ՙՈՒՈՐԼԻՔԸ ՊՐՈՎԱԿԱՑԻԱ ԱՐԵՑ՚

ՙՈՒՈՐԼԻՔԸ ՊՐՈՎԱԿԱՑԻԱ ԱՐԵՑ՚

Ինչպես հայտնի է, մայիսի 18-ին Քաշաթաղի շրջկենտրոն Բերձորում Արցախում գործող մի շարք երիտասարդական կազմակերպությունների անդամներ` որպես բողոքի նոտա, փակել էին շրջկենտրոն ժամանած ԵԱՀԿ համանախագահների մեքենաների շարասյան ճանապարհը եւ պահանջել, որպեսզի համանախագահները իջնեն մեքենայից: Արցախի երիտասարդական կառույցների ներկայացուցիչներին վրդովեցրել էր Ջեյմս Ուորլիքի հայտարարությունը, որի մեջ նշված էին ԼՂ հակամարտության կարգավորման վեց հիմնական սկզբունքները:
Տեղի ունեցածի ու Ուորլիքի հայտարարությանը մասին մեզ հետ զրույցում Բերձորի բնակիչ ՏԻԳՐԱՆ ԿՅՈՒՐԵՂՅԱՆԸ այսպես ներկայացրեց իրենց դժգոհությունը.
- Փաստորեն, Արցախյան խնդրի խաղաղ կարգավորումը ԱՄՆ ներկայացուցիչը տեսնում է իրականացնել անիրագործելի ծրագրով: Նրա ասելով` պետք է թուրքին վերադարձվեն ազատագրված մեր հայրենիքի այն հատվածները, որոնք իրենց կողմից համարվում են ՙգրավյալ՚: ՙՄադրիդյան սկզբունքները՚ մեզ համար մերժելի են, մենք չենք պատրաստվում մեր տարածքները զիջել, այդ տարածքը մեր հայրենիքն է եւ զիջման ենթակա չէ: Ըստ իս` Ուորլիքը պրովոկացիա արեցª հասկանալու համար, թե ինչ հանրային տրամադրություններ կան, ու ինքը բուռն հակազդեցությունը ստացավ: Եթե իրենք այս ամենից հետո որոշակի հետեւություններ չանեն, կարծում եմ, սխալ կլինի իրենց կողմից: Իրենք պետք է հասկանան, որ այս տարածքում ապրում են մարդիկ, այս տարածքը տերեր ունի, եւ այն երբեւէ զիջման ենթակա չէ: Հայությունը պետք է հստակ մեսիջ ուղարկի աշխարհին, որ այս տարածքի հետ կապված որեւէ գործողություն չի հանդուրժի: Մենք թքած ունենք, թե մեզ կարգավիճակ կտան. մենք չենք պատրաստվում ինչ-որ կարգավիճակ ստանալ` մեր տարածքները զիջելու հաշվին:
Իսկ Քաշաթաղի բնակչուհի ԱԼԼԱ ՍԱՐԳՍՅԱՆՆ անդրադառնալով Ուորլիքի այցի նպատակին` ասաց.
- Ուորլիքը փորձում էր ներկայանալ որպես մարդ, որն ուզում է խաղաղ ճանապարհով կարգավորել ղարաբաղյան հիմնախնդրի հարցը: Իսկ մենք գիտենք, որ այս հիմնախնդիրը ձգձգվելու է, եւ այն լուծելն Ուորլիքի ուժերից վեր է: Նրա քաղաքական հայտարարությունները` վեց կետով, մեզ ծանոթ են, եւ մենք դա չենք ընդունում` ո°չ ճանապարհային քարտեզը, ո°չ փախստականների վերաբնակեցումը, ո°չ խաղաղ բանակցությունները: Նրանք հասկացան, որ մենք տեղյակ ենք ամեն ինչին, եւ նրանց նպատակը Քաշաթաղում չհաջողվեց իրականացնել: Ուորլիքի միակ նպատակն այն էր, որպեսզի ցուցադրի, թե միջազգային կազմակերպությունները որքան շահագրգիռ են ղարաբաղյան հարցի խաղաղ կարգավորմանը:

ԻԼՈՆԱ ԱԶԱՐՅԱՆ