Մեր ընդդիմադիրները զարմանալի բնավորություն ունեն`

Մեր ընդդիմադիրները զարմանալի բնավորություն ունեն` ամեն ինչում խտացնել գույները: Այսպես, ըստ ՀՅԴ խմբակցության ղեկավար ԱՐՄԵՆ ՌՈՒՍՏԱՄՅԱՆԻ` Նազարբաեւի քայլը նշանակում էր հետեւյալը. ՙՍկզբանե պարզ էր, որ Ղազախստանն իրականացնում է նրանց լոբբինգը: Որքան խոսվում է Հայաստանի լիիրավ անդամ դառնալու մասին, այնքան այս հարցերը սրվում են, որովհետեւ Ադրբեջանը դուրս է այդ գործընթացից ու ամեն ինչ անելու է, որ Հայաստանը չանդամակցի Եվրասիական միությանն ու չամրապնդի իր դիրքերը: Ադրբեջանն ամեն ինչ անելու է, որպեսզի փորձի անդամակցության միջոցով` Ղարաբաղի կարգավորման հետ կապված, իրեն նպաստավոր ձեւակերպումներ ստանալ՚: Հիմա չհասկացանք, մեր թշնամին փորձելու է հասնել նրան, որ չանդամակցենք, թե անդամակցենք, բայց Ադրբեջանին ձեռնտու պայմաններով: Անշուշտ, Ադրբեջանը ցանկություններ կարող է ունենալ, սակայն տվյալ դեպքում դա մոտավորապես նույնն է, որ հարեւաններից մեկը տնեցիներից մեկի հետ թշնամի լինելով, մյուս տնեցու միջոցով փորձի այնպես փոխել տան դրվածքը, որ իր թշնամին վատ զգա տանը: Ծիծաղելի է, չէ±:
Բայց առավել մեզ զարմացրեց մեկ այլ ընդդիմադիր` ԱՐԱՄ Զ. ՍԱՐԳՍՅԱՆԸ, ով ի տարբերություն այլ արեւմտամետների, չի հավատում, որ Լաչինում մաքսակետ կհայտնվի. ՙԵս չեմ սիրում եթեներով խոսել, մանավանդ որ չեմ կարծում, որ նման զարգացումն իրական է: Աստված չանի, որ նման զարգացում լինի, բայց եթե հանկարծ նման զարգացում լինի, մենք հանդես կգանք համապատասխան գնահատականով՚: Զարմանալի է, ասում է, որ եթեներով չի սիրում խոսել, սակայն սկսում է շարադրել եթե-ների այնպիսի շարան, որ մարդ ընթերցելով արդեն ձանձրանում է: Դե ինչ, իհարկե լավ է, որ Արամ Զավենիչը, օրինակ, ի տարբերություն Դավիթ Շահնազարյանի կամ, առավել եւս, սուտի ՙակտիվիստների՚, ավելի իրատեսորեն է մոտենում հորինովի սպառնալիքին, բայց, այնուամենայնիվ, զարմանալիորեն չի կարողանում դիմանալ գայթակղությանը եւ չնկարագրել, թե ինչ պետք է անել, եթե բայղուշական տարբերակը եղավ:
Մինչ համացանցում եւ լրատվական կայքերում եռում են անառողջ կրքերը, հորինովի վատ բաներ են մոգոնվում եւ առաջարկվում են այդ բաների հաղթահարմանը նույնքան հորինովի բաղադրատոմսեր, պարզվում է, որ ՏՄՊՊ-ն Հայաստանի ԻՆՏԵՐՆԵՏ-ՏԻՐՈՒՅԹ տրամադրող ընկերությանը տուգանում է 10 մլն դրամով` մենաշնորհային դիրք օգտագործելու մեղադրանքով: ՏՄՊՊ-ն իր եզրակացության մեջ նշում է, որ ինտերնետ-տիրույթներն այդ մենաշնորհի պատճառով էականորեն թանկանում են: Բայց զարմանալի է, որն է այդ էական թանկը, եթե ոտուգլխով տիրույթի տարեկան վարձը 13 հազար դրամ է, այսինքն` կայք կարող է բացել գրեթե ցանկացած ոք, ում խելքին փչի: Դե իհարկե, վատ չի լինի, որ, ասենք, ավելի էժան լինի, բայց ինչեւէ:
Եվ վերջապես, զարմանալի էր մայրաքաղաքում տեղի ունեցած դեպքը, որ ԱՐՏԱԿԱՐԳ իրավիճակների նախարարությունը ստիպված էր առանց հսկողության մնացած արջ բռնել եւ տեղափոխել կենդանաբանական այգի: Ճիշտ է, իրականում դա ոչ թե մեծ արջ էր, այլ ընդամենը 3 ամսական քոթոթ, բայց զարմանալին հետեւյալն է, որ ԱԻՆ-ը այդքան հաճախ է առնչվում կենդանիների հետ: Մեկ կատու են փրկում, մեկ օձ են տեղափոխում, հիմա էլ բանը հասավ արջի քոթոթին: Հուսանք, գոնե դինոզավրի ձագ տեղափոխելուն չի հասնի:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ