Գրիգոր Կյոկչյան. «ՎԵՐՋԻՆ ԶԱՆԳԻՍ ԻՍԿԱՊԵՍ ՈՒՐԱԽ ԵՄ ԵՂԵԼ ԵՎ ԳԻՆՈՎՑԱԾ»

Գրիգոր Կյոկչյան. «ՎԵՐՋԻՆ ԶԱՆԳԻՍ ԻՍԿԱՊԵՍ ՈՒՐԱԽ ԵՄ ԵՂԵԼ ԵՎ ԳԻՆՈՎՑԱԾ»

Ազատության հրապարակում կայացավ վերջինզանգյան ավանդական համերգը: Շրջանավարտներին շնորհավորելու էին եկել երգիչ-երգիչուհիներ, որոնք իրենց կատարումներով էլ ավելի տոնական դարձրեցին կյանքի նոր փուլ մտած երիտասարդների ամենահիշարժան օրը: Ի դեպ, օրը կրկնակի տոն էր երգիչ ԳՐԻԳՈՐ ԿՅՈԿՉՅԱՆԻ համար, ով ուղիղ 10-ը տարի առաջ տոնում էր իր «Վերջին զանգը»: Ինչպես «Իրավունքի» հետ զրույցում նշեց Գ. Կյոկչյանը, պատահական է հիշել, որ ուղիղ 10-ը տարի առաջ է ավարտել դպրոցը.

- Հիշում եմ, թե ինչքան մտազբաղ էի այդ օրը, ինչերի մասին էի երազում ու կյանքը ինչեր փոխեց: Բայց, համենայն դեպս, չփոխեց դեպի վատը, այլ ավելի հետաքրքիր ուղիով ընթացավ: Այս պահին հիշում եմ միայն այն, որ պատրաստվում էի ընդունվել եւ ոչ թե ինձ համար գլխավորը «Վերջին զանգն» էր, այլ անվճար ընդունվելը, ինչը ինձ մոտ ստացվեց:

- Իսկ ինչպե՞ս ես տոնել քո «Վերջին զանգը»:

- Տոնել եմ ինչպես բոլորը , իսկապես ուրախ եմ եղել եւ գինովցած:

-10 տարի անց սերունդը շա՞տ է փոխվել:

- Փոխվել է թե՛ լավ, եւ թե՛ վատ առումներով: Լավ է այն առումով, որ շատ ավելի ինֆորմացված են, քան մենք էինք, իսկ վատ է այն, որ ինֆորմացվում են զուտ համացանցից եւ ոչ թե գրականությունից: Իսկ առհասարակ լավ կորիզը ե՛ւ մեր ժամանակ կար, ե՛ւ հիմա կա: Չի կարելի ասել, որ դեգրադացած է սերունդը:

- Այսօր դասընկերների հետ կապ պաշտպանո՞ւմ ես:

- Դասընկերներիցս մոտ եմ երեքի հետ եւ նրանց հետ հաճախ եմ հանդիպում: Արդեն ընտանիքներով ենք մտերիմ, թեպետ ես դեռ ամուսնացած չեմ: Ի դեպ, պատրաստվում ենք 10-ամյակի հետ կապված դասարանով հավաքվել: Բայց ես մեկնում եմ Միացյալ նահանգներ ու հուսով եմ այնպիսի օր կընտրենք, որ կկարողանամ մասնակցել:

- Երբեմն ուսուցիչներիդ այցելո՞ւմ ես:

- Հազվադեպ եմ հանդիպում ուսուցիչներիս: Բայց, երբ գնում եմ դպրոց, իսկապես հասկանում եմ, որ նրանց սիրել եմ: Ընդհանրապես շատ եմ սիրել դպրոցը եւ ամեն անգամ դպրոց մտնելիս անկախ ինձնից հուզվում եւ արտասվում եմ: Շատ հաճելի զգացողություն է դպրոցական տարիների հուշերը կրկին վերապրելը:

- Ի՞նչ կմաղթես այս տարվա շրջանավարտներին, ովքեր իրենց կյանքի առաջին փուլը հաղթահարելով` դեռ վայելում են վերջինզանգյան միջոցառումները:

- Կմաղթեմ, որ իրենց գլխավոր նպատակը լինի սովորելը, որովհետեւ եթե առաջիկա 5 տարիներին լավ կրթություն ստանան, հետո ողջ կյանքում կվայելեն: Իսկ եթե առաջիկա 5 տարիները վայելեն , ապա հետո ողջ կյանքում կնեղվեն:

ՀՐԱՆՏ ՍԱՐԱՖՅԱՆ