ՄԱՐԱԾ ՇՈՈՒ-ԲԻԶՆԵՍԻ ՎԵՐՋԻՆ ՀՈՒՅՍԸ

ՄԱՐԱԾ ՇՈՈՒ-ԲԻԶՆԵՍԻ ՎԵՐՋԻՆ ՀՈՒՅՍԸ

Այն, որ հայկական շոու-բիզնեսում ամեն ինչ տակն ու վրա է եղել, դա միանշանակ է ու գնալով այն հերթով ապացուցվում է: Շոուբիզնեսյան աստղերը կարծես վերջին շրջանում մոռացել են, որ իրենց հիմնական առաքելությունը երգելն է, մնացածն արդեն հանդիսատեսը կորոշի: Հիմա նրանցից շատերը կասեն` սպասեք, երգելը երգել, բա մեր PR-ն ով եւ ինչպես կապահովի, չէ որ երգելով ու հնարավոր բոլոր տարբերակներով մեզ PR-ել ենք: Այ, հենց դա է բերել այսօրվան` շոուբիզնեսյան լճացման, ինչի արդյունքում` ագրեսիան է իշխում շոու-բիզնեսում:
Վերջին շրջանում հաճախ են շոուբիզնեսյան աստղերը միմյանց հանդեպ ՙշռայլ՚ գտնվում, հիշում միմյանց թերություններն ու բարձրաձայնելով կամ բացահայտելով` դրանք հանրության քննարկման առարկա դարձնում, եւ վերջ. երազած PR-ն ապահովված է դիմացինին ոտնատակ անելու հաշվին: Ոչինչ, ինչպես ասում են` դա էլ հո լավ օրից չէ... Բայց, սպասեք, այս ամենը ցավոք միայն շոուբիզնեսյան աստղիկներով չի սահմանափակվում, խնդիրն այն է, որ ասպարեզում կան լավ էլ PR-շիկներ, որ նույնիսկ մերձավորի ու սեփական դժբախտությունը հանրայնացնելով չեն թողնում, որ իրենց գոյության մասին մոռանան նույնիսկ Հայաստանից շատ հեռու բնակվելով: Դե, տերդ մեռնի գիտություն, ինտերնետն ինչ հզոր բան է... Բայց այդ ՙհզորության՚ շնորհիվ PR-շիկներն ու աստղիկները թունավորում են հանրության կյանքը ու առիթից օգտվելով` ՙանգին գոհարներ՚ շռայլում միմյանց հասցեին` էլ քաչալ շուն, էլ գող փիսո անվանարկումներով... հետո էլ պարծենում, թե չեն պատրաստվում միմյանց ՙպոռտը՚ տեղը դնել...
Այնպես որ, ուրիշի անհաջող ելույթների, լուսանկարների եւ պահվածքի մասին բղավելուց առաջ մի պահ շրջվեք եւ ինքներդ ձեզ տեսեք հայելու մեջ` գուցե դա ավելի± սարսափելի է:

Կույտը մշակեց ԼԻԼԻԹ ԵՂԻԱԶԱՐՅԱՆԸ