ՔԱՌՅԱԿ «ՄԻ՛ ՍԱՏԿԻ», ԱՇՈՒՆ ԿԳԱ

ՔԱՌՅԱԿ «ՄԻ՛ ՍԱՏԿԻ», ԱՇՈՒՆ ԿԳԱ

ԱԺ «Ժառանգություն» խմբակցությունում երեկ կայացավ ոչ իշխանական քառյակի հերթական նիստը: Սակայն սա առանձնացավ մյուսներից, քանի որ տեւեց չորս ժամ (այստեղ ճիշտ տեղին է ասել, որ` ո՞ւմ էին լրագրողները մի կտոր հաց տվել, որ քառյակին չմիացավ ՕԵԿ-ը, այլապես հինգ ժամ կտեւեր): Դռնփակ քննարկումը, որքան էլ մասնակիցները փորձում էին թաքցնել, բավական լարված ընթացավ, ինչի ապացույցն էր աղմկոտ քննարկման ձայները` նույնիսկ դռնից այս կողմ: Չգիտես ինչու, նիստից անընդհատ ներսուդուրս էր անում ԱԺ ՀԱԿ խմբակցության պատգամավոր Արամ Մանուկյանը: Կամ, ինչպես ասում են` «ընկեր դատավոր, նա չի կարող նստել», կամ էլ` քաղաքական ուժերը դաստիարակչական աշխատանքներ էին տանում ԱԺ ՀԱԿ խմբակցության ղեկավար Լեւոն Զուրաբյանի հետ, ինչը այդքան էլ Ա. Մանուկյանի սրտով չէր: Ինչեւէ, երկուսուկես ժամ հետո քննարկումից դուրս եկան ՀՅԴ-ական պարոնայք` ԱԺ ՀՅԴ խմբակցության ղեկավար Արմեն Ռուստամյանը եւ նույն խմբակցության քարտուղար Աղվան Վարդանյանը: Թե ի՞նչ էին քննարկում ՀՅԴ-ում, կամ արդյոք ճիշտ էր, որ հանդիպման էին, չհաջողվեց պարզել, քանի որ քառյակի ձեւավորած ավանդության համաձայն` հերթական քննարկումից հետո խոսում է մեկը` այս դեպքում ԱԺ «Ժառանգություն» խմբակցության ղեկավար Ռուբիկ Հակոբյանը: Այնուամենայնիվ, ՀՅԴ-ն միայնակ չթողեց քառյակին եւ վերադարձավ ու եւս ժամուկես հետո «Ժառանգության» ղեկավարի սենյակից արագորեն հեռացան ԱԺ ԲՀԿ խմբակցության պատգամավորներ Վարդան Օսկանյանը եւ Ստեփան Մարգարյանը: Արդյունքում պարզվեց, որ ո՛չ վաղը, ո՛չ մեկ ամիս հետո, այլ աշնանը քառյակը պատրաստվում է միասնական հանրահավաքներ անցկացնել Երեւանում ու մարզերում: Ի դեպ, անկախ նրանից, թե իշխանությունները կընդունեն վերջիններիս մոգոնած 12 կետից բաղկացած պահանջները, թե` ոչ: Ի դեպ, դեռեւս խիստ գաղտնի կետերից հայտնի է միայն մեկը: Քառյակի սիրտը 100 տոկոսանոց համամասնական ընտրակարգի անցնել է ուզում:

ՀՐԱՆՏ ՍԱՐԱՖՅԱՆ