«ՇԱՏ ԿԱՐՃ ԺԱՄԿԵՏՈՒՄ ՀՀ-Ն ԿԴԱՌՆԱ ՄՄ ԱՆԴԱՄ»

«ՇԱՏ ԿԱՐՃ ԺԱՄԿԵՏՈՒՄ ՀՀ-Ն ԿԴԱՌՆԱ ՄՄ ԱՆԴԱՄ»

«Եթե մեզ ԵՄ-ի հետ նոր ձևաչափով ասոցացման պայմանագիր կնքելու հնարավորություն տրվի, Հայաստանն Արևելք-Արևմուտք տնտեսական համագործակցության կամուրջ դառնալու լուրջ հնարավորություն կստանա»: Այսօր լրագրողների հետ հանդիպման ժամանակ նման կարծիք արտահայտեց ԱԺ ՀՀԿ խմբակցության պատգամավոր Մկրտիչ Միանասյանը՝ հիմք ընդունելով Ֆրանսիայի նախագահի ելույթն այն մասին, որ Հայաստանին պետք է ասոցացման նոր ձևաչափով համաձայնագիր կնքելու առանձնահատուկ կարգավիճակ տրվի. «Այսօր Աստանայում առանձնահատուկ դաշտ է ստեղծվում ՀՀ-ի համար, տնտեսական համագործակցության լայն հնարավորություններ են ստեղծվում, որոնց շնորհիվ կկարողանանք մեր արտադրությունն ու տնտեսությունն արագ զարգացնել: Ավելի մեծ շուկա կունենանք, որը մեզ համար շատ ավելի ընկալելի և ընդունելի է, քան եվրոպական շուկան»: Ըստ պատգամավորի մենք եվրասիական ստանդարտներին ավելի շուտ կհասնենք և շատ արագ կինտեգրվենք դրան. «Եվրասիական միության անդամ դառնալու ճանապարհին ՀՀ կառավարությունը ճանապարհային քարտեզի բոլոր կետերով համապարփակ աշխատանքներ է տանում, և ամենակարճ ժամկետում ՀՀ-ն կդառնա ՄՄ անդամ»:

Մինասյանի խոսքով՝  Հայաստանն անպայման կստորագրի ՄՄ-ին անդամակցման համաձայնագիրը. «Եթե խնդիրներ էլ կան, որ քննարկումների տեղիք են տալիս, ապա դրանք կլուծվեն և նոր միայն կստորագրվի համաձայնագիրը: Քաղաքական ուժերն ու կառավարությունը լուծումներ կգտնեն և կկազմեն ստորագրման անհրաժեշտ փաստաթղթերը»,- հավաստիացրեց նա: