ԱՐԹՈՒՐ ԱԲՐԱՀԱՄ. ՙՄԵԶ ՇՏԻԳԼԻՑԻ ԿԱՐԾԻՔԸ ՉԻ ՀԵՏԱՔՐՔՐՈՒՄ՚

ԱՐԹՈՒՐ ԱԲՐԱՀԱՄ. ՙՄԵԶ ՇՏԻԳԼԻՑԻ ԿԱՐԾԻՔԸ ՉԻ ՀԵՏԱՔՐՔՐՈՒՄ՚

Հայ պրոֆեսիոնալ բռնցքամարտիկ WBO վարկածով եւ միջին քաշային կարգում աշխարհի չեմպիոն Արթուր Աբրահամն այս օրերին Հայաստանում է: Հիշեցնենք, որ հայ բռնցքամարտիկը մայիսի 3-ին Բեռլինի Velodrom մարզապալատում մրցավարների միաձայն որոշմամբ հաղթեց Չեռնոգորիան ներկայացնող Նիկոլա Սյեկլոչային` պաշտպանելով սուպերմիջին քաշային կարգում WBO վարկածով աշխարհի չեմպիոնի իր տիտղոսը: Սյեկլոչայի հետ մենամարտի, Ռոբերտ Շտիգլիցի եւ Սինգապուր սպասվելիք այցի մասին ՙԻրավունքի՚ հետ զրուցեց ԱՐԹՈՒՐ ԱԲՐԱՀԱՄԸ:

-Սյեկլոչայի հետ մենամարտը նույնքան դիտարժան եւ բարդ ստացվեց, որքան եւ Շտիգլիցի դեմ: Սակայն առաջինն իր կարեւորությամբ, իհարկե, գերազանցում էր… Արդեն մենամարտից հետո ի՞նչ կասեք, Ձեր ընտրած մարտավարության որ հատվածը գործեց լիարժեք եւ որտեղ այն թերացավ:

- Դե ասեմ, որ մարտավարությունս փոխել եմ. փորձում եմ տեխնիկապես հաղթել: Ամեն մի մենամարտ էլ ծանր է լինում, վերջին մրցակցիս դեպքում հատկապես, քանի որ մրցակիցս ֆիզիկապես շատ ուժեղ տղա էր: Դրա համար նրան փորձեցինք տեխնիկապես հաղթել, փորձեցինք տեխնիկայով, այսպես ասած, նրան խաբել ռինգում, միավորներ վաստակել ու հաղթել: Բայց նրա հարվածները շատ ծանր էին, պետք էր շատ զգույշ լինել:
- Տպավորություն էր, թե մենամարտի սկզբում փորձում էիք մրցակցին ուժասպառ անել եւ հետո անցնել հարձակման: Նաեւ ասացիք, որ փորձում էիք խորամանկությամբ հաղթել մրցակցին, այդ մարտավարությունը չափազանց ռիսկային չէ՞ր:
- Այնքան էլ չէի փորձում մրցակցիս ուժասպառ անել, քանի որ ես մեկ ձեռքով էի մենամարտում: Փորձում էի ուղղակի տարածության վրա պահել նրան: Մի քանի անգամ նա հարվածեց ու վերջ. թույլ չեմ տվել, որ նա շատ հարվածի:
Ինչ վերաբերում է ռիսկին, իհարկե, եթե գնում ես ՙպատերազմ՚, այնտեղ միշտ էլ վտանգ կա. ո՞նց կարող է պատահի, որ գնաս կռվի ու վտանգ չլինի... Բայց եթե ռիսկի չդիմես, կյանքում ոչ մի բանի չես հասնի: Սակայն ռինգում պետք է խելացի ռիսկի դիմել եւ փորձել ուղեղումդ եղած միտքդ իրագործել, իրականացնել:
- Այս օրերին հանգստանում եք Հայաստանում, հետո հանգիստը շարունակելու եք Սինգապուրում: Ինչո՞վ է պայմանավորված այդ երկրի ընտրությունը:
- Ուղղակի վերջերս այդ երկիրն ինձ հետաքրքրել է, ուզում եմ անպայման այնտեղ լինել, հանգստանալ: Այդ պետությունից էլ ինչ-որ բաներ՝ տեղեկություններ իմանալ: Գիտեմ, որ այնտեղ շատ մաքուր է, գեղեցիկ, նաեւ շատ լավ հյուրանոցներ կան: Ուղղակի ուզում եմ աշխարհից մի նոր բան տեսնել, մի նոր բան իմանալ: Միշտ նույն տեղում հանգստանալ չեմ սիրում, սիրում եմ մի անգամ այստեղ, մյուս անգամ այնտեղ...
- Ինչպե՞ս եք պատրաստվում կազմակերպել Ձեր հանգիստը Սինգապուրում:
- Արդեն որոշ չափով պլանավորված է, բայց ոչ ամբողջովին...
- Այս տարին հաղթական ընթացք է ունենում Ձեզ համար: Ո՞րն է տարվա Ձեր գլխավոր նպատակը:
- Նորից հաղթել մինչեւ տարեվերջ ու հաղթանակով էլ տարին ավարտել...
- Ռոբերտ Շտիգլիցի մասին ի՞նչ կասեք: Տպավորությունն այնպիսին է, որ նա Ձեզ չի ներել իրեն հաղթելու համար: Նա պարբերաբար իր հարցազրույցներում անդրադառնում է Ձեզ ու փորձում սադրանքի ենթարկել... Ձեր վերջին մենամարտի հետ կապված Շտիգլիցը նշել է, որ տպավորված չէ իր տեսածով:
- (Ծիծաղում է) Նրա կարծիքը մեզ չի հետաքրքրում, մենք նրա կարծիքը չենք ընդունում:
- Իսկ հնարավո՞ր է եւս մեկ մենամարտ անցկացնեք Շտիգլիցի դեմ:
- Այո, իհարկե կլինի, դե աշխարհի չեմպիոնից հետո կա 1-15 տեղերը, եթե նա առաջինը լինի, ես պատրաստ եմ, խնդրեմ, երբ որ կցանկանա:

ՔՐԻՍՏԻՆԵ ՊԵՏՐՈՍՅԱՆ