
- Գիտեք, կդժվարանամ ասել` արդյունքներից գոհ էին, թե` ոչ, եւ այս ձեւակերպման տակ դուք ինչ եք տեսնում: Մենք ունենք նախորդ տարվա բյուջեի կատարողականի հետ կապված իսկապես չկատարված ցուցանիշներ եւ ունենք ցուցանիշներ, որոնք գերակատարվել են: Այս տեսակետից մեկ գնահատական տալ, կարծում եմ` որեւէ մեկին չի հաջողվի: Բայց, օրինակ, մենք ունենք կարեւորագույն մի ցուցանիշ, որը գերակատարվել է, դա հարկեր-ՀՆԱ հարաբերակցությունն է, որը բնութագրում է ստվերի կրճատումը: Այդ առումով մենք աննախադեպ բարձր ցուցանիշի ենք հասել, եւ դա իսկապես շատ կարեւոր է տնտեսության համար, հասարակական հարաբերությունների համար, ստվերի կրճատման համար: Միաժամանակ, մենք ունենք տնտեսական աճի ցուցանիշ, որտեղ զգալի թերակատարում ենք ունեցել: Այս բոլոր ցուցանիշների քննարկումներին, իհարկե, եղել են մեր այս համատեղ նիստերի առանցքային խնդիրները, որովհետեւ դրանցից յուրաքանչյուրն էլ ունեն իրենց հիմնավորումները, պարզաբանումները:

«ՊԵՏՔ Է ԱՌԱՋ ՆԱՅԵԼ ԵՎ ՉԶԲԱՂՎԵԼ ՆԱԽՈՐԴԻ
ՔՆՆԱԴԱՏՈՒԹՅԱՄԲ»

-Այսօր նոր կառավարությունը նախորդ կառավարության բացթողումնե՞րն է լրացնում...
- Յուրաքանչյուր կառավարություն, իհարկե, հենվելու է նախորդ կառավարության ձեռք բերած արդյունքների վրա եւ փորձելու է խուսափել այն բոլոր խնդիրներից, որոնք ծագել են նախորդ կառավարության ժամանակ: Կարծում եմ, որ պարոն Աբրահամյանի ղեկավարած կառավարությունը հենց այդ ճանապարհով էլ գնալու է: Հատկապես ուզում եմ շեշտել, որ պարոն Աբրահամյանը մի քանի անգամ ասել է` պետք է առաջ նայել եւ չզբաղվել նախորդի քննադատմամբ` իր թերացումների համար, այլ հենվել նախորդի ձեռքբերումների վրա եւ արդյունքում փորձել ուղղել այն խնդիրները, որը նախորդի մոտ չի ստացվել:
- Բյուջեի կատարողականի քննարկումներից հետո երեկ քառյակը կրկին հայտարարեց, որ պատրաստվում է իշխանություններին պահանջներ ներկայացնել, հանրահավաք անցկացնել...
- Այս բյուջեի կատարողականը, որ մենք քննարկում ենք, կատարել է նախորդ կառավարությունը: Այս բյուջեի քննարկումները այս կառավարության հետ ինչպե՞ս են կապվում: Եթե դուք ուզում եք, որ ես ասեմ` նրանց քայլերը տրամաբանական են, թե` ոչ, ուրեմն` երեւի սխալ հասցեատեր եք ընտրել: Պետք է իրենց հարցնել, թե այդ քայլերն ինչքանով են տրամաբանական:
- Նախորդ շաբաթ Աստանայում Եվրասիական բարձրագույն խորհրդի ընդլայնված նիստի ժամանակ քննարկվեց ՀՀ-ի` ՄՄ անդամակցության հարցը: Ըստ Ձեզ, առաջին փուլը` դեպի Մաքսային միություն, հաղթահարեցի՞նք:
- Այո` իհարկե: Առաջին փուլի հաղթահարումը դեռ մենք անցյալ տարի արձանագրեցինք, երբ, ըստ էության, մեզ տվեցին ճանապարհային քարտեզը: Այսօր երկու-երեք տեխնիկական հարց է մնացել, որոնց լուծումից հետո, ինչպես գիտեք, ՀՀ նախագահը հայտարարեց, որ մենք մինչեւ հունիսի կեսը այդ երկու-երեք հարցերը կլուծենք եւ  պատրաստ կլինենք միանալ Եվրասիական տնտեսական տարածքին:
- Սակայն այդ նույն տեխնիկական հարցերն էլ շահարկվեցին, թե միգուցե լուրջ խնդիրներ են ծագել...
- Այսօր հենց դրա մասին կխոսեմ, բայց ասուլիսի ժամանակ:

ՀՐԱՆՏ ՍԱՐԱՖՅԱՆ