ՙԲԵՌԼԻՆԻ ՊԵՏԱԿԱՆ ՆՎԱԳԱԽՈՒՄԲԸ ՀԱՅ ԲԵՄՈՒՄ

ԲԵՌԼԻՆԻ ՊԵՏԱԿԱՆ ՆՎԱԳԱԽՈՒՄԲԸ ՀԱՅ  ԲԵՄՈՒՄ

Օրերս ՙԵրեւանյան հեռանկարներ՚ 15-րդ միջազգային երաժշտական փառատոնի շրջանակներում ՙԱրամ Խաչատրյան՚ համերգասրահում հանդես եկավ Բեռլինի պետական նվագախումբը գլխավոր դիրիժոր ԴԱՆԻԵԼ ԲԱՐԵՆԲՈՅՄԻ գլխավորությամբ: Գրեթե 450 տարվա ավանդույթներով Բեռլինի պետական նվագախումբը, աշխարհի հնագույն նվագախմբերից է, որը հիմնադրվել է 1570 թվականին:
Ըստ ՙԵրեւանյան հեռանկարներ՚ միջազգային երաժշտական փառատոնի հիմնադիր նախագահ ՍՏԵՓԱՆ ՌՈՍՏՈՄՅԱՆԻ` սա բացառիկ երեւույթ է. ՙՓառատոնի ընթացքում սա ամենադժվար կայացած երեւույթներից մեկն է, քանի որ ամբողջ աշխարհում  դասական երաժշտության մեջ ավելի նվիրական անուն, քան Դանիել Բարենբոյմի անունն է, անհար է գտնել: Բոլոր բառերն արդեն ասվել են, այսօր այստեղ է մի մարդ, ով ստացել է բազմաթիվ մրցանակներ` թե երաժշտական ոլորտում, թե տարբեր երկրների նախագահների կողմից շնորհված: Մեր դասական երաժշտության համար այս ամենը պատմական երեւույթ է՚:
ՙԻմ ստեղծագործական գործունեության ընթացքում հանդես եմ եկել տարբեր երկրներում, ունեմ հայ ծանոթներ եւ ընկերներ, որոնց հետ շփվում եմ: Շատ ուրախ եմ, որ այսօր գտնվում եմ մի երկրում, որն աշխարհին այդքան մեծ անհատականություններ է տվել՚,- ուրախությամբ նշեց ԴԱՆԻԵԼ ԲԱՐԵՆԲՈՅՄԸ` ընդգծելով, որ Բեռլինի պետական նվագախումբը աշխարհի երկրորդ հին նվագախումբն է, որն ունի հզոր անցյալ. ՙՍակայն անցյալը պետք է ներկա լինի, հակառակ դեպքում այն դառնում է մեխանիկական հիշողություն՚,- հավելեց Դ. Բարենբոյմը:
Մեծանուն դիրիժորը իրեն համարում է ազատ երաժիշտ եւ հավաստիացնում, որ երաժշտությունը մարդուն ստիպում է առանձին երեւույթներն ապրել միասին: Նա համախմբվածության կողմնակից է, չնայած համոզված է, որ երաժշտությունը պահանջում է անհատականություն: Մեծ երաժիշտը դժվարացավ նշել իր երազանքներից որեւէ մեկը, քանի որ դրանք շատ են:
Նշենք, որ 2000 թվականին, Բեռլինի պետական նվագախումբը նրան ընտրել է ցմահ գլխավոր դիրիժոր:

ԶՎԱՐԹ ԽԱՉԱՏՐՅԱՆ