ԼԵՀ ՀՌՉԱԿԱՎՈՐ ՌԵԺԻՍՈՐ ԱՆՋԵՅ ՎԱՅԴԱՅԻ ՖԻԼՄԵՐԸ ԿՑՈՒՑԱԴՐՎԵՆ ԵՐԵՎԱՆՈՒՄ

ԼԵՀ ՀՌՉԱԿԱՎՈՐ ՌԵԺԻՍՈՐ ԱՆՋԵՅ ՎԱՅԴԱՅԻ ՖԻԼՄԵՐԸ ԿՑՈՒՑԱԴՐՎԵՆ ԵՐԵՎԱՆՈՒՄ

Երևանում Լեհաստանի դեսպանատան աջակցությամբ 6 օր շարունակ` հունիսի 4-9-ը «Մոսկվա» կինոթատրոնում կցուցադրվեն աշխարհահռչակ լեհ ռեժիսոր ԱՆՋԵՅ ՎԱՅԴԱՅԻ ֆիլմերը: Աշխարահռչակ կինոռեժիսորը 88 տարեկան է, ով արդեն հասցրել է նկարահանել 50-ից ավել ֆիլմեր, որոնցից մոտ 40-ը խաղարկային ֆիլմեր են: Ֆիլմերի ցուցադրության բացումը տեղի կունենա հունիսիս 4-ին «Վլենսա` հույսի մարդը» ֆիլմի ներկայացմամբ, որը մեծ էկրան է բարձրացել նախորդ տարի հոկտեմբերին:

Իսկ թե ինչո՞ւ հունիսի 4-ին` Հայաստանում Լեհաստանի արտակարգ և լիազոր դեսպան Զդիսլավ Ռաչինսկին ասաց. «1989 թվականի հունիսի 4-ին Լեհաստանում անցկացվեց առաջին ազատ խորհրդարանական ընտրությունները, որից հետո ստեղծվեց ժողովրդավարական կառավարություն, ինչը մեծ դեր խաղաց կենտրոնական եւ արեւելյան Եվրոպայում: Դրանից հետո Չեխիայում, Հունգարիայում, Լիտվայում եվ եվրոպական մի շարք երկրներում տեղի ունեցավ թավշյա հեղափոխություն: Մենք չցանկացանք կազմակերպել կոնֆերանս եւ այս ամենի մասին խոսել այնտեղ, այլ ցանկացանք, որ այդ ամենի մասին պատմեն լեհ մեծ ռեժիսոր Անջեյ Վայդայի ֆիլմերը»,-նշեց ԶԴԻՍԼԱՎ ՌԱՉԻՆՍԿԻՆ եւ մեծ սիրով բոլորին հրավիրեց դիտելու ֆիլմերը:

Կինոգետ Զավեն Բոյաջյանի խոսքով` Անջեյ Վայդային անվերապահորեն կարելի է համարել լեհական կինոյի նահապետը: Ե՛վ եվրոպայի, ե՛ւ աշխարհի մակարդակով, նա խոշոր ռեժիսորներից մեկն է համարվում: «Նա սկսել է ստեղծագործել 50-ական թվականների վերջից եւ մինչեւ այսօր ակտիվ արարման մեջ է: Վայդան հաջողակ ռեժիսոր է ոչ միայն կինոյում, այլեւ թատրոնում եւ հեռուստատեսությունում» ,-ընդգծեց ԶԱՎԵՆ ԲՈՅԱՋՅԱՆԸ ավելացնելով, որ այս ծրագիրը ներկայացնում է Վայդայի ստեղծագործության միայն մի փոքր հատվածը: Կինոգետի փոխանցմամբ` 2000 թվականին Վայդան արժանացել է Օսկարի` ստեղծագործական մեծ վաստակի համար, ինչպես նաեւ շատ հռչակավոր կինոմրցանակների: Նա էկրանավորել է ինչպես լեհ, այնպես էլ` ռուս գրողների ստեղծագործություններ: Ըստ կինոգետի, հայ կինոյում Անջեյ Վայդան Խորհրդային շրջանում ինչ-որ չափով համարվում է ռեժիսոր Ֆրունզե Դովլաթյանը, ով անդրադարձել է Հայաստանի պատմությանը եւ հայ ժողովրդի կյանքի կարեւորագույն շրջաններին: «Ինչ վերաբերում է հետխորհրդային շրջանի հայկական կինոյին, ապա չպետք է մոռանանք, որ մինչեւ այսօր մենք զարգացած կինոարտադրություն չունենք: Մեր երկիը նպաստավոր պայմաններ չի ստեղծել եւ ընդհակառակը` եղածն էլ փոշիացրել է, նկատի ունեմ Հայֆիլմը, որտեղ եղած տեխնիկական միջոցները փոշիացվել են» ,-փաստեց Զ.Բոյաջյանը եւ հավելեց` որպեսզի նկարահանվի բարձրարժեք գեղարվեստական ֆիլմ, անհրաժեշտ է նյութական մեծ միջոցներ եւ առկա լինի պետական ծրագիր:

ԶՎԱՐԹ ԽԱՉԱՏՐՅԱՆ