Էնդոկրինոլոգ. «ՎԱՀԱՆԱՁԵՎ ԳԵՂՁԸ ՄԱՐԴՈՒ ՕՐԳԱՆԻԶՄՈՒՄ ԽՄԲԱՎԱՐԻ ԴԵՐ Է ՏԱՆՈՒՄ»

Էնդոկրինոլոգ. «ՎԱՀԱՆԱՁԵՎ ԳԵՂՁԸ ՄԱՐԴՈՒ ՕՐԳԱՆԻԶՄՈՒՄ  ԽՄԲԱՎԱՐԻ ԴԵՐ Է ՏԱՆՈՒՄ»

Վահանաձեւ գեղձի հիվանդությունները Հայաստանում բավական տարածված են:  Այդ մասին այսօր «Ազդակ» լրագրողական ակումբում ասաց էնդոկրինոլոգ ԲԱՄԻՆԵ ԲԱՂՐԱՄՅԱՆԸ:

«Վերջին տարիներին ավելացել են վահանաձեւ գեղձի հիվանդությունների քանակը: Դա, իհարկե, բացատրվում է  նաեւ այն հանգամանքով, որ  բնակչությունը, բժիշկները ավելի ուշադիր, զգոն են դարձել այս խնդրի վերաբերյալ. մարդիկ ավելի հաճախակի են հետազոտվում»,- շեշտեց բժշկուհին:

«Իրավունքի» հարցին, թե հատկապես, որ շրջանում է ավելի տարածված վահանաձեւ գեղձի հիվանդությունները, Բ. Բաղրամյանը հետեւյալ կերպ արձագանքեց. «Ավելի շատ երիտասարդ ակտիվ կյանք վարող մարդկանց շրջանում:  Վահանաձեւ գեղձի պատճառ կարող են հանդիսանալ` սթրեսները, քրոնիկ հիվանդությունները, կանանց համար` հղիությունը,  ծննդաբերությունը, ինչպես նաեւ կլիմակտերիկ շրջանը նաեւ սեռահասունացման տարիքը»:

Բ. Բաղրամյանը նկատեց, որ կանանց մոտ ավելի հաճախակի են հանդիպում վահանաձեւ գեղձի հետ կապված հիվանդությունները, քան տղամարդկանց մոտ:

Բժշկուհին շեշտեց, որ վահանաձեւ գեղձը բավական կարեւոր օրգան է: Այն մեծ դեր է կատարում օրգանիզմում: «Ասել, թե վահանաձեւ գեղձի հիվանդությունն, որ օրգան համակարգի վրա կարող է ազդել, հնարավոր չէ: Մարդու օրգանիզմում վահանաձեւ գեղձը խմբավարի դեր է տանում: Այն, կարծես, չափ է տալիս այլ օրգան-համակարգերին, որպեսզի համահունչ լինի աշխատանքը»:

Վահանաձեւ գեղձի հիվանդություն ունեցող անհատներին բժշկուհին խորհուրդ է տալիս օգտագործել յոդով հարուստ սննդամթերք. ցանկացած ծովային մթերք:

Վ. ՄՈՒՐԱԴՅԱՆ