ՙՙԵՐԵԽԱՆ՚ ԱՄՈՒՍՆԱՆԱԼ ԷՐ ՈՒԶՈՒՄ, ԻՍԿ ԴԱՏԱԽԱԶԸª ԽՈՍՏՈՎԱՆՈՒԹՅՈՒՆ

ՙԵՐԵԽԱՆ՚ ԱՄՈՒՍՆԱՆԱԼ ԷՐ ՈՒԶՈՒՄ,
ԻՍԿ ԴԱՏԱԽԱԶԸª ԽՈՍՏՈՎԱՆՈՒԹՅՈՒՆ

Քննչական մարմիններն իրենց կարող են ՙշլանգի՚ տեղ դնել, սակայն բացառապես այն սահմաններում, որոնք կթույլատրի դատարանը:
Անմեղության կանխավարկածը հերքող ցավալի այս փաստը հերթական անգամ հաստատվել էր Արագածոտնի մարզի դատարանումª Սուրեն Գրիգորյանի քրեական գործը քննելիս...

ԼԵՌՆԵՐԻ ՕՐԵՆՔՈՎ ԵՎ...
ՙՕՊԵԼՈՎ՚

Ով կարող է հերքել, որ սիրահարված պատանու խնդրանքով աղջնակին փախցնողը չի ղեկավարվում շահադիտական նկատառումներով: Չհամարձակվեք, քանի որ Արագածոտնի մարզի ոստիկաններն ու դատախազները դրանում համոզված էին. Սուրեն Հակոբի Գրիգորյանին առաջադրվել էր հենց այդպիսի մեղադրանք, այն բանի համար, որ նա...
Սուրեն Գրիգորյանը չափահաս է, 32 տարեկան: Սակայն, ըստ դատաբժշկական եզրակացության, կարելի է ենթադրել, որ նա հեշտությամբ կարող է հայտնվել անչափահասների բացասական ազդեցության տակ: Այդպես էլ եղել էր. նա օգնել էր սիրահարված անչափահաս պատանուն` փախցնել նրա անչափահաս ընտրյալին:
2013թ. մարտի 15-ին Սուրենին զանգահարել էր նրա հարեւանի տղայի ընկերը եւ խնդրել էր պայմանավորված ժամին լինել Շենավան գյուղումª Երեւան մարդ տեղափոխելու համար:
Պայմանավորված ժամին Սուրենն իր ՙՕպելով՚ պայմանավորված վայրում էր: Երեք պատանի նստել էին ավտոմեքենան եւ շարժվել էին գյուղամեջ...
Ոստիկանությունում որպես վկա հարցաքննված Սուրենը իր ցուցմունքում գրել էր. ՙՃանապարհին երիտասարդներից մեկը խնդրել էր` մեքենան կանգնեցնեմ մի աղջկա մոտ: Տղաներից  մեկը իջել էր մեքենայից եւ մոտեցել այդ աղջկան, իսկ հետեւի նստատեղին նստած երիտասարդներից մեկը դուրս էր եկել եւ բաց պահել հետեւի աջ դուռը: Նրանք այդ աղջկան ստիպողաբար նստեցրել էին մեքենայի մեջ եւ ծածկել դուռը: Փողոցում գտնվող մարդիկ հարձակվել էին մեքենայիս վրա, եւ նրանցից մեկը ձեռքի հարվածով կոտրել էր դիմապակին: Ես վախեցել էի եւ շարունակել էի վարել մեքենան գյուղից դուրս...՚:
Հասկանալով, թե ինչ էր կատարվել, Սուրենը ասել էր երիտասարդներին, որ նրանք զանգահարեն իրենց ծնողներին, որպեսզի ինքը խոսի նրանց հետ: Երիտասարդներից մեկը  զանգահարել էր իր քեռուն եւ ասել, որ աղջիկ է փախցրել: Հետո քեռու հետ խոսել էր Սուրենը, որից հետո ցանկացել էր շրջադարձ կատարել եւ վերադառնալ գյուղ, սակայն այդ պահին մեքենան կանգնեցրել են ճանապարհային ոստիկանները:

ՉԷՐ ՍԻՐԵԼ, ՍԻՐԵԼ ԷՐ, ՀԵՏՈ ԷԼԻ ՉԷՐ ՍԻՐԵԼ

Հանցափորձից փոքր-ինչ տուժած աղջնակը քննիչներին եւ դատարանին պատմել էր, որ իր համադասարանցի Ջոնիկը շուրջ 2 տարի անտարբեր չի եղել իր նկատմամբ: Սկզբում աղջնակը նրա նկատմամբ անտարբեր էր եղել, սակայն հետո իր մեջ էլ էին զգացմունքներ արթնացել եւ շուրջ 7 ամիս ընկերություն են արել: Հետո չի ցանկացել նրա հետ ընկերություն անել եւ մերժել է նրան: ՙՋոնիկը երկու-երեք անգամ ինձ ասել էր, որ փախցնելու է՚: Աղջիկը սիրահարված տղայի ասածները լուրջ չէր ընդունել:
Առեւանգման փաստը ակնհայտ էր, բայց եւ սպասելի: Տուժողը ՙբացահայտել՚ էր նաեւ մեկ այլ հետաքրքիր փաստ. ՙԴպրոցի ճանապարհին ես հանդիպել էի Ջոնիկի ընկերոջը, եւ մենք երկուսով շարունակել ենք ճանապարհը: Մոտ 5 րոպե անց իմ բջջային հեռախոսին զանգ էր եկել անծանոթ մի համարից. ընկերուհիս ինձ ասեց, որ չգնամ դպրոց, գնամ տուն, որ ինձ ցանկանում են առեւանգել՚:
Աղջիկը փորձել էր հետեւել ընկերուհու խորհրդին, սակայն չէր հասցրել. նրա մոտ արդեն կանգնել էր ՙՕպելը՚...

ԴԱՏԱԽԱԶԸ ԿՐԿԻՆ ԴԺԳՈՀ Է

Սուրեն Գրիգորյանը իսկապես խիստ վախեցած էր: Մանավանդ այն բանից հետո, երբ քննիչներն իրենից խոստովանական ցուցմունքներ էին կորզել, երբ նա վկա էր ու օգտագործել էին այդ ցուցմունքները նրա դեմª ներգրավելով Սուրենին արդեն որպես մեղադրյալ: Սուրենը դիմել էր փախուստի...
Երեք պատանիներին դատել էին ավելի վաղ, առանց Սուրենի: Դատարանը նրանց նկատմամբ նշանակել էր պայմանական պատիժ: Դատախազությունը բողոքարկել էր այդ դատավճիռըª պահանջելով ՙիրական՚ պատիժ: Վերադաս դատարանը հավանաբար այլ պատկերացումներն ուներ սիրո ու ընկերության վերաբերյալ եւ նույնպես չցանկացավ, որպեսզի այդ արժեքների մասին պատանիները խորհեն բանտախցում:
Առաջին ատյանի դատարանը Սուրենին նույնպես դատապարտեց պայմանական ազատազրկման: Դատախազությունը այս գործով էլ ներկայացրել է վերաքննիչ բողոք:
Կարծում եմ` վերադաս դատարանը այս գործով ասելիք իսկապես ունի: Դատիր ինքդ, սիրելի ու արդարամիտ ընթերցող.
Որպես մեղադրյալª Սուրեն Գրիգորյանը օգտվել էր սահմանադրական իր իրավունքից եւ հրաժարվել էր ցուցմունք տալ: Քննչական մարմինը եւ դատախազությունը գնահատել էին դա հետեւյալ կերպ. ՙՆախաքննական մարմինը Սուրեն Հակոբի Գրիգորյանի նման դիրքորոշումը համարել է սուբյեկտիվ, դիտել է որպես ինքնապաշտպանական բնույթ կրող, քրեական պատասխանատվությունից խուսափելու նպատակ հետապնդող, իրավական հիմքերից զուրկ եւ ոչ արժանահավատ՚:
Ի±նչն էր ՙանարժանահավատ՚ համարվել այն պաշտոնյաների կողմից, որոնք բառիս բուն իմաստով տնօրինում եմ մարդկանց ճակատագրերը: Այն, որ մեկ անգամ ոստիկանին հավատալուց հետո Սուրենը քաղել էր համապատասխան դասը եւ օգտվելով իր իրավունքից` հրաժարվել էր ցուցմունք տա±լ:
Կարծում եմ, որ ՀՀ վերաքննիչ քրեական դատարանը պետք է լրացնի առաջին ատյանի դատարանի բացը եւ տեղեկացնի ոստիկանապետին ու գլխավոր դատախազին` իրենց աշխատակիցների ՙհամոզմունքների՚ մասին:
Ինչ վերաբերում է Սուրենի պատժին, ապա ես մարդասիրական չեմ համարում բանտախուց նետել մի մարդու, որի առողջական վիճակի վերաբերյալ բժիշկները տվել են հետեւյալ եզրակացությունը. ՙՓորձաքննվողը մանկական տարիքից գտնվել է մանկական հոգեբույժների հսկողության տակ, ներկայումս էլ հաշվառված է հոգեբուժական կաբինետում ՙՇիզոտիպային խանգարում՚ ախտորոշմամբ՚: Վերը նշված հիվանդության առկայության եւ փսիխոտրավմատիկ իրավիճակի ներգործության պայմաններում Սուրեն Հակոբի Գրիգորյանը չէր կարող լիարժեք կերպով հաշիվ տալ իր գործողությունների նշանակությանը եւ ղեկավարել դրանք:
Մյուս կողմից էլ հարց է նաեւ, թե ՙշիզոտիպային խանգարում՚ հիվանդությամբ տառապողն ինչպես է մեքենա վարում...

Ա. ԱԲԳԱՐՅԱՆ