«ՊԱՇՏՈՆՅԱ ԲԱՐԵԿԱՄ ՈՒՆԵՆԱԼ ՉԻ ՆՇԱՆԱԿՈՒՄ, ՈՐ ՊԵՏՔ Է ԳՈՐԾԱՐԱՐՆԵՐԸ ՕԳՏՎԵՆ ԱՅԴ ԲԱՐԵԿԱՄԻ ՊԱՇՏՈՆԻՑ»

ՀՀ վարչապետ. «ՊԱՇՏՈՆՅԱ ԲԱՐԵԿԱՄ ՈՒՆԵՆԱԼ ՉԻ ՆՇԱՆԱԿՈՒՄ, ՈՐ ՊԵՏՔ Է ԳՈՐԾԱՐԱՐՆԵՐԸ ՕԳՏՎԵՆ ԱՅԴ ԲԱՐԵԿԱՄԻ ՊԱՇՏՈՆԻՑ»

Այսօր տեղի ունեցած ՀՀԿ 15-րդ համագումարի ժամանակ, մինչ կժամաներ ՀՀ նախագահ Սերժ Սարգսյանը, լրագրողների հետ զրույցում մի շարք հարցերի պատասխաններ տվեց ՀՀ վարչապետ ՀՈՎԻԿ ԱԲՐԱՀԱՄՅԱՆԸ` մասնավորապես անդրադառնալով գործարար պաշտոնյաներին հարկային դաշտ բերելու իր որոշմանը:

- Պարոն վարչապետ, հաջողվե՞ց  գտնել գործարար պաշտոնյաների:

- Գտնողը դուք պետք է լինեք: Ես, իհարկե, չեմ փնտրելու եւ նաեւ ակնկալում եմ ձեր աջակցությունը: Նորից ուզում եմ կրկնել իմ տեսակետը` որեւէ նախարար իրավունք չունի գործարարությամբ զբաղվելու: Եթե կան դեպքեր, մատնանշեք:

- Իսկ երբ ոչ թե կոնկրետ պաշտոնյան է զբաղվում գործարարությամբ, այլ իր բարեկամը…

- Եթե պաշտոնյայի բարեկամը զբաղվում է գործարարությամբ, այստեղ պետք է տարանջատել, թե ինչու բիզնես ունի: Պաշտոնյա բարեկամ ունենալը չի նշանակում, որ պետք է օգտվեն այդ բարեկամի պաշտոնից եւ հարկային դաշտում չայտնվեն: Օրինակ, ես դատապարտում եմ այն պաշտոնյային, ում որդին, ում բարեկամը կօգտվի իր բարկամի պաշտոնից եւ հարկային դաշտում չի հայտնվի: Դրա համար հանձնարարել եմ, որ հատուկ ուշադրություն դարձնեն այն բոլոր նախարարների, ընդհանրապես պաշտոնյաների բարեկամներին, ովքեր զբաղվում են բիզնեսով եւ հետաքրքրվեն` հարկերը վճարո՞ւմ են, թե՞` ոչ: Եվ դա մենք անելու ենք, ինչպես ասել եմ, սկսելով մեր մերձավորներից, առաջինը` իմ: Միշտ հարց են տալիս, թե ինչու, որովհետեւ իմ եղբայրը զբաղվում է գործարարությամբ, թող գնան ստուգեն, հարկերը վճարո՞ւմ է: Հետեւաբար, եթե վարչապետի եղբայրը ներկայացնում է, ապա պարտավոր են նախարարներն էլ, բոլորն էլ ներկայացնել:

- Իսկ ինչո՞ւ մինչ այս ստուգումներ չեն կատարվել:

-Ես «մինչեւ այս»-ի մասին չեմ խոսում, այլ խոսում եմ մեր պայմանավորվածությունների մասին: Հիմա ամեն կառավարություն, ամեն վարչապետ իր մոտեցումներն ունի: Միշտ էլ արվել է, յուրաքանչյուր լրատվութուն, մամուլի հայտարարություն, տեղեկատվություն ստուգվել է: Ուղղակի, ես ակնհայտ Ազգային ժողովում տեսա, որ պատգամավորներ կան, որոնք անհիմն հայտարարություններ են անում, թե իբր ես հանդիպման ժամանակ գործարարներին ասել եմ`գոնե 90 տոկոսով եկեք հարկային դաշտ, 10-ը` ոչ: Նման հայտարարություն չի եղել, պարզապես, փաստերը աղավաղում են: Եվ ես դա դիտարկում եմ խառնաշփոթ ստեղծելու միտում:

- Ասում են` Ձեր եւ գործարարների հանդիպման ժամանակ պաշտոնյաներից մեկն ասել է, որ եթե բոլորը օրենքով աշխատեն, ինքն էլ օրենքով կաշխատի:

- Այո, ասել է Սամվել Ալեքսանյանը, քանի որ բոլորը իրեն մատնանշում են: Ես նաեւ գնահատում եմ իր անկեղծությունը: Նա հայտարարեց, որ ինքը պատրաստ է դառնալ օրինակ, եթե բոլորը աշխատեն հարկային դաշտում:

- Այնուամենայնիվ, ի՞նչ փուլում է պաշտոնյա գործարարներին հարկային դաշտ բերելու գործընթացը:

- Հիմա ֆինանսների նախարարությունը հանդիպումներ է ունենում բոլոր գործարարների ներկայացուցիչների հետ եւ փորձում են նաեւ իրենց տեսակետները, դիտողությունները, առաջարկությունները հաշվի առնել: Մենք ուզում ենք լինել իրենց մեջ, հասկանալ, թե օբյեկտիվ խնդիրը որն է, որպեսզի դրանք վերացնենք եւ ոչ թե վարչարարական մոթոդով ասենք` պիտի տաք եւ այլն: Դա ինձ համար շատ կարեւոր է, որ մենք մուրճի տարբերակով չգնանք առաջ, այլ հակառակը, իրենց հետ խոսենք, շփվենք, համագործակցենք: Եվ իմ կարծիքով սա շատ ճիշտ տեսակետ է, որպեսզի որոշում կայացնենք եւ այդ որոշմանը նորից անդրադառնալու կարիք չլինի:

ՀՐԱՆՏ ՍԱՐԱՖՅԱՆ