ՙԱԿՑԻԱՅՈՎ ՍՆՆԴԱՄԹԵՐՔԸ՚ ՈՐԱԿՅԱԼ Է

ՙԱԿՑԻԱՅՈՎ ՍՆՆԴԱՄԹԵՐՔԸ՚ ՈՐԱԿՅԱԼ Է

Խանութներում, մասնավորապես` սուպերմարկետներում հաճախ են տեղի ունենում ակցիաներ, որոնց ժամանակ վաճառվում են զանազան ապրանքատեսակներ` հագուստ, սնունդ, մաքրման պարագաներ եւ այլն: Այն, որ այդ ժամանակ մարդիկ ավելի շատ են ապրանք գնում` անժխտելի է. սպառողը պարզապես չի կարող մատչելի գնով ձեռք բերել նույն ապրանքատեսակից միանգամից երկուսը կամ ավելին, եթե նույնիսկ այդ պահին գնում կատարելու միտք անգամ չուներ:
Գնային առումով սպառողի համար ակցիաները, անշուշտ, ձեռնտու են: Սակայն որքանով նա կարող է համոզված լինել, որ գնում է որակյալ ապրանք, որ այն, հատկապես սննդամթերքի պարագայում, պահպանման ժամկետի սպառվելու կամ որակական հարցերի հետ կապված չէ, որ էժանացրել ու փորձում են ամեն կերպ ՙնաղդել՚ մարդկանց վրա: Այս թեմայով  ՙԻրավունքը՚ զրուցեց  ՀՀ գյուղնախարարության սննդամթերքի անվտանգության պետական ծառայության աշխատակազմի ղեկավարի տեղակալ ԴԱՎԻԹ ՂՈՒԼՅԱՆԻ հետª պարզելու համար, թե որքանով է վերահսկվում ակցիաներով վաճառվող սննդամթերքը եւ, առհասարակ, շուկայում վաճառվող սննդամթերքի նկատմամբ ինչպիսին է վերահսկողությունը:
Մեր զրուցակցի խոսքով` իրենց ծառայությունը սննդամթերքի, պարենային ապրանքատեսակների նկատմամբ մշտական վերահսկողություն է իրականացնումª անկախ այն հանգամանքից, թե տվյալ ապրանքատեսակը ակցիայի տա±կ է,  թե ոչ:  Նա չժխտեց, որ վաճառակետերում ստուգումների ժամանակ հայտնաբերել են ժամկետանց ապրանքներ. ՙԵթե մենք հայտնաբերում ենք վտանգավոր ապրանք, որը վաճառվում է խանութում, մեր կողմից տրվում է հանձնարարական` հետ է կանչվում շուկայից եւ հրապարակվում է ամբողջ մամուլով` կասեցնելով արտադրության գործունեությունը: Այսպիսի վերահսկողություն կատարվում է Հայաստանի ողջ տարածքում` թե° փոքր խանութներում, թե° սուպերմարկետներում: Ստուգումներ օրենքով թույլատրվում է   անցկացնել տարեկան մեկ անգամ, սակայն անցկացնում ենք նաեւ ուսումնասիրություններ եւ դիտարկումներ, որոնք թույլ են տալիս վերահսկողություն իրականացնել: Ստացվում է, որ ստուգումը կարող է անցկացվել տարեկան մեկ անգամ, իսկ դիտարկումները կարող են լինել անգամ ամեն օր՚:
Սակայն ասել, թե շուկայից այս կամ այն ապրանքատեսակը ետ կանչելու մասին տեղեկատվություն հաճախակի ՙհրապարակվում է ամբողջ մամուլով՚, միամտություն կլիներ: Ավելի կոնկրետ, որքան փորձեցինք հիշել, հազիվ նման մեկ-երկու դեպք մտքներս եկավ, այն էլª երբեմն կասկածելի: Բայց ացել, թե մեր խանութները լցված են բացառապես որակյալ ապրանքներով, ծիծաղելի կլիներ:
Այսպիսովª մեր առաջին զրուցակցի ներկայացրած համակարգի աշխատանքի որակի հանդեպ լուրջ կասկածներ ունենալովª փորձեցինք ճշտել, թե  սպառողների շահերի պաշտպանությանը միտված հ/կ-ներն ինչ են մտածում: Հայաստանի սպառողների ազգային ակադեմիայի իրավաբանական անձանց միության եւ սպառողների ազգային ասոցիացիայի նախագահ  ՄԵԼԻՏԱ ՀԱԿՈԲՅԱՆՆ ՙԻրավունքի՚ հետ զրույցում փաստեց, որ իրենց շրջայցերի ժամանակ Նորքի սուպերմարկետներից մեկում հայտնաբերել են  խախտում`  ակցիայով  վաճառվող յոգուրտներն ուռած են եղել, թեեւ դրանք դեռ պիտանելիության ժամկետի մեջ էին: Մինչդեռ դրանցում կուտակված տոկսիկ նյութերի պատճառով վաճառքը պետք է բացառվեր: Սակայն այս ամենը սուպերմարկետի տնօրենին բացատրելուց հետո  միայն յոգուրտները հանվել են վաճառքից:
Իսկ ինչ վերաբերում է վաճառվող սննդի ընդհանուր որակին` Մելիտա Հակոբյանը հավաստիացրեց, որ շատ խանութներում կան ժամկետանց, ինչպես նաեւ անհայտ ծագմամբ ապրանքատեսակներ. ՙՀանդիպում են ապրանքատեսակներ, որոնց ծագումն անհայտ է: Օրինակª պիտակին  գրված է միայն հաց, իսկ թե ի±նչ հաց է, քանի± կիլոգրամ է` անհայտ է: Եղել են նաեւ դեպքեր, որ նույն խանութում առաջին անգամ հայտնաբերված վաճառքի ոչ ենթակա ապրանքատեսակի համար զգուշացրել ենք, սակայն հաջորդ անգամ կրկին բախվել ենք նույն խնդրին: Թեեւ կան նաեւ խանութներ, որտեղ առաջին զգուշացումից հետո տվյալ ապրանքը ընդհանրապես հանվել է վաճառքից՚:
Տիկին Հակոբյանը տեղեկացրեց նաեւ, որ  հաճախ անորակ են եւ ՙճմռթված՚ տուփերով են սպառողին հասնում պահածոյացված ձկնային  ապրանքատեսակները: Բացի այդª հա-ախակիհանդիպել է նաեւ ժակետանց կաթնամթերք:
Անդրադառնալով ակցիաներով վաճառվող ապրանքների արժեքներին` Մ. Հակոբյանն ընդգծեց, որ ի տարբերություն այլ երկրների, որտեղ տվյալ ապրանքատեսակը  ակցիայի ժամանակ վաճառվում է ինքնարժեքով, Հայաստանում պատկերն այլ է` ապրանքատեսակը վաճառվում է ինքնարժեքից բարձր:

ԶՎԱՐԹ ԽԱՉԱՏՐՅԱՆ