ՈՍԿԵՎԱՆ ԳՅՈՒՂՈՒՄ ԱՄԲՈՒԼԱՏՈՐԻԱ ՉԿԱՌՈՒՑՎԵՑ Լ.ՍԱՐԳՍՅԱՆ-Դ. ԴՈՒՄԱՆՅԱՆ ՀԱԿԱՄԱՐՏՈՒԹՅԱՆ ՊԱՏՃԱՌՈ՞Վ

ՈՍԿԵՎԱՆ ԳՅՈՒՂՈՒՄ ԱՄԲՈՒԼԱՏՈՐԻԱ ՉԿԱՌՈՒՑՎԵՑ Լ.ՍԱՐԳՍՅԱՆ-Դ. ԴՈՒՄԱՆՅԱՆ ՀԱԿԱՄԱՐՏՈՒԹՅԱՆ ՊԱՏՃԱՌՈ՞Վ

Այսօր տեղի ունեցավ Ազգային Ժողովի առողջապահության, մայրության եւ մանկության հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստը: Նիստի ընթացքում` առիթը բաց չթողնելով` ԱԺ ՀԱԿ խմբակցության պատգամավոր ԼՅՈՒԴՄԻԼԱ ՍԱՐԳՍՅԱՆԸ հիշեց նախկի առողջապահության նախարար Դերենիկ Դումանյանին եւ նրա չիրականացրած խոստումների, իր եւ նրա լարված միջանձնային հարաբերությունների մասին, ապա նշեց, որ Ոսկեվանում առ այսօր ամբուլատորիա չկառուցելու պատճառը հենց իր եւ Դ.Դումանյանի չստացված փոխհարաբերություններն էին: Հարցին ստիպված եղավ միջամտել ԱԺ ֆինանսավարկային եւ բյուջետային հարցերի մշտական հանձնաժողովի նախագահ, ԱԺ ՀՀԿ խմբակցության պատգամավոր ԳԱԳԻԿ ՄԻՆԱՍՅԱՆԸ` հորդորելով, որ ճիշտ չէ քննադատություններ եւ գնահատականներ հնչեցնել մի մարդու հասցեին, ով այստեղ ներկա չէ: Բնականաբար, Լ. Սարգսյանը հակադարձեց. «Ես քննադատություն չեմ հնչեցնում ես  փաստերի մասին եմ խոսում» : Նույն փաստերով էլ Գ. Մինասյանը խոսեց. «Դուք եթե ձեր ձայնագրությունը լսեք, կտեսնեք, որ հնչեցնում եք»: Եվ տիկինը ստիպված եղավ ընդունել իր սխալը. «Բարի, կարող եք ինձ դրա մեջ մեղադրել, բայց քանի որ մենք ունենք նոր նախարար, ես ակնկալում եմ խնդիրներին լուծումներ տալ»: Իսկ նոր առողջապահության նախարար ԱՐՄԵՆ ՄՈՒՐԱԴՅԱՆԸ, ով եկել էր պատգամավորների հարցերին պատասխանելու, թեպետ Դ.Դումանյանի իրավահաջորդն է, բայց փորձեց «լեզու գտնել» Լ.Սարգսյանի հետ. «Հարգելի՛ տիկին Սարգսյան, ամենայն հարգանքով թե՛ Ձեր, թե՛ բացակա պարոն Դումանյանի հանդեպ, պետք է ասեմ, որ այդ հարցը ես խորը կուսումնասիրեմ` կապված Ոսկեվան գյուղի ամբուլատորիայի հետ: Նաեւ կուսումնասիրեմ այն գործընթացը, որը համոզված եմ, որ արդեն տեղից շարժված է»:

ՀՐԱՆՏ ՍԱՐԱՖՅԱՆ