ՉԻՉԽԱՆԻ ՅՈՒՂՆ ՕԳՏԱԿԱՐ Է, ԻՍԿ ՍԱՌՈՒՅՑԸ` ՈՉ

ՉԻՉԽԱՆԻ ՅՈՒՂՆ ՕԳՏԱԿԱՐ Է, ԻՍԿ ՍԱՌՈՒՅՑԸ` ՈՉ

- Հղի եմ, ունեմ թութքի խնդիր: Համացանցում կարդացել եմ, որ բարերար ազդեցություն ունի չիչխանի յուղը, ճի՞շտ է: Մեկ այլ աղբյուրի համաձայն էլ ցավերը մեղմելու համար պետք է սառույցով շփումներ անել, կարելի՞ է:

Հարցին պատասխանում է Մոր եւ մանկան առողջության պահպանման գիտահետազոտական կենտրոնի մանկաբարձ-գինեկոլոգ ԱՐՄԵՆ ԲԱԴԱԼՅԱՆԸ:

- Հղի կանանց շրջանում այն հաճախ հանդիպող խնդիր է: Հատկապես` կրկնածին կանանց շրջանում: Առաջնածինների մոտ` անհամեմատ քիչ է: Մեծ նշանակություն ունի այս հարցում նաեւ տարիքը: Օրինակ` 20 տարեկանների մոտ թութքը 3-4 անգամ ավելի պակաս հանդիպող խնդիր է, քան 30 եւ ավելի բարձր տարիքի կանանց մոտ:
Հղիների մոտ թութքը երբեմն կարող է անախտանիշ ընթացք ունենալ. երբ  արտաքին հեմորոիդալ հանգույցներ չկան, առկա են միայն ներքին հեմորոիդալ հանգույցները: Ուստի, գինեկոլոգը պետք է ժամանակին նկատի խնդիրը եւ ախտորոշի: Սակայն գինեկոլոգի խորհրդատվությունից բացի, նման խնդիր ունեցող հղի կինը պետք է նաեւ պրոկտոլոգի հսկողության տակ լինի: Հղի կանանց թութքը կարող է անհանգստացնել հղիության 2-րդ եւ 3-րդ եռամսյակներում, երբ մեծանում են արգանդի չափերը. փոքր կոնքի խոռոչի երակներում նկատվում է արյան շրջանառության կանգ: Խնդիրներ կարող են առաջանալ նաեւ ծննդաբերության ժամանակ (երկրորդ շրջան` ճիգերի ժամանակ)` սուր ցավեր, արյունահոսություն:
Նշենք, որ հղիության ընթացքում թութքի վիրահատություն կատարել չի թույլատրվում: Կինը վիրահատության պետք է գնա միայն ծննդաբերությունից հետո: Ինչ վերաբերում է չիչխանի յուղին, ապա, գուցե այն օգուտ է տալիս, ժողովրդի մեջ տարածված է շատ, թեպետ բժշկական ասպարեզում ընդունված է օգտագործել համապատասխան մոմիկներ, որոնք հղիների եւ կերակրող մայրերի համար անվնաս են, ունեն բավականին լավ ազդեցություն:
Մեծ նշանակություն ունի նաեւ պրոֆիլակտիկ միջոցների ճիշտ կիրառումը` թութքից խուսափելու համար: Առաջին հերթին հղի կինը պետք է կարգավորի օրվա սնունդը: Հարկ է սննդակարգի մեջ ներառել բուսական սնունդ: Այն բարելավում է աղիների աշխատանքը: Բարերար ազդեցություն ունի հատկապես ցորենի թեփը: Մարզանքը, քայլելը նույնպես դրական ազդեցություն կարող են ունենալ: Նստակյաց դիրքում երկարատեւ մնալը, ցանկալի չէ:

Հարցին պատասխանել է նաեւ բ.գ.թ., վիրաբույժ-կոլոպրոկտոլոգ, ԵՊԲՀ կոլոպրոկտոլոգիայի ամբիոնի
ասիստենտ ԿԱՐԵՆ ՇԱՀՆԱԶԱՐՅԱՆԸ.

- Թութքն, առհասարակ, հղիների համար վտանգ չի ներկայացնում, եթե, իհարկե, այն գտնվում է ՙհանգիստ՚ վիճակում: Հղի կանանց մոտ 50%-ը ունենում են թութքի խնդիր: Ուստի ամենից խուսափելու համար ճիշտ կլինի մինչեւ հղիությունը բոլոր կանայք լուծեն առաջացած խնդիրները: Այսինքն` դիմեն մասնագիտացված կլինիկա, բժիշկ պրոկտոլոգի օգնությանը, քանի որ հղիության ընթացքում շատ անգամ սրացումներ են նկատվում: Դա կախված է հղիության ընթացքի հետ, պտղի հետ, քանի որ այն մեծ է եւ սեղմում է անոթները, խախտում կոնքի արյան շրջանառությունը: Արդյունքում սկսում են բարդանալ գործընթացները: Ի դեպ, բոլոր զարգացած երկրներում կա օրենք, համաձայն որի` բոլոր հղիները պետք է պարտադիր այցելեն ատամնաբույժի եւ պրոկտոլոգի:
Ինչ վերաբերում է հղիների բուժմանը, ապա հղիությունը, ընդհանրապես, ծանր գործընթաց է համարվում ե°ւ պտղի, ե°ւ մոր համար: Նման դեպքերում մենք աշխատում ենք որեւէ ծայրահեղ միջոցներ չձեռնարկել: Սովորաբար նշանակում ենք կոնսերվատիվ բուժում, քանի որ մենք չենք կարող կանխատեսել, թե ինչպիսի ընթացք կունենա բուժումը. բոլոր տեսակի դեղորայքը հղիների համար հակացուցված է`մանավանդ հղիության առաջին եւ վերջին եռամսյակներում:
Ինչ վերաբերում է չիչխանի յուղին, ապա այն ընդհանրապես անվնաս է, օգտակար եւ չունի որեւէ հակացուցում: Սառույցով շփել խորհուրդ չի տրվում: Այն կարող է ուժեղացնել ցավերը, առաջացնել սպազմ: Նման էքստրեմալ միջոց կիրառելը հղիներին հակացուցված է:
Խորհուրդ ենք տալիս գոլ ջրով (ոչ սառը) լվացումներ կատարել, թրջոցներ դնել: Սրացման ընթացքում չպետք է օգտագործել զուգարանի թուղթ:
Ծննդաբերությունից (խոսքը բնական ճանապարհով ազատման մասին է) մոտ 40 օր հետո պետք է դիմել բժշկի եւ հեշտությամբ վերացնել խնդիրը: Գոյություն ունի, այսպես ասած, լազերային վիրահատության տարբերակը:

ՎԼԱԴ ՄՈՒՐԱԴՅԱՆ