ՙՄԻՆԻՄԱԼ ՌԻՍԿԱՅԻՆ ԵՎ ՄԱՔՍԻՄԱԼ ԱՐԴՅՈՒՆԱՎԵՏ՚

ՙՄԻՆԻՄԱԼ ՌԻՍԿԱՅԻՆ ԵՎ ՄԱՔՍԻՄԱԼ ԱՐԴՅՈՒՆԱՎԵՏ՚

ՙԿառավարության նոր ծրագիրը կլինի մինիմալ ռիսկային եւ մաքսիմալ արդյունավետ՚,- անդրադառնալով կառավարության ներկայացրած ծրագրի նախագծին` մեզ հետ զրույցում ասաց ԱԺ Տնտեսական հանձնաժողովի նախագահ ՎԱՐԴԱՆ ԱՅՎԱԶՅԱՆԸ:
-Երկու կարեւորագույն հիմնական դրույթ առանձնացնեմ: Առաջինը Հայաստանի Հանրապետության գործունեության ծրագրում քաղաքացու նկատմամբ առանձնահատուկ վերաբերմունքն է: Այսինքն` կառավարության բոլոր նպատակները, բոլոր գործողությունները միտված են, որ ՀՀ քաղաքացին իրեն ապահով ու բարեկեցիկ զգա իր երկրում: Երկրորդ դրույթն այն է, որ այդ բոլոր գործողությունները միտված են քաղաքացիների պաշտպանվածությունն իրականացնելու համար: Կառավարությունը կիրառում է հետեւյալ մեխանիզմները` հավասար մրցակցային դաշտի ապահովում, ստվերայնության կրճատում: Առաջին անգամ հստակ նշվում է, որ կառավարության առաջնային խնդիրը ՀՀ քաղաքացին է, մնացած բոլոր գործառույթները միտված են քաղաքացու բարեկեցության ապահովմանը:
Կառավարության ծրագրին մեր խնդրանքով անդրադարձան նաեւ որոշ նախարարներ: Արդարադատության նորանշանակ նախարար ՀՈՎՀԱՆՆԵՍ ՄԱՆՈՒԿՅԱՆԸ մեր հարցին` ինչո±վ էր տարբերվում նախորդ կառավարության ծրագիրը, ասաց.
- Նախորդը շատ ավելի ընդհանուր ձեւակերպումներով էր գրված, դեկլարատիվ մասը մի քիչ ավելի շատ  էր: Կոնկրետ մեր նախարարության հետ կապված` շատ ողջունելի է, որ պետք է ստեղծվի պրոբացիոն ծառայությունը: Դա այն ծառայությունն է Քրեակատարողական համակարգում, որը զբաղվում է ազատազրկման հետ չկապված պատիժներով: Օրինակ` այն զարգացած երկրներում, որտեղ կա վերոնշյալ ծառայության փորձը, մոտավորապես մեկ քառորդ, երեք քառորդ հարաբերակցություն կա: Այսինքն` մեկ քառորդը անցնում է պրոբացիոն ծառայության վերահսկողության ներքո: Պրոբացիոն ծառայության ներդրումը կբեռնաթափի գաղութները, եւ պետական միջոցների մեծ խնայողություն կլինի:
Բնապահպանության նախարար ԱՐԱՄԱՅԻՍ ԳՐԻԳՈՐՅԱՆՆ էլ այսպես ներկայացրեց իր տեսակետը.
- Կառավարության ծրագիրը շատ թափանցիկ եւ իրատեսական է: Համոզված եմ, որ մենք հաջողություն կունենանք ծրագիրն իրականացնելու հարցում: Միանշանակ այն կիրականացնենք եւ որոշակի հաջողություն կարձանագրենք: Մենք մեր վերահսկողական ծառայություններով կկարողանանք լիարժեք պատկեր ունենալ ամբողջ ոլորտի հետ կապված, որպեսզի հստակ կարողանանք ներկայացնել մեր խնդիրների հաջորդաբար լուծումները:
Գյուղատնտեսության նախարար ՍԵՐԳՈ ԿԱՐԱՊԵՏՅԱՆԸ եւս դրական գնահատեց կառավարության ծրագիրը` մասնավորապես նշելով.
- Կառավարության ծրագրում` բոլոր ոլորտների հետ կապված, զարգացման դրական միտումներն ակնհայտ են: Հատկապես մեր ոլորտում շատ ընդարձակ, նպատակային, իրատեսական, գյուղացիական տնտեսություններին օժանդակության ծրագրեր են ներկայացված: Կառավարության ծրագրում լուրջ ուշադրություն է դարձվում սահմանամերձ եւ հեռավոր գյուղերին: Այսինքն` համեմատած նախորդ կաավարության ծրագրին, այս ծրագրում ավելի շատ են դրական միտումները:

ԻԼՈՆԱ ԱԶԱՐՅԱՆ