ՌԴ ՄԵԿՆՈՂ ՀՀ ՔԱՂԱՔԱՑԻՆԵՐԻ ԽՆԴԻՐՆԵՐԸ ԿԹԵԹԵՎԱՑՎԵՆ

ՌԴ ՄԵԿՆՈՂ ՀՀ ՔԱՂԱՔԱՑԻՆԵՐԻ ԽՆԴԻՐՆԵՐԸ ԿԹԵԹԵՎԱՑՎԵՆ

Վերջին օրերին Հայաստանում էր ՌԴ Դաշնային միգրացիոն ծառայության ղեկավար Կոնստանտին Ռոմոդանովսկին, ով հայտարարեց ՌԴ միգրացիոն համակարգը Հայաստանի քաղաքացիներին Մաքսային միության մոտեցումներն ու կանոնները համապատասխան կիրառելու պատրաստակամության, այդ նպատակով նախապատրաստված երկկողմ համաձայնագրի մասին: Դրա վերջնական մշակման ուղղությամբ համատեղ աշխատանքները դեռ շարունակվում են, սակայն կան խոսակցություններ` հնարավորինս արագ այդ գործընթացն ավարտելու մտադրությունների մասին: Դա էականորեն կդյուրինացնի ինչպես ՀՀ քաղաքացիների մուտքը ՌԴ, այնպես էլ կլուծի այնտեղ հայաստանյան աշխատանքային միգրանտների կացության, աշխատանքային գործունեության հետ կապված մի շարք խնդիրներ: Թե հատկապես ինչ համաձայնագրերի մասին է խոսքը, փորձեցինք պարզել Միգրացիոն ծառայության ղեկավար ԳԱԳԻԿ ԵԳԱՆՅԱՆԻՑ.
-Խոսքը երկու միջկառավարական, բարձր կարգավիճակ ունեցող պայմանագրերի մասին է: Մեկով` հնարավորություն է տրվելու մեր քաղաքացիներին ՌԴ մուտք գործելուց հետո յոթ օրվա փոխարեն երեսուն օրում հաշվառման կանգնել: Այսինքնª ավելի երկար ժամանակ կունենան` իրենց խնդիրները լուծելու: Իսկ հաջորդ պայմանագրով նախատեսվում է, որ ՌԴ-ում առանց աշխատանքի թույլտվության, առանց դրա համար փաստաթղթեր ներկայացնելու, պետական տուրք վճարելու` միանգամից կանցնեն աշխատանքի` կնքելով աշխատանքային պայմանագիր: Եվ աշխատանքային պայմանագրի տեւողության ընթացքում նրանք կհամարվեն ՌԴ-ում օրինական հիմքերով գտնվող քաղաքացիներ:
- Երբ այդ պայմանագրերն ուժի մեջ կմտնեն:
- Գործընթացը սկսված է, պայմանավորվածություն է ձեռք բերվել, որ կողմերը սեղմ ժամկետներում կմշակեն համաձայնագրերի նախագծերն ու դրանք ներպետական ընթացակարգերով կներկայացնեն վավերացման:
- Պայմանագրերը որեւէ կապ ունեն ՄՄ-ին անդամակցելու որոշման հետ:
- Նույն խաղի կանոնները, սկզբունքները սահմանված են ՄՄ-ի պետությունների տարածքում: Մենք հիմա փորձում ենք մինչեւ անդամակցելը` ավելի վաղ ժամկետում, այդ նույն հարաբերությունները կյանքի կոչել երկկողմանի ձեւաչափով` հայ-ռուսական հարաբերություններում: Եթե կարողանանք անդամակցելուց մի քանի ամիս էլ շուտ անել, դա ՌԴ մեկնող եւ այնտեղ աշխատանքի անցնող առնվազն մի քանի հարյուր հազար անձի համար ավելի դյուրին պայմաններ կապահովի:

ԻԼՈՆԱ ԱԶԱՐՅԱՆ