ՙՀԱՄԱԼԻՐԻ ՇԵՆՔԸ` ԱՃՈՒՐԴԻ. ՄՏԱՎՈՐԱԿԱՆՆԵՐԸ ՄՏԱՀՈԳՎԱԾ ԵՆ

ՀԱՄԱԼԻՐԻ ՇԵՆՔԸ` ԱՃՈՒՐԴԻ.
ՄՏԱՎՈՐԱԿԱՆՆԵՐԸ ՄՏԱՀՈԳՎԱԾ ԵՆ

Աճուրդի է հանվել Կարեն Դեմիրճյանի անվան մարզահամերգային համալիրի շենքը: Նման դեպքերը կարծես մեր երկրում արդեն սովորական են դարձել, հասարակության մի մասը փորձում է անտարբեր ձեւանալ, մի մասն էլ` ցավում է, որ Հայաստանի խորհրդանիշներից եւ պատմական արժեքներից մեկը հնարավոր է շուտով կորցնի իր արժեքը: Տարիներ առաջ շենքը վաճառվել էր ռուսական ՙԲԱՄՈ՚ ընկերությանը, որի թեթեւ ձեռքով էլ այժմ  շինությունը հայտնվել է աճուրդի ՙզոհասեղանին՚, իսկ թե հետագայում ո±վ կլինի շենքի սեփականատերը ու ինչ նպատակների կծառայի, դեռեւս անհայտ է: Չի բացառվում, որ օրերից մի օր շենքի անունը փոխվի եւ այն ծառայի բոլորովին այլ նպատակների:
Համալիրի շենքի ճակատագրով մտահոգված են նաեւ մտավորականները.
ՀՀ ճարտարապետների միության նախագահ ՄԿՐՏԻՉ ՄԻՆԱՍՅԱՆ-  Սա ամբողջ աշխարհում ընդունված տարբերակ է, դեմ չեմ այդ ամենին, միայն մեկ պայմանով` շենքի վաճառքը իրականացվի օրինական եւ կանոնավոր ձեւով: Եթե շենքը պետք է վաճառվի առանց պայմանագրի եւ ապօրինի, իհարկե` այս ամենը կհանգեցնի վատ հետեւանքերի:
Ռեժիսոր ԱՐՇԱԿ ԶԱՔԱՐՅԱՆ- Ես արդեն անտարբեր եմ դարձել քարերի նկատմամբ, երբ տեսնում եմ, թե ինչպես է դատարկվում երկիրը, եւ այդ շինություններն ստեղծողները մեկը մյուսի հետեւից գնում են երկրից: Ավելի շատ ցավում եմ, որ աճուրդի են հանվել մարդկային արժեքները, եւ բոլորն արտագաղթում են: Ես շենքերը չեմ կարեւորում, այն դեպքում, երբ կա ավելի վտանգավոր հանգամանք` նման արժեքավոր կոթողներ ստեղծողները Հայաստանից գնում են: Եթե այսպես պետք է հայաթափվի իմ երկիրը, պարզ է, որ օտարները կգան ու իրենց տան տեր կզգան: Հայը արժեք է, գնալով մենք կորցնում ենք այդ արժեքը: Ես բոլորին մեկ հարց եմ տալիս` կուզեի±ք Սանահինի վանքը քանդվեր, բայց բոլոր հայերը վերադառնային Հայրենիք, այս հարցին բոլորը միանշանակ ասում են` այո: Ցավոտ հարց է, բայց` փաստ: Անկուշտ տերերը իրենց պահանջները բավարարելու եւ գրպանները լցնելու համար վաճառքի են հանում մարդկանց ունեցվածքը, չէ± որ սա մեր ունեցվածքն է:
Ռեժիսոր, մուլտիպլիկատոր ԴԱՎԻԹ ՍԱՀԱԿՅԱՆՑ- Ժամանակին շենքն արդեն մեկ անգամ վաճառվել է, իմ կարծիքով սխալը թուլ է տրվել հենց այդ ժամանակ: Այսօր արդեն ՙԲԱՄՈՆ՚ է այն վաճառում, եւ որեւէ բան անել ըստ իս` հնարավոր չէ: Ամեն ինչ պետք է արվեր ի սկզբանե: Ամբողջ աշխարհում սա ընդունված փորձ է, որ ամեն ինչ անցնում է սեփականատերերի ձեռքը, սակայն մեր պարագայում պետք է ավելի զգույշ վարվել: Հայաստանում սեփականաշնորհվել է գրեթե ամեն ինչ, քանի որ մարդկանց գումարը իրենց չի գոհացնում եւ ձգտում են ավելի շատ ունենալ, այս ամենը ժլատության արդյունք է: Ամեն ինչ միայն գումարի եւ գումար վաստակելու համար է արվում:

Ներկայացրեց ԶՎԱՐԹ ԽԱՉԱՏՐՅԱՆԸ