Միգրանտների ազդեցությունը երկրի տնտեսության վրա փաստ է և հզոր ուժ. Կ. Ռոմոդանովսկի

Ինչպես արդեն տեղակցրել էինք, այսօր Հայաստանի Հանրապետության Ազգային Ժողովի շենքում գործող Հայ-ռուսական բարեկամական խորհրդարանական ակումբում ԱՊՀ երկրների երիտասարդական միության նախաձեռնությամբ տեղի ունեցավ ռուսական պատվիրակության և Հայաստանի ներկայացուցիչների հանդիպում՝ նվիրված Եվրասիական ինտեգրման ենթատեքստում միգրացիոն քաղաքականության հարցերին:

Հայաստանի և Ռուսաստանի միգրացիոն համագործակցության, ինչպես նաև Մաքսային միությանն ու Միասնական տնտեսական տարածաշրջանին Հայաստանի անդամագրմանը վերաբերող հարցերի քննարկմանն էին մասնակցում Ազգային ժողովի պատգամավորներ, Պետական միգրացիոն ծառայության ղեկավար Գագիկ Եգանյանը, պրոֆիլային կառույցների ներկայացուցիչներ և հասարակական - քաղաքական ոլորտի փորձագետներ: Նրանք կարծիքներ փոխանակեցին միգրանտների ուսուցման և հավատարմագրման, երկքաղաքացիության ձեռքբերման և ՌԴ տարածքում միգրանտների ժամանակավոր գտնվելու հարցերի շուրջ:

Դաշնային միգրացիոն ծառայության ղեկավար Կոնստանտին Ռոմոդանովսկին խոսեց այն մասին, որ միգրանտների ազդեցությունը երկրի տնտեսության վրա փաստ է և հզոր ուժ, որը պետք է ճիշտ կառավարել և ուղղորդել: Նա նշեց, որ Ռուսաստնում, մասնավորապես Մոսկվայում և Կրասնոդարում մեծ թվով հայեր են ապրում, նրանց ՌԴ-ում գտնվելը բարդացնող կամ խոչընդոտելու միտում ունեցող որևէ նորմ Ռուսաստանում չի ընդունվել:

Ընդունվել են միջազգային նորմեր, որոնք կկառավարեն, կվերահսկեն միգրացիոն հոսքերը, կխթանեն օրինազանցությունների բացահայտմանը: Իսկ քննարկման մասնակից Ա. Գեղամյանը նշեց, որ Հայաստանի Մաքսային Միությանը միանալու որոշումը մեծ աղմուկ բարձրացրեց, բազմակողմանի մեկնաբանվեց, սակայն դրա առավելությունները ակնհայտ են: Հայսատանն այօր շրջափակված է, և գործարարական ձիրքով օժտված մարդիկ հաճախ չեն կարողանում իրացնել իրենց փորձն ու գիտելիքները, և հենց Ռուսաստանն է, որ տալիս է մեր գործարարներին այդ հնարավորությունը:

Քննարկման ընթացքում խոսվեց նաև այն մասին, որ այսօր շատ կարևոր է տեղեկատվության տարածումը: Մարդիկ հաճախ բուռն են արձագանքում ընդունված որոշումներին պարզապես տեղեկացված չլինելու պատճառով: Առաջարկվեց ստեղծել հատուկ ծրագրեր, որոնք հնարավորություն կտան լայնորեն տարածել ճիշտ տեղեկատվություն` երկու երկրների հարաբերությունների հետ կապված:

ՌԴ Դաշնային միգրացիոն ծառայության ղեկավար Կոնստանտին Ռոմոդանովսկին, ի պատասխան հնչած առաջարկի, նշեց, որ իրենք պատրաստ են ամեն կերպ աջակցել, տրամադրել անհրաժեշտ տեղեկատվություն, քանի որ ռուսական կողմը նույնպես կարևորում է այս հարցը: Քննարկման ավարտին ՌԴ Դաշնային միգրացիոն ծառայության ղեկավար Կոնստանտին Ռոմոդանովսկին գրեց իր ցանկություններն ու բարեմաղթանքները Հայ-ռուսական բարեկամական խորհրդարանական ակումբի հուշամատյանում: