Կ. ԳՐԻԳՈՐՅԱՆԻ ԱՌԱՋԱՐԿԱԾ «ԼՈՒՅՍԸ»` ԱՐՏԱԳԱՂԹԻ ԴԵՄ

Կ. ԳՐԻԳՈՐՅԱՆԻ ԱՌԱՋԱՐԿԱԾ «ԼՈՒՅՍԸ»` ԱՐՏԱԳԱՂԹԻ ԴԵՄ

Առաջին Հանրապետության հռչակման օրը` մայիսի 28-ը, առանձնակի տոն էր նաեւ երգահան ԿԱՐԵՆ ԳՐԻԳՈՐՅԱՆԻ համար: Երգահանն իր լսարանի դատին հանձնեց Հայաստանին նվիրված իր նոր` «Լույս» երգը, https://soundcloud.com/kavingrig/luys հայ էստրադայի մի քանի ներկայացուցիչների` Անահիտ Շահբազյանի, Վլադիմիր Բարխոյանի, Սոնա Ռուբինյանի, Արթուր Ալեքի, Եվա Սուջյանի եւ Հրագ Սիմոնյան կատարմամբ:

Երգի խոսքերը եւ երաժշտությունը Կարեն Գրիգորյանինն են, գործիքավորումն արել է Լեւոն Փասոդյանը, ով նաեւ երգի երաժշտական պրոդյուսերն է: Երգում հնչում է թավշյա շվի` Լեւոն Թեւանյանի եւ կիթառ` Գարեգին Ամյանի կատարմամբ: «Իրավունքի» հետ զրույցում Կարենը նշեց, որ երգի գաղափարը եղել է Լեւոն Փասոդյանի կողմից. «Պարզապես, Լեւոնն առաջարկեց համագործակցել` ես էլ մեծ սիրով համաձայնեցի»,- շեշտեց Կարենն ու տեղեկացրեց, որ երգի տեսահոլովակը չի ուշանա. «Տեսահոլովակ անպայման լինելու է, բայց դեռ քննարկման փուլում ենք, չենք ուզում այն նման լինի Հայաստանի մասին արդեն իսկ եղած տեսահոլովակներին»:
Իսկ թե ինչո՞ւ Հայաստանի մասին երգը որոշվեց վերնագրել «Լույս», Կարենն այսպես բացատրեց. «Երկար ենք մտածել վերնագրի մասին, բայց ի վերջո, հենց «Լույս» վերնագրեցի: Կարծում եմ, այն լավագույն ձեւով է բնութագրում երգի ասելիքը: Եվ, պատահական չէ, որ հենց մայիսի 28-ին որոշեցինքներկայացնել հանրությանը, քանի որ այն շատ խորհրդանշական է մեզ համար»:

Ի դեպ, Կարենը կարծում է, որ հնարավոր է երգը կանխի արտագաղթը Հայաստանից. «Գուցե շատերը լսեն երգն ու չլքեն Հայաստանը, իսկ ովքեր էլ արդեն լքել են` լսեն եւ վերադառնան հայրենիք: Հուսամ, երգը լսարանի մոտ միայն ջերմ զգացողություններ կառաջացնի»:
Կարենը չցանկացավ խոսել առաջիկա անելիքների մասին. «Նախընտրում եմ նախագծերի մասին խոսել միայն դրանց ավարտին հասցնելուց հետո: Կարող եմ միայն ասել, որ մտածում եմ համերգային ծրագրի մասին, կարծում եմ` ժամանակն է»:

Երգիչ ՎԼԱԴԻՄԻՐ ԲԱՐԽՈՅԱՆՆ էլ խոսելով Կարեն Գրիգորյանի «Լույս» երգի մասին` նախ շեշտեց. «Թե' իմ երգում` «Ես սիրել գիտեմ», թե' այս` «Լույս» երգում Կարենի ձեռագիրը միանգամից երեւում է: Նա այն տաղանդավոր երիտասարդներից է, ում երգերում միշտ կա սեր, լուսավոր ինչ-որ մի բան` նույնիսկ տխուր երգերում: Այ, հենց դա է, որ գրավում է լսողին: Ուրախ եմ, որ եւս մեկ անգամ կատարեցի Կարենի գրած երգերից: Յուրաքանչյուրս այդ երգին տվել ենք ինչ-որ մի բան` մեր ներսից. այն ցավը, որը յուրաքանչյուր հայ իր մեջ տանում է: Դարեր ի վեր մեր ազգին հալածել եւ փորձել են վերացնել, բայց մեր ազգը միշտ ոտքի է կանգնել իր հզոր մշակույթով: Հայը միշտ եղել է, կա ու կմնա»:

Երգչուհի ԱՆԱՀԻՏ ՇԱՀԲԱԶՅԱՆԸ կարեւորելով երգը` նշեց. «Միայն ուրախ կլինեմ, որ մեր երգով մարդկանց հայրենիք վերադարձնենք, ու այն մարդիկ, ովքեր Հայաստանում են, երբեք չլքեն` դժվարություններ ամեն տեղ էլ կան: Մենք պետք է մնանք մեր երկրում ու կերտենք մեր ապագան»:

ԼԻԼԻԹ ԵՂԻԱԶԱՐՅԱՆ