ՎԵՐՋԻՆ ԶԱՆԳԻ ՂՈՂԱՆՋՆԵՐԸ ՀՆՉԵՑԻՆ ՆԱԵՎ ՀԱՅՏՆԻՆԵՐԻ ՏԱՆԸ

ՎԵՐՋԻՆ ԶԱՆԳԻ ՂՈՂԱՆՋՆԵՐԸ ՀՆՉԵՑԻՆ ՆԱԵՎ ՀԱՅՏՆԻՆԵՐԻ ՏԱՆԸ

Ամեն անգամ Վերջին զանգն առանձնահատուկ հուշեր է արթնացնում յուրաքանչյուրի մոտ, այդ հուշերն ու զգացողությունները ծնողի համար կրկնապատկվում են, երբ հատկապես շրջանավարտ են դառնում երեխաները կամ էլ մտերիմ անձնավորությունը:

Այսօր այդ զգացողություններով պարուրված էին նաեւ հայտնիները.

Հակոբ Պարոնյանի անվան երաժշտական կոմեդիայի թատրոնի դերասանուհի ԶԱՐՈՒՀԻ ԽԱՉԱՏՐՅԱՆԻ որդին` Գրիգորը, նույնպես շրջանավարտ է: Դերասանուհին որդուն շնորհավորելով նման բարեմաղթանք է հղել. «Շնորհավոր, անուշ տղաս, կյանք մտնելով `միշտ մնա ազնիվ , արդար, շիտակ, ինչպես կաս, միշտ հիշիր, որ դու ունես ամուր հենարան` դա քո ընտանիքն է, Աստված պահապան»:

ՀՀ Վաստակավոր արտիստ, դուդուկահար ԿԱՄՈ ՍԵՅՐԱՆՅԱՆԻ որդին` Լեւոնը եւս, շատ աշակերտների նման, այսօր նշեց իր Վերջին զանգը: Կամո Սեյրանյանը շրջանավարտներին` այդ թվում նաեւ իր որդուն, երկու կատարումով շնորհավորեց Ազատության հրապարակում կայացած համերգի ընթացքում:

Երգչուհի ԱՆԱՀԻՏ ՇԱՀԲԱԶՅԱՆԻ քույրը` Արմինեն, եւս մտավ նոր կյանք` վերջինզանգյան ղողանջների հնչյուններից հետո: Երգչուհին` ի դեմս Արմինեի, շնորհավորելով բոլոր շրջանավարտներին իր ֆեյսբուքյան էջում գրել է. «Սիրելի շրջանավարտներ ու իմ անուշ փոքրիկ քույրիկ, Արմին, սրտանց շնորհավորում եմ Վերջին զանգի կապակցությամբ: Թող որ յուրաքանչյուրիդ սրտի նվիրական երազանքները իրականություն դառնան»:

Դերասան ԱՇՈՏ ՄԵԼՈՅԱՆԻ եւ դերասանուհի ՄԱՐԻ ԳՐԻԳՈՐՅԱՆԻ դուստրը նույնպես այս տարվա շրջանավարտ էր, սակայն դերասանների ընտանիքում մեծացած աղջնակն իննամյա կրթությունն ավարտելուց հետո, ոչ թե գնալու է ավագ դպրոց` շատերի նման, այլ Թերլեմեզյանի անվան ուսումնարան:

Դե ինչ, «Իրավունքը» նույնպես շնորհավորելով շրջանավարտներին, մաղթում է, որ հաստատուն քայլերով մուտք գործեն նոր կյանք, քանի որ ապագան իրենցն է ու իրենք են հենց վաղվա Հայաստանի տերերը:

ԼԻԼԻԹ ԵՂԻԱԶԱՐՅԱՆ