ԱՆԱՌՈՂՋ ԱՂԻՆԵՐԸ ԲԱՑԱՍԱԿԱՆ ԵՆ ԱԶԴՈՒՄ ՄԱՇԿԻ, ԵՂՈՒՆԳՆԵՐԻ ԵՎ ՄԱԶԵՐԻ ՎՐԱ

ԱՆԱՌՈՂՋ ԱՂԻՆԵՐԸ ԲԱՑԱՍԱԿԱՆ ԵՆ ԱԶԴՈՒՄ ՄԱՇԿԻ, ԵՂՈՒՆԳՆԵՐԻ ԵՎ ՄԱԶԵՐԻ ՎՐԱ

- Ի՞նչ է աղիների դիսբակտերիոզը: Ի՞նչ հետեւանքներով է այն հղի: Վարակի՞չ է: Խորհուրդ են տվել օգտագործել «Նարինե» մածունը, ինչն ինձ համար անընդունելի է: Ես ընդհանրապես կաթնամթերք չեմ օգտագործում:

Հարցին պատասխանում է թիվ 2 բուժմիավորման թերապեւտ ՔՐԻՍՏԻՆԵ ՀՈՒՆԱՆՅԱՆԸ:

-Առողջ մարդկանց աղիներում 570 տեսակի տարբեր մանրէներ կան, որոնց մեծ մասը դրական ազդեցություն ունի մարսողական համակարգի եւ ողջ օրգանիզմի վրա:
Պետք է նշեմ, որ աղիների միկրոֆլորան ձեւավորվում է երեխայի ծնվելուց հետո, երբ օրգանիզմը փոխազդում է շրջակա միջավայրում միշտ առկա մանրէների հետ: Օրգանիզմի նորմալ միկրոֆլորան ապահովում են ֆունկցիոնալ լիարժեք եւ քանակապես բավարար միկրոօրգանիզմները, որոնք գոյություն ունեն աղիներում: Դրանցից օգտակար են լակտո, բիֆիդո եւ կոլիբակտերիաները, որոնք նպաստում են սննդի մարսմանը եւ հսկում ախտածին մանրէների քանակը, դրանով իսկ օրգանիզմը պաշտպանելով զանազան վարակներից:
Աղիներում մանրէների հավասարակշռության խախտումը կոչվում է դիսբակտերիոզ կամ աղիքների դիսբիոզ, որի հիմնական պատճառներն են` մարսողական համակարգի հիվանդությունը, հատկապես դրանց քրոնիկական ընթացքը, սխալ սնվելը, անորակ սնունդը, սթրեսները, հակաբիոտիկների չարաշահումը, վիտամինների պակասը:
Ինչ վերաբերում է մեր նամակագրի հարցին, պետք է ասեմ, որ առողջ սննդի ամենակարեւոր բաղկացուցիչը` կաթնաթթվային մթերքներն են, հատկապես «Նարինե» կաթնամթերքը, որը օժտված է բացառիկ օգտակար հատկություններով եւ չունի հակացուցումներ: Իսկ եթե որոշ մարդիկ խուսափում են կաթնամթերք օգտագործելուց, կարեւորում եմ նշել, որ այսօր արդեն շուկայում կա մրգային հաբեր «Նարինեով» ծամելու տեսքով, որոնք կարող են օգտագործել անսահման քանակությամբ:
Եղե՛ք առողջ:

Հարցին պատասխանել է նաեւ ՀՀ ԱՆ «Կուրորտաբանության եւ ֆիզիկական բժշկության գիտահետազոտական ինստիտուտի» գաստրոէնտերոլոգ, սննդաբան ԱՆՆԱ ՉԵՐՉԻՆՅԱՆԸ.

-Աղիների դիսբակտերիոզը`  կլինիկո-լաբորատոր համախտանիշ է, որը կապված է աղիների միկրոֆլորայի որակական եւ քանակական փոփոխությունների հետ: Հիվանդությունների միջազգային դասակարգման մեջ «դիսբակտերիոզ» հիվանդություն գոյություն չունի: Արտերկրում այն անվանում են «բակտերիալ գերաճի համախտանիշ»: Դիսբակտերիոզը ինֆեկցիոն հիվանդություն չէ:  Տարբերակում են աղիների դիսբակտերիոզի բարդության 3 աստիճան:
Տարբեր պատճառների հետեւանքով աղիներում խախտվում է միկրոֆլորայի հավասարակշռությունը եւ զարգանում է դիսբակտերիոզը: Պատճառ կարող են լինել`  աղիների շարժողական ֆունկցիայի խանգարումը, հակամանրէային դեղորայքի օգտագործումը, սխալ սնունդը,  իմունային համակարգի խանգարումը, ստամոքսահյութի թթվայնության իջեցումը եւ այլն:
Օրգանի նորմալ միկրոֆլորայի մանրէները օգնում են մեզ մարսել սնունդը, չեզոքացնել վնասակար նյութերը, սինթեզել վիտամինների ու ամինաթթուների մեծամասնությունը: Մանրէների «կոնկուրենտ» հարաբերությունների խանգարման հետեւանքով նորմալ միկրոֆլորայի միկրոօրգանիզմների տեղը հաճախ գրավում են պաթոգեն միկրոօրգանիզմները (օրինակ` կանդիդայի սնկերը):  
Դիսբակտերիոզը կարող է լինել որոշ հիվանդությունների ախտանշան: Օրինակ` այն հիվանդությունների դեպքում, որոնք բնութագրվում են որովայնի ցավերով, մեթեորիզմով (փորի փքվածություն), փորթույլությունով, ախորժակի անկումով, արտահայտված ընդհանուր թույլությունով, աշխատունակության անկումով, գլխացավով:
Բնական ֆլորայի իջեցումը նպաստում է ինֆեկցիաների հաճախականության բարձրացմանը, սննդից օգտակար նյութերի ներծծման գործընթացի խանգարմանը, հիպովիտամինոզի զարգացմանը:
Վնասված աղիները դժվարությամբ են կարողանում կատարել իրենց հիմնական ֆունկցիան` տոքսինների եւ օտար մանրէների հանդեպ պատնեշի ֆունկցիան, ինչի հետեւանքով օրգանիզմը թունավորվում է տոքսիկ (թունային) նյութերով` ամոնիակ, ացետոն եւ այլն` ստեղծելով ծանրաբեռնվածություն լյարդի վրա:
Անառողջ աղիները բացասական են ազդում մաշկի, եղունգների եւ մազերի վիճակի վրա. խանգարումը կարող է նաեւ զարգացնել ալերգիաներ: Ավելի շատ ակտուալ է երեխաների համար: Այսօր լիովին ապացուցված է դիսբակտերիոզի կապը ատոպիկ (ալերգիկ) մաշկաբորբի հետ` կրծքով կերակրվող երեխաների մոտ:
Որոշ դեղամիջոցների ընդունումը նույնպես կարող է բերել օրգանիզմում մանրէների հավասարակշռության խախտմանը: Իսկ հակաբիոտիկներով բուժումը միշտ էլ խախտում է աղիների միկրոֆլորան: Ամեն մարդ ունի նորմալ միկրոֆլորայի անհատական կազմը: Նորմալ միկրոֆլորայի վերականգնողական հիմնական պայմանները պետք է ուղղված լինեն` հիմնական հիվանդության բուժմանը, ճիշտ սննդակարգին, աղիների ֆլորայի վերականգնմանը, աղիներից «շլակների» դուրս հանմանը: Հիմնական հիվանդությունը եւ դիսբիոզը  պետք է բուժել զուգահեռաբար: Բուժման համար «Նարինեից» բացի նշանակում են համապատասխան դեղամիջոցներ: «Նարինեի» եւ դեղամիջոցների օգտագործումը բուժման համար պետք է նշանակվի բժշկի կողմից: Իսկ կաթի եւ կաթնամթերքի հանդեպ անընդունելիությունը կարող է լինել տարբեր պատճառներից:

ՎԼԱԴ ՄՈՒՐԱԴՅԱՆ