ԿՀՆՉԵՆ ՀՐԵԱ ԿՈՄՊՈԶԻՏՈՐՆԵՐԻ ՍՏԵՂԾԱԳՈՐԾՈՒԹՅՈՒՆՆԵՐ

ԿՀՆՉԵՆ ՀՐԵԱ ԿՈՄՊՈԶԻՏՈՐՆԵՐԻ ՍՏԵՂԾԱԳՈՐԾՈՒԹՅՈՒՆՆԵՐ

Այսօր` մայիսի 27-ին, Հայաստանի ազգային պատկերասրահի Որմնանկարների սրահում կկայանա «Հայ-հրեական երաժշտական խաչմերուկներ» խորագիրը կրող համերգ: Այդ մասին «Իրավունքը» տեղեկացավ «Ազգային Պատկերասրահ» միջազգային երաժշտական փառատոնի մամուլի ծառայությունից: Բազմաթիվ միջազգային մրցույթների դափնեկիր և հաղթող  դաշնակահար, ՀՀ վաստակավոր արտիստ  Հայկ Մելիքյանի կատարմամբ կհնչեն հրեա ժամանակակից կոմպոզիտորներ Վիլլի Վայների, Բենյամին Յուսուպովի, Այալ Ադլերի, Գյորգի Կուրտագի, Ամոս Էլկանայի ստեղծագործությունները: Համերգի հատուկ հյուրն է կոմպոզիտոր, ՀՀ արվեստի վաստակավոր գործիչ Վիլլի Վայները:

Հայկ Մելիքյանը համաշխարհային ունկնդրի և քննադատների կողմից  ճանաչված է որպես Հայաստանի առաջատար երաժիշտներից մեկը, ով իր վառ երևակայությամբ և վիրտուոզ կատարողականությամբ մեր օրերի համաշխարհային դաշնամուրային արվեստում զբաղեցրել է իր եզակի հարթակը: Նա ակտիվ համերգային գործունեություն է վարում Եվրոպայի, Ասիայի, Հյուսիսային և Հարավային Ամերիկաների բազում երկրներում:

2000-ին Հռոմում կայացած “Premio Valentino Bucchi”  20-րդ դարի և ժամանակակից երաժշտության միջազգային դաշնամուրային մրցույթում 2-րդ մրցանակին արժանանալուց հետո, ժամանակակից երաժշտությունը զբաղեցրեց նրա նվագացանկի գերակշիռ չափաբաժինը: Հայկ Մելիքյանը հայ և օտարազգի շատ կոմպոզիտորների ստեղծագործությունների առաջին կատարողն է, որոնցից շատերը հատուկ գրվել են նրա համար:  Աշխարհի տարբեր երկրներում Հայկ Մելիքյանը պարբերաբար վարում է ժամանակակից երաժշտության վարպետության դասեր:

Վ. ՄՈՒՐԱԴՅԱՆ