ՄԵԾԱՀԱՍԱԿՆԵՐԻ ՀԱՎԱՔԱԿԱՆԻՑ ՍՊԱՍԵԼԻՔՆԵՐՆ ԱՎԵԼԻ ՇԱՏ ԷԻՆ

ՄԵԾԱՀԱՍԱԿՆԵՐԻ ՀԱՎԱՔԱԿԱՆԻՑ ՍՊԱՍԵԼԻՔՆԵՐՆ ԱՎԵԼԻ ՇԱՏ ԷԻՆ

Ռումինիայի մայրաքաղաք Բուխարեստում կայացած սամբոյի Եվրոպայի 2014թ. առաջնությունում Հայաստանի սամբոյի հավաքականը նվաճել է 6 մեդալ` 1 ոսկի, 2 արծաթ եւ 3 բրոնզ: Հին աշխարհամասի չեմպիոն է հռչակվել Տիգրան Կիրակոսյանը եւ արժանացել ոսկե մեդալի: Արծաթե մեդալակիր է դարձել Մխիթար Մխիթարյանը (57 կգ): Իսկ հավաքականի ամենատիտղոսակիր մարզիկներ Աշոտ Դանիելյանը (82կգ) ու Վաչիկ Վարդանյանը (68կգ) արժանացել են համապատասխանաբար` բրոնզե եւ արծաթե մեդալների:  Բրոնզե մեդալներով էին պարգեւատրվել նաեւ Էդիկ Պետրոսյանը (90 կգ) ու Վահան Նիկոլայանը (62 կգ): Որքանով են գրանցված արդյունքները գոհացնող` ՙԻրավունքը՚ պարզեց Հայաստանի սամբոյի ֆեդերացիայի նախագահ ԼԵՎՈՆ ՀԱՅՐԱՊԵՏՅԱՆԻՑ:

-Ընդհանուր առմամբ, արդյունքը վատ չէ` պատանիների, երիտասարդների եւ մեծահասակների Եվրոպայի առաջնություններից նվաճեցինք 3 ոսկե, 7 արծաթե եւ 7 բրոնզե մեդալներ: Թիմային հաշվարկում պատանիների եւ երիտասարդների հավաքականները երրորդն էին, իսկ մեծահասակներըª չորրորդը: Սակայն մեծահասակներից մեր սպասելիքներն ավելի շատ էին: Աշոտ Դանիելյանը, իր գոտեմարտը տակտիկապես սխալ դրսեւորեց` կարող էր հանգիստ ավարտին հասցնել, բայց ցավեցնող հնարքի գնաց, որին պետք է չգնար եւ արդյունքում պարտվեց ռուս մրցակցին: Աշոտի բրոնզե մեդալը պետք է ոսկե լիներ, քանի որ նա մի քանի գլուխ բարձր էր մրցակցից: Բայց, այսպես ասած, ճակատը դեմ տվեց ու չկարողացավ հաջողության հասնել:
- Իսկ մյուս մարզիկները հանդես եկան իրենց առավելագու՞յն ուժերով:
- Մավրիկ Նասիբյանն իր հնարավորություններից շատ ցածր հանդես եկավ: Նա, որ միշտ մրցակցային եռյակում էր լինում, այս անգամ մեդալ չնվաճեց, նույնն էլ` Սոսե Բալասանյանը: Բայց դա նաեւ մեր մեղավորությունն է, մեր ֆեդերացիայի, հավաքականի եւ գլխավորապես` մեր ֆինանսական խնդիրների: Այսպիսի մրցաշարերից առաջ մեր մարզիկներն ընդհանուր չեն մարզվում, հավաք չեն անցկացնում: Մենք ի±նչ իմանանք` ամեն մարզիկ իր անհատական մարզչի հետ ինչ է արել, ինչպես է մարզվել, ծարավ է եղել, թե` սոված... Մենք չենք կարողանում ճիշտ գնահատել մարզիկների մարզավիճակը, քանի որ նրանք մեր աչքի առաջ չեն նախապատրաստվում: Դա միակ պատճառն է, որ ավելի կայուն արդյունքներ չենք գրանցում:
- Ո՞րն է լինելու հաջորդ մրցաշարը, որին կմասնակցեն  հավաքականները:
- Հաջորդ խոշոր մրցաշարը Աշխարհի առաջնությունն է: Հոկտեմբերին պատանիները եւ երիտասարդները Աշխարհի առաջնությանը կմասնակցեն Սիդնեյում, իսկ մեծերըª Ճապոնիայում: Սա կարեւորագույն  առաջնությունն է բոլոր մարզաձեւերի համար, իհարկե` բացի օլիմպիական խաղերց:

ՔՐԻՍՏԻՆԵ ՊԵՏՐՈՍՅԱՆ