Մամուլի տեսություն. «ՀԱՅԱՍՏԱՆԻ ԷԼԵԿՏՐԱԿԱՆ ՑԱՆՑԵՐ» ԸՆԿԵՐՈՒԹՅՈՒՆԸ ՏՈՒԳԱՆՎԵՑ

Մամուլի տեսություն. «ՀԱՅԱՍՏԱՆԻ ԷԼԵԿՏՐԱԿԱՆ ՑԱՆՑԵՐ» ԸՆԿԵՐՈՒԹՅՈՒՆԸ ՏՈՒԳԱՆՎԵՑ

http://www.armworld.am/detail.php?paperid=4829&pageid=148543&lang=

Տնտեսական մրցակցության պաշտպանության պետական (ՏՄՊՊ) հանձնաժողովն իր երեկվա նիստում որոշում կայացրեց մենաշնորհային դիրքի չարաշահման համար «Հայաստանի էլեկտրական ցանցեր» (ՀԷՑ) ընկերությանը 20 մլն դրամ տուգանելու վերաբերյալ:
Ինչպես տեղեկացրեց վերոնշյալ խնդրով զեկուցողը` ՏՄՊՊ հանձնաժողովի վերլուծության վարչության մասնագետ ԴԱՎԻԹ ՓԻՆԱՉՅԱՆԸ, հանձնաժողովը Երեւանի Ծիծեռնակաբերդի խճուղու 1/3 շենքի բնակիչներից ստացել է դիմում: Բնակիչները դրանով բողոքել են, որ թեեւ իրենց շենքը դեռ 4 տարի առաջ ամբողջությամբ կառուցված ու հանձնված է շահագործման, սակայն շենքում չկա էլեկտրաէներգիա, իսկ ՀԷՑ-ը հրաժարվում է էներգամատակարարումից: 
Բնակիչները միաժամանակ հայտնել են, որ էլեկտրաէներգիա չունենալու պատճառով չեն կարողանում բնակություն հաստատել սեփական բնակարաններում:
- Բնակիչները մասնավորապես նշել են, որ սահմանված կարգին համապատասխան դիմում են ներկայացրել «Հայաստանի էլեկտրական ցանցեր»-ին` էլեկտրաէներգիայի մատակարարման պայմանագիր կնքելու վերաբերյալ, որին ՀԷՑ-ը պատասխանել է` նշելով, որ շենքը կառուցող «Միլլար» ՍՊԸ-ի եւ ՀԷՑ ՓԲԸ-ի միջեւ կնքված է եղել էլեկտրաէներգիայի մատակարարման պայմանագիր, սակայն վերջինս չի կատարել պայմանագրով սահմանված իր պարտավորությունը, այսինքն` պայմանագրով նախատեսված գումարը չի վճարել, եւ հետեւաբար ՀԷՑ-ը բնակիչներին չի կարող էլեկտրաէներգիա մատակարարել,- իր զեկույցում ասաց ՏՄՊՊ հանձնաժողովի վերլուծության վարչության մասնագետ Դավիթ Փինաչյանը:
Ավելին. ՀԷՑ-ը բնակիչներին առաջարկել է վճարել 138.000-ական դրամ, որպեսզի բնակիչներին մատակարարի էլեկտրաէներգիա, սակայն բնակիչների ճնշող մեծամասնությունը չի արձագանքել այդ առաջարկին` համարելով այն ոչ իրավաչափ:
Քանի որ էլեկտրաէներգիայի առկայությունը կենսական նշանակություն ունի բնակիչների համար, նրանք էլ էլեկտրաէներգիա ստանալու այլընտրանք չունեն (էներգամատակարարման ոլորտում միակ ընկերությունը ՀԷՑ-ն է), հայտնվել են անելանելի իրավիճակում ու դիմել հանձնաժողովին, որպեսզի վերջինս միջամտի խնդրի լուծման նպատակով:
ՏՄՊՊ հանձնաժողովը, ուսումնասիրելով խնդիրը, հանգել է այն հետեւության, որ նշված ընկերությունն իրավասու չէ կամայական սկզբունքներով որոշելու բնակիչներին էլեկտրաէներգիա տրամադրելու կամ չտրամադրելու հարցը: ՀԷՑ-ը ՏՄՊՊ հանձնաժողովի պահանջով ներկայացնելով պարզաբանումներ խնդրի վերաբերյալ, նշել է, որ իրենք պայմանագիր կարող են կնքել ոչ թե բնակիչների, այլ շենքը կառուցած «Միլլար» ՍՊԸ-ի հետ: ՀԷՑ-ի տեղեկացմամբ, նշված ընկերության եւ իր միջեւ արդեն իսկ կնքված պայմանագիր կա, սակայն «Միլլար» ՍՊԸ-ի կողմից որոշակի պարտավորությունների չկատարման պատճառով գործն ավարտին չի հասցվել:
- Խնդիրն այն է, որ նորակառույց շենքը մի քանի տարի առաջ շահագործման է հանձնվել, եւ կոմունալ-կենցաղային ծառայություններ մատուցող բոլոր ընկերությունները, այդ թվում` «Հայաստանի էլեկտրական ցանցեր» ընկերությունը, ավարտական ակտեր են ստորագրել այն բանի վերաբերյալ, որ կոմունալ-կենցաղային բոլոր ծառայությունները տվյալ շենքում ապահովված են,- ասաց ՏՄՊՊ հանձնաժողովի նախագահ ԱՐՏԱԿ ՇԱԲՈՅԱՆԸ:

- Այդ ավարտական ակտի հիման վրա բնակիչներին տրվել են սեփականության վկայականներ: Բնակիչները, ձեռք բերելով սեփականության վկայականները, գնելով այդ բնակարանները, հետագայում պարզել են, որ բնակարանները զրկված են էլեկտրամատակարարումից:
Ինչպես հայտարարվեց հիշյալ հանձնաժողովի նիստում, ՀԷՑ-ի գործողությունները եւ պահանջն անօրինական են: Իրոք, եթե «Միլլար» ՍՊԸ-ն չկատարված ֆինանսական պարտավորություն ուներ ՀԷՑ-ի հանդեպ, ապա վերջինս ինչո՞ւ է ստորագրել ավարտական ակտը, թե իբր տվյալ շենքում էլեկտրամատակարարման համակարգը պատրաստ է շահագործման:
Ստացված գրավոր տեղեկատվության, ինչպես նաեւ կողմերի հետ կազմակերպված քննարկումների եւ լսումների արդյունքում հանձնաժողովը հանգել է այն եզրակացության, որ ՀԷՑ-ի գործողությունները չեն բխում օրենքից: Եթե անգամ շենքը կառուցած ընկերությունը թերացել է որոշակի պարտականությունների կատարման մեջ, դա որեւէ առնչություն չունի բնակարանների սեփականատերերի հետ: Նման բան որեւէ իրավական ակտով ամրագրված չէ:
Ի դեպ, ՀԷՑ-ն առաջին անգամը չէ, որ հայտնվում է ՏՄՊՊ հանձնաժողովի տեսադաշտում: Նախորդ իրավախախտումների ժամանակ ընկերության հանդեպ դարձյալ հարուցվել են վարչական վարույթներ, սակայն տրվել է խիստ նախազգուշացում` միաժամանակ տեղեկացնելով, որ իրավախախտման կրկնակիության դեպքում հանձնաժողովը, օրենքի համաձայն, կցուցաբերի առավել խիստ մոտեցում:
ՏՄՊՊ հանձնաժողովի երեկվա որոշմամբ ՀԷՑ-ը ոչ միայն տուգանվեց, այլեւ պարտավորեցվեց 7-օրյա ժամկետում բնակիչների հետ կնքել էներգամատակարարման պայմանագիր:

Հայոց Աշխարհ