ԿՈՄՊՈԶԻՏՈՐ ՏԻԳՐԱՆ ՄԱՆՍՈՒՐՅԱՆԸ 75 ՏԱՐԵԿԱՆ Է

ԿՈՄՊՈԶԻՏՈՐ ՏԻԳՐԱՆ ՄԱՆՍՈՒՐՅԱՆԸ 75 ՏԱՐԵԿԱՆ Է

Երեկ՝ մայիսի  29-ին՝ Կոմիտասի անվան Կամերային երաժշտության տանը կայացավ Հայաստանի պետական կամերային նվագախմբի և Հայաստանի պետական կամերային երգչախմբի համատեղ համերգը`  նվիրված սիրված կոմպոզիտոր ՏԻԳՐԱՆ ՄԱՆՍՈՒՐՅԱՆԻ 75-ամյակին:

Համերգի ծրագրում ընդգրկված էին  կոմպոզիտորի  Տարվա Եղանակներ, Ջութակի կոնցերտ,  Canti Paralleli, Երեք խմբերգ,  Արվեստ Քերթության  ստեղծագործությունները:

Որպես մենակատարներ  հանդես եկան`  Անուշ Նիկողոսյանը /ջութակ/, Իրինա Զաքյանը/սոպրանո/ և Արթուր Ավանեսովը /դաշնամուր/: Համերգը ղեկավարում էր  Հայաստանի Պետական Կամերային Երգչախմբի  գեղարվեստական ղեկավար և  դիրիժոր`Ռոբերտ Մլքեյանը:

Տիգրան Մանսուրյանը ծնվել է  Բեյրութում. հեղինակ է գլխավորաբար նվագախմբային, կամերային, երգչախմբային և վոկալ գործերի, որոնք կատարվել են ամբողջ աշխարհում։

Մանսուրյանը  կոմպոզիցիա է սովորել 1956-1960 Երևանի Ռոմանոս Մելիքյանի անվան երաժշտական ուսումնարանում (Էդուարդ Բաղդասարյանի դասարան), ապա 1960-65 Երևանի Կոմիտասի անվան պետական կոնսերվատորիայում, Ղազարոս Սարյանի դասարանում, որի դասարանում էլ ավարտել է ասպիրանտուրան 1967թ։ Ստեղծագործական առաջին քայլերից իսկ իր գործերն արժանացել են ջերմ ընդունելության, ինչի ապացույցն են իր ԽՍՀՄ համամիութենական երկու առաջին մրցանակները (1966-ին՝ «Պարտիտա» երկի համար և 1968-ին «Չորս հայրեն»-ի համար)։ 1967-1986 ժամանակակից երաժշտության տեսություն է դասավանդել Երևանի Կոմիտասի անվան պետական կոնսերվատորիայում, իսկ 1992-1995 եղել է այս հաստատության ռեկտորը։Մանսուրյանը հայտնի է իբրև նախկին ԽՍՀՄում ժամանակակից երաժշտության ռահվիրաներից մեկը և առաջինը, ով կոմպոզիցիոն ժամանակակից հնարներ է ներմուծել Հայաստան։ Իր ստեղծագործությունները մեծ հաջողություն են գտել Լոնդոնում, Փարիզում, Հռոմում, Միլանոյում, Բեռլինում, Մյունխենում, Վիեննայում, Մոսկվայում, Վարշավայում, Զագրեբում, Նյու Յորքում, Լոս Անջելոսում և համաշխարհային երաժշտական այլ մայրաքաղաքներում։ Փիեռ Բուլեզը դրվատանգի բարձր խոսքեր է ասել նրա «Ինտերիեր» ստեղծագործության մասին`IRCAM-ում (Փարիզ) 1984-ի կատարման առիթով։Մանսուրյանի ստեղծագործությունները հայկական երաժշտարվեստի և ժողովրդական ավանդույթների հետաքրքիր մի խառնուրդ են՝ իրենց լուսապայծառ, արտահայտիչ մեղեդիներով և տպավորապաշտ, բարձրաճաշակ ու ընտիր հնչերանգներով։ Իր գործերը կարելի է դասակարգել 5 խմբում. 1) գործիքային կամերային երաժշտություն (կոնցերտներ, սոնատներ, և այլն), 2) վոկալ երաժշտություն (մեներգ և խմբերգ), նվագակցությամբ և առանց նվագակցության, 3) սիմֆոնիկ երաժշտություն (կամերային և սիմֆոնիկ կազմերի համար), 4) ծրագրային երաժշտություն (կինոյի և թատերական ներկայացումների համար), 5) բալետ։ 1947-ից  Տիգրան Մանսուրյանն ապրում է Հայաստանում։

ԼԻԼԻԹ ԵՂԻԱԶԱՐՅԱՆ