Ներքին Կարմիրաղբյուրի գյուղապետ. «ԱՎԵԼԻ ԼԱՎ Է ԿԱՆԳՆԱԾ ՄԵՌՆԵՆՔ, ՔԱՆ ԱՊԱՍՏԱՐԱՆՆԵՐՈՒՄ 100 ՏԱՐԻ ԱՊՐԵՆՔ»

Ներքին Կարմիրաղբյուրի գյուղապետ. «ԱՎԵԼԻ ԼԱՎ Է ԿԱՆԳՆԱԾ ՄԵՌՆԵՆՔ, ՔԱՆ ԱՊԱՍՏԱՐԱՆՆԵՐՈՒՄ 100 ՏԱՐԻ ԱՊՐԵՆՔ»

Մոտ 1160 բնակիչ ունեցող Ներքին Կարմիրաղբյուր համայնքի բնականոն առօրյան հաճախ է խախտվում հակառակորդի արձակած կրակոցներից: Պատերազմի տարիներին 90 տոկոսով գյուղը քանդվել է եւ 20 տարի անց միայն Ներքին Կարմիրաղբյուրը, կարծես, վերակենդանանում է: Սահմանամերձ գյուղի նորաբաց համայնքային կենտրոնում օրերս տեղի ունեցավ հեղինակ կատարողների համերգ, որին մասնակցեցին Դավիթ Ամալյանը, Կարեն Մամիկոնյանը, Շիբոյան եղբայրները: Կայացած միջոցառումից հետո Ներքին Կարմիրաղբյուր եկած լրագրողների հետ զրույցում գյուղապետ ՄԱՆՎԵԼ ԿԱՄԵՆԴԱՏՅԱՆԸ նշեց.

-1999 թվականից ես գյուղապետ եմ աշխատում եւ գիտեմ, որ այսքան տարի ներքինկարմիրաղբյուրցիները զրկված են եղել մշակութային կյանքից: Եթե անկեղծ լինեմ, սա վերջին քսան տարվա մեջ մեր գյուղում առաջին համերգն է: Ճիշտ է, երբեք ո՛չ դպրոցի դռներն է փակվել, ո՛չ գյուղի մանկապարտեզը, բայց, համենայն դեպս, գյուղի բնակչությունը հաշված ուրախ օրեր են ունեցել: Արդեն ունենք համայնքային կենտրոն , դահլիճ եւ ինչպես ասում են` վերածնունդ է ապրում գյուղը:

- Բայց այդ վերածննդին զուգահեռ շարունակվում են նաեւ հրադադարի ռեժիմի խախտմամբ թշնամու կրակոցները…

- Ինձ հաճախ զանգահարում են լրագրողներ ու հարցնում. «Որ կրակում են` վախենո՞ւմ եք »: Ես կոնկրետ այդ հարցից նեղվում եմ կամ էլ հարցնում են. «Որ կրակեցին, ի՞նչ արեցիք»: Պատասխանում եմ, որ ես բժիշկ չեմ: Զարմանում են, թե ինչ է ասում գյուղապետը: Բայց չէ՞ որ կրակոցներից միայն շինությունները չեն վնասվում, մարդիկ շաքարով հիվանդ են դառնում  ու այլ հիվանդություններ  ստանում: Ինչպե՞ս կարել է կրակոցների տակ 20 տարի ապրող մարդուն հարցնել`անհանգի՞ստ եք: Իհարկե անհանգիստ ենք, ավելի լավ է կանգնած մեռնենք, քան ապաստարաններում 100 տարի ապրենք:

- Որպես համայնքապետ` նոր կառավարությունից ի՞նչ պահանջներ ունեք:

- Մեր կառավարությունը մեր ժողովրդի, մեր գյուղի միասնությունն է: Ես հինգ անգամ վերընտրվել եմ ու այս ժողովրդի կյանքով եմ ապրել: Մենք որեւէ մեկից չենք բողոքում, եւ եթե բոլորս էլ այդպես մտածենք, պրոբլեմներ չեն լինի:

- Այդ դեպքում գյուղն ինչի՞ կարիք ունի:

- Առաջին հերթին խաղաղության…

- Իսկ վերջին մի քանի տարվա ընթացքում գյուղում արտագաղթի ի՞նչ ցուցանիշ է արձանագրվել:

- Մեզ մոտից արտագաղթ չի եղել: Անգամ արտագնա աշխատանքի շատ քչերն են գնում, որովհետու իրենց երեխաներին չեն կարող կրակոցների տակ թողնել ու գնալ արտագնա աշխատանքի:

- Ծնելությունն այսօր նվազե՞լ է, թե՞…

- Մեզ  մոտ պատերազմի տարիներին ծնելիությունն ավելի շատ էր, քան պատերազմից հետո:

ՀՐԱՆՏ ՍԱՐԱՖՅԱՆ

Հ.Գ.- Նշենք, որ Վեհափառ Հայրապետի օրհնությամբ եւ Մայր Աթոռ Սուրբ Էջմիածնի Հայեցակարգային հարցերի գրասենյակի տնօրեն Տ. ԲԱԳՐԱՏ եպիսկոպոս ԳԱԼՍՏԱՆՅԱՆԻ առաջնորդությամբ օրերս Տավուշի մարզի սահմանամերձ գյուղեր էին այցելել 140 ուխտավոր ու լրագրող: