ՙՙՀՀԿ-Ի ՀԵՏ ՀԱՄԱԳՈՐԾԱԿՑՈՒԹՅԱՆ ՀԻՄՔԵՐ ՉԵՄ ՏԵՍՆՈՒՄ՚

ՙՀՀԿ-Ի ՀԵՏ ՀԱՄԱԳՈՐԾԱԿՑՈՒԹՅԱՆ ՀԻՄՔԵՐ ՉԵՄ ՏԵՍՆՈՒՄ՚

Շաբաթ օրը ՙՎերնիսաժի՚ մոտ կրակոցների մեջ կասկածվող Գոռ Առաքելյանը` ԱԺ ԲՀԿ-ական պատգամավոր Կարո Կարապետյանի փեսան, ձերբակալվել է, փաստի առթիվ հարուցվել է քրեական գործ: Նշենք, որ հիշյալ պատգամավորի համար սա առաջին դեպքը չէ, որ վերջինիս անունը հայտնվում է ինչ-ինչ սկանդալների կենտրոնում: Նկատենք, որ այս կուսակցությունում նմանատիպ դեպքերը` կուսակցության անդամների եւ իրենց հարազատների հետ կապված, քիչ չեն: 4-րդ գումարման ԱԺ պատգամավոր Աշոտ Տոնոյանը մինչեւ հիմա պատասխան չի տվել այն քաղաքացիներին, ովքեր գումարներ են վճարել բնակարան ձեռք բերելու համար, սակայն մինչ օրս այդ հույսով են ապրում: Իսկ վերջին շրջանում նմանատիպ անկարգություններով աչքի ընկավ կրկին ԲՀԿ-ական Մելիք Մանուկյանը կամ նույն ինքը` Շշի Մելոն: Թե արդյոք կուսակցությունը որեւէ կարգապահական տուժ-տուգանք կամ պատիժ սահմանում է` նման դեպքերի հետ կապված, ովքեր ուղղակիորեն խաղում են կուսակցության վարկանիշի հետ, հարցով դիմեցինք ԲՀԿ մամուլի պատասխանատու, ԲՀԿ խմբակցության պատգամավոր ՏԻԳՐԱՆ ՈՒՐԻԽԱՆՅԱՆԻՆ:

ՀԱՐՑՐԵՔ ԻՐԱՎԱՊԱՀՆԵՐԻՆ

-Պարոն Ուրիխանյան, բոլորս հիշում ենք Ռուբեն Հայրապետյանի շուրջ ծավալված աղմկահարույց գործը, որի հետ կապված` ՀՀ նախագահը նրան հորդորեց, որպեսզի մանդատը վայր դնի: Ի±նչ է անում նման պարագայում ԲՀԿ-ն:
- Նախ կներկայացնեմ կուսակցության պաշտոնական տեսակետը. կուսակցությունը մտածում է, ինչպես որ դուք ասացիք, ճիշտ այնպես ինչպես մտածում է ձեր թերթի, խմբագրության ներկայացուցչի հետ կապված սկանդալի պարագայում: Այսինքն, եթե խախտվել է օրենք ՀՀ-ում, ապա պետք է նա պատժվի այդ օրենքին համապատասխան: Զարմանալի է, որ առաջացել է հարց` ինչպիսի±ն պետք է լիներ մեր դիրքորոշումը: Ձեր կարծիքով` ո±ւմ պետք է արվեր դիտողություն, պատգամավորի բարեկամի±ն:
- Ոչ իհարկե, անցյալ տարի նույն պատգամավորը կրկին նման իրավիճակներում էր հայտնվել...
- Թույլ տվեք ձեր հարցին պատասխանելով` ասել, որ վերը նշված դեպքի առթիվ առնչություն փնտրել կուսակցության հետ` անտեղի է: Կուսակցության հետ այդ անձնավորությունը որեւէ առնչություն չունի: Սակայն պետք է ասեմ, որ ով ուզում է լինի, եթե գործողություններում առկա է հանցագործությունը, ապա պետք է պատժվի օրենքի ողջ խստությամբ: Իսկ տվյալ դեպքի առթիվ գոյություն ունեն իրավապահ մարմիններ, որոնք ստանում են մեր, ձեր եւ այլ քաղաքացիների կողմից ձեւավորվող պետական բյուջեից աշխատավարձ, որը պարտավոր է բացահայտել իրողությունը, փաստի առթիվ հարուցված քրեական գործը իրականացնել հավուր պատշաճի, անաչառ, անկողմնակալ եւ ներկայացնել հանրությանը տեղի ունեցածը` մեղավորներով հանդերձ: Այդ պահից սկսած ես կտամ ձեզ պաշտոնական մեկնաբանություններ:

ՙ...ՏԻԳՐԱՆ ՍԱՐԳՍՅԱՆԻ ԱՆՁԸ` ՈՐՊԵՍ ԿԵՆՍԱԲԱՆԱԿԱՆ
ՕՐԳԱՆԻԶՄ...՚

-Անցնենք ներքաղաքական հարցերին: Նախորդ շաբաթ ԲՀԿ առաջնորդը հեռուստաեթերով հայտնեց իր կարծիքը` ստեղծված ներքաղաքական իրավիճակի մասին` ասելով, որ շարունակվելու է քառյակի հետ համագործակցությունը, իսկ գալիք ընտրություններին ԲՀԿ-ն անպայման կունենա իր մասնակցությունը: Կարելի± է ասել, որ քառյակը բլոկ կկազմի եւ եկող խորհրդարանական ընտրություններին հանդես կգա բլոկով:
- Ես պատասխանս կառուցում եմ` Ձեր լրագրողական հնարամտությունը բավարարելու եւ ձեր նյութին բովանդակություն տալու նպատակով: Հետաքրքիր հարց եք տալիս: Դուք անշուշտ գիտեք, որ քառյակը ձեւավորվել է հանրային պատվերի կերպով, հանրային պահանջի արդյունքում: Այնպես չէ, որ քառյակի գործունեությունը ստեղծվել է այսրոպեական կամ կարճաժամկետ նպատակները բավարարելու համար, եւ այնպես չէ, որ արհեստածին են: Այն, ինչու չէ, նաեւ ստեղծվել է կառավարման համակարգը առավել արդյունավետ դարձնելու համար:
Ինչ վերաբերում է կոնկրետ գործողություններին, եւ եթե ես լիազորված լինեմ ԲՀԿ-ի մասով տեղեկատվություն տարածելու, ապա ձեզ կասեմ: Քառյակի գործունեությունը նպատակ ունի ժողովրդին հուզող  հարցերը բարձրացնել, դրանց լուծում տալ եւ այլն: Բայց քառյակում առկա կուսակցություններն ունեն իրենց գաղափարախոսությունները, իր մոտեցումներն ու նկատառումները, որոնք համադրվելով` ծնվում է միասնական անելիք: Ժամանակը ցույց կտա:
- Այդ քառյակի մեջ կարծես չեք տեսնում ՕԵԿ խմբակցությանը: Կդառնա± քառյակը հնգյակ, հնարավո±ր է ԲՀԿ առաջնորդը քառյակ ասելիս` մոռացել է ՕԵԿ-ին:
- Ես ընդամենը քառյակի մաս կազմող ԲՀԿ 36 պատգամավորներից մեկն եմ եւ որպես խոսնակ լիազորված եմ ինձ հանձնարարվածը տեղեկացնել: Տվյալ հարցադրումով, դուք ինձ տալիս եք չափազանց լիազորություններ, ինչն էլ չի համապատասխանում իրականությունը:
- Ձեր առաջին տպավորությունը ինչպիսի±ն է` կառավարության նոր ծրագրի հետ կապված:
- Ես սիրով կկիսվեի Ձեզ հետ, բայց քանի որ սահմանափակված են պաշտոնական լիազորություններս, դրա համար թույլ տվեք այդ մասին խոսեմ խմբակցության պաշտոնական դիրքորոշումից հետո:
- Պարոն Ուրիխանյան, ԲՀԿ-ի հիմնական հակասությունները ՀՀԿ-ի հետ կարծես պայմանավորված էր նախկին վարչապետի անձով եւ նրա վարած քաղաքականությամբ: Հիմա փոխվել է թե° մեկը, թե° մյուսը: Չե±ք կարծում, որ այդ համախոհ ուժը կարող եք տեսնել հենց ՀՀԿ-ի հետ ավելի սերտ համագործակցելու, միգուցե նաեւ կոալիցիա կազմելու մեջ:
- Նախ` պետք է ասեմ, որ մշտապես հնչել է մի պարզ միտք: Ոչ Տիգրան Սարգսյանի անձը` որպես կենսաբանական օրգանիզմ, ոչ էլ որեւէ այլ պաշտոնատար անձի հարց մեզանում չի քննարկվել, այլ միայն նրանց կողմից իրականացված գործողությունները, այդ  գործունեության ազդեցությունը երկրի ու ժողովրդի վրա: Այսինքն` ով էլ զբաղեցրել է այս կամ այն պաշտոնը, իսկ մենք խոսել ենք  մի ողջ կաբինետի, այլ ոչ միայն վարչապետի մասին, պետք է իրականացնեն այն ամենը, ինչը ժողովուրդը ակնկալում է իրենցից, եւ այդ իրականացնելուց է կախված մեր որոշումը: Եվ պատասխանելով ձեր վերը նշած հարցին, որն իմ անձնական տեսակետն է, պետք է ասեմ, որ` ոչ, չեմ տեսնում ՀՀԿ-ի հետ համագործակցության հնարավորություն:
- Դուք հարցազրույցներից մեկի ժամանակ ասել եք, որ չեք բացառում, որ նախկին վարչապետին քրեական պատասխանատվության կարող եք ենթարկել: Ո±ր դրույթներով եք պատրաստվում այն իրականացնել:
- Առհասարակ, ես այդպես եմ կարծում, որ ոչ ոքի պարագայում չի բացառվում քրեական պատասխանատվության ենթարկվելը, այդ թվում ես եւ դուք: Իսկ Տիգրան Սարգսյանի դեպքում կային բազում մտահոգությունների տեղիքներ, եւ մինչ օրս չեն հնչել պատասխաններ` օֆշորի հետ կապված, անարդյունավետ մսխված միլիոնավոր դոլարների հետ կապված, չարաշահումների եւ տապալված քաղաքականության հետ կապված:
- Կուտակային կենսաթոշակային համակարգում դրական տեղաշարժ նկատվեց, ՙԴեմ եմ՚ շարժման նախաձեռնության անդամները կարծես հանդարտվել են, սակայն ԲՀԿ-ն ձեռնպահ քվեարկեց, ինչո±ւ:
- Դուք` որպես պետական մտածելակերպ ունեցող անձնավորություն, պետք է քաջ գիտակցեք, որ պետական բյուջեից, այս սուղ պայմաններում տասնյակ միլիոններ փոխանցել արտասահմանյան հիմնադրամներին` զուտ պարտավորությունները պահպանելու համար, խրախուսելի լինել չի կարող, եւ չէինք կարող քվեարկել դրա օգտին: Դուք եւս, կարծում եմ, կիսում եք այն տեսակետը, որ մարդկանց ապօրինաբար սեփական քրտինքով վաստակած գումարների համար ստիպել դիմում գրելը եւս, մեղմ ասած, ճիշտ չէր: Բայց  դեմ քվեարկելով` մենք կփաստեինք, որ այդ փոքրիկ տեղաշարժին դեմ ենք դուրս գալիս, դրա համար էլ ձեռնպահ մնալն ու չմասնակցելն էր:

ԱՐՄԵՆՈՒՀԻ ՀԱԿՈԲՅԱՆ