ՆՈՐ ԳՐՔԻ ՀԱՄԱՁԱՅՆ՝ ՄԵՐԻԼԻՆ ՄՈՆՐՈՅԻ ՍՊԱՆՈՒԹՅՈՒՆԸ ՊԱՏՎԻՐԵԼ Է ԲՈԲԻ ՔԵՆԵԴԻՆ

ՆՈՐ ԳՐՔԻ ՀԱՄԱՁԱՅՆ՝ ՄԵՐԻԼԻՆ ՄՈՆՐՈՅԻ ՍՊԱՆՈՒԹՅՈՒՆԸ ՊԱՏՎԻՐԵԼ Է ԲՈԲԻ ՔԵՆԵԴԻՆ

20-րդ դարի գլխավոր սեքս խորհրդանիշներից մեկի՝ դերասանուհի ՄԵՐԻԼԻՆ ՄՈՆՐՈՅԻ առեղծվածային մահը, որը ըստ պաշտոնական վարկածի ինքնասպանություն է, առայսօր շարունակում է տարատեսակ դավադրական տեսությունների տեղիք տալ: Ինչպես նշում է Al Arabiya-ն, հետաքննչական 2 լրագրող ՋԵՅ ՄԱՐԳՈԼԻՍՆ ու ՌԻՉԱՐԴ ԲԱՍՔԻՆԸ, ովքեր իրենց համարում են «մոնրոյագետ», գիրք են գրել այս թեմայով, որում պնդում են, թե ՄՈՆՐՈՅԻՆ իրականում սպանել են, իսկ պատվիրատուն ԱՄՆ-ի նախագահ ՋՈՆ ՔԵՆԵԴՈՒ կրտսեր եղբայր ԲՈԲԻ ՔԵՆԵԴԻՆ է եղել: Հեղինակների խոսքերով, ԲՈԲԻՆ «լռեցրել է» դերասանուհուն, քանի որ վերջինը պատրաստվում էր ՔԵՆԵԴԻ ընտանիքի մասին որոշ կարևոր գաղտնիքներ բացահայտել, որոնց մասին գրել էր իր օրագրում:

Հեղինակները նշում են, որ նախագահից բացի ՄՈՆՐՈՆ սիրային կապի մեջ է եղել նաև նրա կրտսեր եղբոր հետ: Սակայն գիտակցելով, որ ԲՈԲԻՆ իրեն լուրջ չի վերաբերվում ու չի պատրաստվում լքել կնոջը՝ ՄՈՆՐՈՆ սպառնացել է մամուլի ասուլիս հրավիրել ու բացահայտել ՔԵՆԵԴԻ ընտանիքի՝ իրեն հայտնի բոլոր գաղտնիքները: Սա, անշուշտ, կվնասեր ՔԵՆԵԴԻՆԵՐԻ իշխանությանը, ուստի ԲՈԲԻՆ որոշել է քայլեր ձեռնարկել՝ տհաճ բացահայտումներից խուսափելու համար: Նշվում է, որ ԲՈԲԻՆ իր թիկնապահների, ինչպես նաև դերասանուհու հոգեբան ՌԱԼՖ ԳՐԻՆՍՈՆԻ հետ եկել են ՄՈՆՐՈՅԻ տուն՝ պահանջելով կնոջ օրագիրը: Մերժում ստանալուց հետո՝ ԲՈԲԻՆ հրամայել է թիկնապահներին ու հոգեբանին թմրանյութի մահացու չափաբաժին ներարկել դերասանուհուն, ինչն էլ ճակատագրական է եղել կնոջ համար:

ՆՈՒՆԵ ՉՈԲԱՆՅԱՆ