ՀՀԿ ԳՈՐԾԱԴԻՐ ՄԱՐՄՆՈՒՄ ՏԻԳՐԱՆ ՍԱՐԳՍՅԱՆԻՆ ՓՈԽԱՐԻՆԵՑ ՎԱՀՐԱՄ ԲԱՂԴԱՍԱՐՅԱՆԸ

ՀՀԿ ԳՈՐԾԱԴԻՐ ՄԱՐՄՆՈՒՄ ՏԻԳՐԱՆ ՍԱՐԳՍՅԱՆԻՆ ՓՈԽԱՐԻՆԵՑ ՎԱՀՐԱՄ ԲԱՂԴԱՍԱՐՅԱՆԸ

Կայացավ ՀՀԿ 15-րդ համագումարը, որին նախնական տվյալներով ներկա էին 1808 պատվիրակություններից 1728-ը, որը ընտրված պատվիրակների 2/3-ն է կազմում: Համագումարի օրակարգում ՀՀԿ նախագահի եւ ՀՀԿ վերստուգիչ հանձնաժողովի հաշվետվությունից հետո սպասվում էր ՀՀԿ նախագահի ընտրությունը, ինչի արդյունքում բաց քվեարկությամբ եւ միաձայն վերընտրվեց ներկայացված միակ թեկնածուն` ՀՀ նախագահ, Հայաստանի Հանրապետական կուսակցության ղեկավար ՍԵՐԺ ՍԱՐԳՍՅԱՆԸ: ՀՀԿ նախագահի ընտրությանը հաջորդեց ՀՀԿ գործադիր մարմնի անդամների ընտրությունը, որտեղ որոշակի փոփոխություն եղավ: ՀՀ նախագահ Ս. Սարգսյանը նախ առաջարկեց ներկաներին առաջարկներով հանդես գալ` ՀՀԿ գործադիր մարմնի անդամների ընտրության հետ կապված, ապա հրապարակեց. «Ինձ մոտ հետեւյալ ցուցակն է. քանի որ ինձ արդեն ընտրեցիք ՀՀԿ նախագահ, ցուցակում առաջինը ես եմ, այնուհետեւ Գալուստ Սահակյանը, Հովիկ Աբրահամյանը, Արմեն Աշոտյանը, Կարեն Ավագյանը, Վահրամ Բաղդասարյանը, Գագիկ Բեգլարյանը, Դերենիկ Դումանյանը, Ռազմիկ Զոհրաբյանը, Գուրգեն Թադեւոսյանը, Մուշեղ Մարգարյանը, Կարեն Կարապետյանը, Հրանուշ Հակոբյանը, Դավիթ Հարությունյանը, Տարոն Մարգարյանը, Գագիկ Մինասյանը, Հերմինե Նաղդալյանը, Սամվել Նիկոյանը, Էդուարդ Շարմազանովը: Ինչպես նկատեցիք, ընդամենը մեկ փոփոխություն է առաջարկվում: Նախկին վարչապետ Տիգրան Սարգսյանը, ինչպես բոլորին հայտնի է, անցնում է դիվանագիտական ծառայության, հետեւաբար երկրում չի լինելու, ուստի` նպատակահարմար գտանք, որ այս փուլում Տիգրան Սարգսյանը ՀՀԿ գործադիր մարմինը թողնի եւ լինի մեր խորհրդի կազմում: Եվ նրա փոխարեն մենք առաջարկում ենք, որպեսզի գործադիր մարմնի անդամ ընտրվի Ազգային ժողովում Հայաստանի Հանրապետական կուսակցության խմբակցության ղեկավար Վահրամ Բաղդասարյանը»:

Այս ընտրությունն էլ կայացավ բաց քվեարկությամբ եւ ընդունվեց միաձայն:

Ի դեպ, նշենք, որ  համագումարին ներկա էին երկրի գլխավոր դեմքերը` ՀՀ նախագահը, ՀՀ վարչապետ Հովիկ Աբրահամյանը, ԱԺ նախագահ Գալուստ Սահակյանը: Հավելենք նաեւ, որ բացի նոր կառավարության ներկայացուցիչներից, համագումարին ներկա էին նաեւ հին կառավարության ներկայացուցիչները` ՀՀ նախկին վարչապետ Տիգրան Սարգսյանի գլխավորությամբ:

ՀՐԱՆՏ ՍԱՐԱՖՅԱՆ