ԵՂԵԳՆԱՁՈՐԻ ՄԻԱԿ ԱՎԱԳ ԴՊՐՈՑԻ ՇՐՋԱՆԱՎԱՐՏՆԵՐԸ ՄՏԱՆ ԿՅԱՆՔԻ ՄԻ ՆՈՐ ՓՈՒԼ

ԵՂԵԳՆԱՁՈՐԻ ՄԻԱԿ ԱՎԱԳ ԴՊՐՈՑԻ ՇՐՋԱՆԱՎԱՐՏՆԵՐԸ ՄՏԱՆ ԿՅԱՆՔԻ ՄԻ ՆՈՐ ՓՈՒԼ

Ավարտվեց հերթական ուսումնական տարին: «ՎԵՐՋԻՆ ԶԱՆԳ»-ին նվիրված միջոցառումն այս տարի հանրապետության դպրոցներում հնչեց այսօր` ՄԱՅԻՍԻ 23-ին: Ի դեպ, կան կրթօջախներ, որտեղ «Վերջին զանգ»-ին փոխարինելու է եկել «ՎԵՐՋԻՆ ԴԱՍ»-ը:

ԵՂԵԳՆԱՁՈՐԻ ԱՎԱԳ ԴՊՐՈՑՈՒՄ կնշվի թե՛ մեկը, թե՛ մյուսը: Առիթ ունենալով վերջին դասի օրը լինելու այդ դպրոցում՝ զրուցեցինք ավարտական դասարանների դասղեկների հետ, որսացինք շրջանավարտների տոնական տրամադրությունը՝ համեմված փուչիկներով, միմյանց ուղղված ջերմագին շնորհավորական բացիկներով, տոնական քաղցրավենիքներով ու ավարտական հուշալբոմներով:

Վերջին դասը, իսկապես, տոնական էր դարձրել դպրոցին…

Եղեգնաձորի ավագ դպրոցում այս տարի աշակերտական նստարաններին հրաժեշտ կտան 69 աշակերտ՝ 27 տղա, 42 աղջիկ:  Նրանցիցի 63-ը հայտ են ներկայացրել միասնական քննություններին մասնակցելու համար՝ բարձրագույն ուսումնական հաստատությունում ուսումը շարունակելու նպատակով:

Զրուցելով ավարտական երեք դասարանների՝ 10.1 (հումանիտար հոսք), 10.2 (բնագիտամաթեմատիկական հոսք), 10.3 (ֆիզիկամաթեմատիկական հոսք) դասղեկներ ԱՆՆԱ ՎԱՐԴԱՆԱՅԱՆԻ (անգլերենի ուսուցչուհի),  ՆԱՐԻՆԵ ՀԱՐՈՒԹՅՈՒՆՅԱՆԻ (մաթեմատիկայի ուսուցչուհի),  ԳԱԼԻՆԱ ԲԱԼՈՅԱՆԻ (ռուսաց լեզվի ուսուցչուհի) հետ՝ տեղեկացանք, որ ավարտական դասարանների աշակերտների հիմնական մասն ունեն գերազանց առաջադիմություն, ինչին նպաստում են նաև իրենց նախընտրությամբ կազմված հոսքերը, որտեղ հիմնականում ուսուցանվում են այն առարկաները, որոնք աշակերտներին անհրաժեշտ են նաև ընդունելության քննությունների ժամանակ:

«Իսկ եթե կազմված հոսքերում աշակերտների թիվը մի փոքր էլ քիչ լիներ, կարող էինք նույնիսկ առանց լրացուցիչ պարապմունքների ունենալ կատարյալ արդյունք և պատրաստել մրցունակ դիմորդների», - ասաց Ա.ՎԱՐԴԱՆՅԱՆԸ:

Ն. ՀԱՐՈՒԹՅՈՒՆՅԱՆ էլ փաստեց, որ դասարանում ունեն այնպիսի աշակերտներ, ովքեր առանց լրացուցիչ պարապմունքերի, ավելի բարձր  միավորներ կստանան, քան պարապող աշակերտները. «Առհասարակ խելացի աշակերտներ շատ ունենք, անգամ օլիմպիադաներում մեր դպրոցը պատմություն առարկայից ունի հանրապետական փուլ հասած աշակերտ, իսկ քիմիա առակայից՝ հաղթող»:

Իսկ Գ. ԲԱԼՈՅԱՆԸ, զուգահեռներ տանելով քաղաքի դպրոցների և իրենց դպրոցի միջև, ասաց, որ «Վերջին զանգ»-ի սցենարի համար հատուկ մարդկանց չեն դիմել, և երեք դասղեկները՝ աշակերտների օգնությամբ, պատարստել են միջոցառման ողջ սցենար-ասելիքը:

ԷԹԵՐԻ ՄԱՄՈՒԼՅԱՆ