Այգեպարի դպրոցի տնօրեն. «ՈՒՇԱԴԻՐ ՆԱՅԵ՛Ք, ԾԻԾԱՂ ՉԿԱ ՄԱՐԴԿԱՆՑ ԵՐԵՍԻՆ» (Տեսանյութ)

Այգեպարի դպրոցի տնօրեն. «ՈՒՇԱԴԻՐ ՆԱՅԵ՛Ք, ԾԻԾԱՂ ՉԿԱ ՄԱՐԴԿԱՆՑ ԵՐԵՍԻՆ» (Տեսանյութ)

Տավուշի մարզի սահմանամերձ Այգեպարի միջնակարգ դպրոցում, որտեղ 51 աշակերտ կա, հաճախ է խաթարվում դասապրոցեսը, քանի որ մեր թշնամին իր ձեռագիրը տարիներ անց էլ չի փոխել` շարունակելով կրակոցներ տեղալ անզեն գյուղացու, անմեղ երեխայի ու անօգնական տարեցի ուղղությամբ: Այն, ինչ հաճախ գրում են մամուլում կամ պատմում են ականատեսները, երբեմն անիրական է թվում, բայց այս անգամ սեփական մաշկի վրա զգացինք այն, ինչը 20 տարուց ավել լուռ տանում է Այգեպարի սահմանապահ բնակչությունը: Օրերս Վեհափառ հայրապետի օրհնությամբ եւ Մայր Աթոռի Հայեցակարգային հարցերի գրասենյակի տնօրեն Տ. Բագրատ եպիսկոպոս Գալստանյանի առաջնորդությամբ 140 ուխտավոր ու լրագրող, այդ թվում նաեւ «Իրավունքը», հնարավորություն ունեցան լինել Տավուշի սահմանամերձ գյուղերում, ապրել սահմանապահ դարձած գյուղացու վտանգաշատ կենցաղով ու սեփական ականջներով լսել այդքան մոտ սուլացող կրակոցների ձայնը: Մինչդեռ հենց այդտեղ ապրում ու սովորում են բազում աշակերտներ…

Դպրոցի խնդիրների եւ Այգեպարի վաղվա սերնդի մասին էլ «Իրավունքը» զրուցեց Այգեպարի միջնակարգ դպրոցի տնօրեն ՎԱՍԻԼԻ ԱԴԱՄՅԱՆԻ հետ.

- Դպրոցում բավականին ծան վիճակ է: Երկու դասարան դասավանդվում են միասին ու ուսուցիչները մեկ դրույքով են վճարվում: Բայց, չէ՞ որ  անջատված պետք է դասավանդել, որպեսզի ուսուցման որակ ապահովենք: Ինչպե՞ս կարելի է երկու դասարան նստեցնել մեկ սենյակում ու 45 րոպեի կեսը մի դասարանին դասավանդել, մյուս կեսը` մյուսին: Նման կերպ ուսուցման որակ կապահովի՞, ոչ մի դեպքում չի ապահովի:

- Իսկ ո՞րն է հարցի լուծումը:

- Սահմանամերձ դպրոցին պետք է արտոնություն տրվի, ուսուցիչը պետք է հավելյալ աշխատավարձ ստանա: Մինչդեռ շատ չնչին աշխատավարձ են ստանում: Մարդ չի մնացել, գյուղը տեղափոխվում է, իսկ արտագաղթը սկսել է շատանալ այս վերջին 4-5 ամսում:

- Իսկ արտագաղթը հակառակորդի կրակոցներո՞վ է պայմանավորված:

- Ոչ միայն կրակոցներով: Բացի կրակոցներից աշխատանք չկա, գյուղացին հող չունի, ինչո՞վ պիտի ապրի, դրա համար էլ ստիպված տեղափոխվում է:

- Ըստ Ձեզ, այսօր Այգեպարի միջնակարգ դպրոցում սովորող աշակերտները պատրա՞ստ են մնալ գյուղում:

- Մենք պետք է մի բան հասկանանք. ե՞րբ է մարդ իր բնակավայրում մնում, երբ իրեն հաճելի է այդտեղ մնալը, չէ՞: Այդ լավը լինելու համար պետք է լավ ընտանիք եւ սիրելի մասնագիտություն: Ո՞ւր է մասնագիտությամբ աշխատող մարդ, աշխատանք չկա, ուրեմն` մասնագիտություն էլ չկա: 1991 թվականից այս կողմ Այգեպարը պատերազմական իրավիճակի մեջ է:

- Դպրոցը ուսուցչական կադրերով ապահովվա՞ծ է:

- Առայժմ` այո, բայց արդեն երիտասարդ մասնագետներ չկան:

- Այգեպարցու հոգեբանական վիճակն ինչպե՞ս կգնահատեք:

- Նյութական վիճակն էլ է ժողովրդի շատ ծանր: Ուշադիր նայե՛ք, ծիծաղ չկա մարդկանց երեսին:

Ահա եւ մի տեսանյութ, որտեղ հերթական կրակոցներից խաղաղ բնակչության առօրյա անդորրը մի վայրկյանում հօդս է ցնդում.

Նյութը եւ տեսանյութը` ՀՐԱՆՏ ՍԱՐԱՖՅԱՆԻ