ՀԱՎԱՔԱԿԱՆԻ ՏՂԱՆԵՐԸ ՀԱՎԱՏՈՒՄ ԵՆ ԲԵՌՆԱՐ ՇԱԼԱՆԴԻՆ

ՀԱՎԱՔԱԿԱՆԻ ՏՂԱՆԵՐԸ
ՀԱՎԱՏՈՒՄ ԵՆ ԲԵՌՆԱՐ ՇԱԼԱՆԴԻՆ

Ֆուտբոլի Հայաստանի ազգային հավաքականը մայիսի 27-ին առաջին խաղն անցկացրեց շվեյցարացի Բեռնար Շալանդի գլխավորությամբ` 4:3 հաշվով հաղթելով Արաբական Միացյալ Էմիրությունների թիմին: Բեռնար Շալանդի նորամուտը ոգեւորիչ էր, մնում է շարունակել նույն ոգով, քանզի խոստումնալից սկիզբը նաեւ այդպիսի շարունություն է ենթադրում:
Այս խաղում իր լավ մարզավիճակը հաստատեց Հենրիխ Մխիթարյանը, որն իր հաշվին դուբլ գրանցեց: Երեւանի ՙԲանանցի՚ կիսապաշտպան Ռումյան Հովսեփյանը եւ չեխական ՙՊրիբրամի՚ պաշտպան Լեւոն Հայրապետյանը բացեցին իրենց գոլերի հաշիվն ազգային թիմում: Հովսեփյանը առաջին խաղն անցկացրեց Հայաստանի հավաքականի կազմում, իսկ Մոսկվայի ՙՍպարտակի՚ հարձակվող Յուրա Մովսիսյանը կատարեց 3 գոլային փոխանցում:

Ընդամենը մեկ խաղով որեւէ եզրակացություն անել իհարկե չարժե` հատկապես, երբ խաղն ընկերական բնույթ էր կրում: Բայց մի բան ակնհայտ էր. Հայաստանի ազգային հավաքականի ֆուտբոլիստները մեծ հույսեր են կապում նոր մարզչի հետ: Իհարկե, դա չի նշանակում, որ Վարդան Մինասյանի դեպքում խնդիրը մարզչի մեջ էր, պարզապես Շալանդի մոտեցումները, ֆուտբոլային գաղափարախոսությունը էապես տարբերվում է նրանից, ինչին տղաները երկար ժամանակ սովոր էին: Հավաքականի տղաները սպասում են մեծ առաջընթացի, որի բանալին համարում են հենց Բեռնար Շալանդին: Թեեւ պաշտպանությունում առկա խնդիրները բավականին լուրջ էին, երկրորդ հարկում էլ, տղաների խաղը ավելի հաճախ չէր ստացվում, բայց խաղադաշտում թիմում նոր շունչ եւ ոգեւորություն կար:
Այս ընկերական հանդիպումները շատ լավ ստուգատես են թիմի մարզչի համար` մարտավարական նոր եղանակներ մշակելու եւ հասկանալու, թե ինչ փոփոխություններ է հարկավոր կատարել: Հավաքականի կազմում ընգրկելով մի շարք երիտասարդ ֆուտբոլիստների` Շալանդը ոչ միայն թարմություն ավելացրեց թիմում, այլեւ հնարավորություն տվեց ֆուտբոլիստներին` սեփական կարողությունները կատարելագործելու: Հավաքականի կազմը երիտասարդացնելը թերեւս մի քանի լավ կողմ ունի: Որքան ժամանակ Բեռնար Շալանդը կմնա Ազգային ընտրանու ղեկին, ցույց կտա նրա կատարած աշխատանքը, այդ աշխատանքի արդյունքը եւ վերջապես` ժամանակը, բայց այս քայլով Շալանդը ապահովագրեց Հայաստանի ընտրանու հետագա սերնդափոխության սահուն ընթացքը: Հիշենք լեգենդար ՙԱրարատ-73՚-ը, որի փառքն ընդհատվեց հենց սխալ սերնդափոխության պատճառով: Հենրիխ Մխիթարյանը, Յուրա Մովսիսյանը, Արթուր Սարկիսովը եւ այլք արդեն այսօր հավաքականում պետք է ունենան հավանական փոխարինողներ, որոնց հետ կխաղան ու կմարզվեն նույն թիմում...
Բեռնար Շալանդի աշխատաոճի մի քանի կողմեր արդեն իսկ լավ սպասելիքների տեղիք են տալիս: Հաջորդ ընկերական հանդիպումը, որտեղ մարզիչը հնարավորություն կունենա նախորդի սխալները շտկել, կկայանա մայիսի 31-ին: Այդ օրը Հայաստանի ազգային ընտրանին ընկերական հանդիպում կանցկացնի աշխարհի առաջնության ուղեգիր նվաճած ալժիրցիների հետ, իսկ հունիսի 6-ին Մայնցում կմրցի Գերմանիայի հավաքականի հետ:

ՔՐԻՍՏԻՆԵ ՊԵՏՐՈՍՅԱՆ