ԴԱՎԻԹ ՍԱՖԱՐՅԱՆ. ՙԿՈՒԶԵԻ ՄԻԱՅՆ ԼԱՎ ՊԱՅՔԱՐ ՑՈՒՅՑ ՏԱԼ՚

ԴԱՎԻԹ ՍԱՖԱՐՅԱՆ. ՙԿՈՒԶԵԻ ՄԻԱՅՆ ԼԱՎ ՊԱՅՔԱՐ ՑՈՒՅՑ ՏԱԼ՚

Վաղը ազատ ոճի հայ ըմբիշները հավաքականի գլխավոր մարզիչ Արայիկ Բաղդադյանի գլխավորությամբ ելույթ կունենան Սասարիում կայանալիք միջազգային մրցաշարում: Հայաստանն այնտեղ ներկայացնելու են Գարիկ Բարսեղյանը (55 կգ), Վոլոդյա Ֆրանգուլյանը (60 կգ), Դավիթ Սաֆարյանը (65 կգ), Գրիգոր Գրիգորյանը (70 կգ), Մուսա Մուրթազալիեւը (86 կգ) ու Էդգար Ենոքյանը (97 կգ): Իր մարզավիճակի, սպասելիքների եւ առաջիկա ծրագրերի մասին ՙԻրավունքը՚ զրուցեց շարք վերադարձած աշխարհի եւ Եվրոպայի չեմպիոն Դավիթ Սաֆարյանի հետ, ով վնասվածքի պատճառով բաց էր թողել Եվրոպայի այս տարվա առաջնությունը:

-Որքանո"վ եք պատրաստ այս մրցաշարին եւ ինչպե"ս եք գնահատում Ձեր մարզավիճակը:
- Աշխարհի առաջնությունից հետո ես մասնակցել եմ միայն մեկ մրցաշարի, որտեղ առաջին իսկ բռնվածքից հետո, որում ի դեպ հաղթեցի, ստիպված եղա մրցապայքարից դուրս գալ:

Երկար ժամանակ է մրցաշարերի չեմ մասնակցել, ուստի ինձ համար էլ է հետաքրքիր, թե ինչպես կզգամ ինձ: Մարզումներն անցնում են, ինչպես որ պլանավորել էինք, ինձ լավ եմ զգում, բայց կարեւոր է նշել, որ մարզումներն այլ բան են, իսկ մրցաշարերը` բոլորովին այլ:
- Իսկ ի"նչ սպասելիքներ ունեք այս մրցաշարից:
- Սա առաջին մրցաշարն է մեծ դադարից հետո, եւ ես չէի ցանկանա որեւէ կանխատեսումներ անել: Կուզեի միայն լավ պայքար ցույց տալ:
- Ինչ նպատակներ ու ծրագրեր ունեք` այս տարվա հետ կապված:
- Գլխավոր նպատակս Աշխարհի առաջնությունում հաջող հանդես գալն է, ինչի համար էլ թիմի մարզիչ Արայիկ Բաղդադյանն արդեն պատրաստել է մարզումների ծրագիրը` առաջիկա ամիսների համար:

ՔՐԻՍՏԻՆԵ ՊԵՏՐՈՍՅԱՆ