ՙՙՙԵՐԲԵՎԷ ԻՄ ԱՇԽԱՏԱՆՔԸ ԱՆՁՆԱԿԱՆ ՆՊԱՏԱԿՆԵՐԻ ՀԱՄԱՐ ՉԵՄ ԾԱՌԱՅԵՑՐԵԼ՚

ՙԵՐԲԵՎԷ ԻՄ ԱՇԽԱՏԱՆՔԸ ԱՆՁՆԱԿԱՆ
ՆՊԱՏԱԿՆԵՐԻ ՀԱՄԱՐ ՉԵՄ ԾԱՌԱՅԵՑՐԵԼ՚

Վերջին օրերին չեն դադարում խոսակցություններն այն մասին, որ Գորիս քաղաքում` ՏԻՄ ընտրություններին ընդառաջ, լարվածություն է հասունանում: Խոսակցությունները` խոսակցություններ, իսկ թե որքանով են դրանք համապատասխանում իրականությանը, փորձեցինք շրջել Գորիս քաղաքում եւ զրուցել տեղի բնակիչների հետ: Մինչ այդ նշենք, որ Գորիսում ներկայումս քաղաքապետի պաշտոնի համար պայքարում են չորս թեկնածուններ: ՀՀ Սյունիքի մարզի ՀՀԿ տարածքային կազմակերպությունը համայնքի ղեկավարի թեկնածու է առաջադրել եւ սատարում է ՙՀայջմուղկոյուղի՚ ՓԲԸ-ի Գորիսի տեղամասի պետ Վաչագան Ադունցին, ով, ի դեպ, վայելում է գորիսցիների հարգանքն ու մեծ թվով համակիրներ ունի: ՙՄենք եւս տարբեր լրատվամիջոցներում կարդացել ենք, իբրեւ թե, Գորիսում լարվածություն կա, բայց դրանք բացարձակապես սուտ խոսակցություններ են, մենք մեր բնականոն կյանքով ենք ապրում: Անձամբ ես ու իմ ընտանիքը մեր ձայնը տալու ենք այն թեկնածուին, ում սատարում է մեր նախկին մարզպետը, քանի որ վստահ ենք, որ պարոն Խաչատրյանը գորիսեցու վատը երբեք չի ցանկանա՚,- անդրադառնալով վերոնշյալ խոսակցություններին` մեզ հետ զրույցում ասաց գորիսեցի Հրաչ պապիկը: Իսկ երիտասարդներից Արամը շատ ոգեւորված էր ՀՀԿ թեկնածուով եւ իր ապագան կապում էր նոր քաղաքապետի գործունեության հետ:
Մենք փորձեցինք զրուցել նաեւ ՀՀԿ կուսակցության կողմից առաջադրված թեկնածու` ՎԱՉԱԳԱՆ ԱԴՈՒՆՑԻ հետ:
-Պարոն Ադունց, կներկայացնե±ք Ձեր անցած ուղին:
- Ծնվել, մեծացել եւ ապրում եմ Գորիսում: Դպրոցը ավարտել եմ գերազանցությամբ, սովորել եմ Երեւանի Գյուղատնտեսական ինստիտուտում, ավարտել եմ կարմիր դիպլոմով, ավարտելուց անմիջապես հետո տեղափոխվել եմ Գորիս եւ անցել աշխատանքի: Շուրջ 25 տարի աշխատել եմ Գորիս քաղաքի տարբեր հիմնարկ-ձեռնարկություններում:
Աշխատել սկսել եմ իմ մասնագիտությումբ` 1994 թ. ընտրվել եմ Գորիսի քաղխորհրդի սոցապահովության բաժնի պետ, այնուհետեւ միավորվելուց հետո` նշանակվել եմ շրջանային սոցապահովության կենտրոնի պետ եւ այդ պաշտոնում աշխատել եմ 1994թ. մինչեւ 2000թ.: 2007թ. ղեկավարել եմ Գորիսի ՙՀայՌուսգազարդ՚ ՓԲԸ-ն: 2007-2009թթ. հիմնադրել եւ նախագահել եմ ՙԱդոնցներ՚ ՍՊԸ-ն: 2009-ից մինչ օրս աշխատում եմ ՙՀայջրմուղկոյուղի՚ ՓԲԸ-ում` որպես Գորիսի տեղամասի պետ:
Աշխատել եմ սպասարկման տարբեր ոլորտներում` անընդհատ կապ ունեցել բնակչության հետ: Գորիսի ազգաբնակչությանը շատ լավ ճանաչում եմ: Որտեղ որ աշխատել եմ, ձգտել եմ այդ աշխատատեղից հեռանալուց` գոնե մեկ աստիճանով բարձր հեռանալ, եթե` ոչ ավելի: Եվ ամենակարեւորը` որտեղ որ աշխատել եմ` ինձ համար ամենակարեւոր արժեքը դա մարդն է եղել:
- Ինչպես ստացվեց, որ առաջադրեցիք Ձեր թեկնածությունը:
- Ես 2003թ. մեկ անգամ արդեն առաջադրվել էի, սակայն ՀՀԿ-ն այդ ժամանակ որոշել էր սատարել ներկայիս գործող քաղաքապետ Նելսոն Ոսկանյանին: Որից հետո ես այլեւս նպատակահարմար չգտա իմ ընտրարշավը շարունակել, քանի որ ես նույնպես ՀՀԿ-անդամ էի դեռեւս 1997թ.-ից: Դրան հաջորդող ՏԻՄ ընտրությունների ժամանակ Գորիսի ազգաբնակչության մեջ անընդհատ քննարկվում էր իմ անունը` որպես պոտենցիալ քաղաքապետի թեկնածուի, սակայն ինքս չեմ ցանկացել ինքնառաջադրվել: Այժմ ՀՀԿ-ն գտել է, որ լավագույն թեկնածուն ես եմ եւ առաջադրել է իմ թեկնածությունը, որին ես տվել եմ իմ համաձայնությունը: Այսինքն` ՀՀԿ-ն ոչ միայն սատարում է իմ թեկնածությունը, այլ նաեւ հենց ՀՀԿ-ն է ինձ առաջադրել: Միաժամանակ ասեմ` իմ համաձայնությունը տալուց առաջ ես հանդիպել եմ Սյունիքի մարզպետ պարոն Հակոբյանի հետ եւ ստացել եմ նաեւ իր համաձայնությունը, նա նույնպես հաստատել է ՀՀԿ-ի տեսակետը` իմ թեկնածության առաջադրման հետ կապված: Այսինքն` ես համոզվել եմ, որ Վ. Հակոբյանը նույնպես սատարում է ինձ, որից հետո ես տվել եմ իմ համաձայնությունը:
- Պարոն Ադունց, խոսում են, որ Գորիսում արդեն իսկ լարված մթնոլորտ է, ի±նչ կասեք այդ առումով:
- Կասեմ, որ Գորիսում լարված մթնոլորտ հասկացողությունը չկա` կյանքը ընթանում է իր սովորական հունով, չի եղել լարված մթնոլորտ եւ չի էլ լինելու: Հակառակը` ես կասեի, որ բոլոր թեկնածուներս տրամադրված ենք, որ ընտրություններն ընթանան բնականոն հունով, եւ ոչ մի լարվածություն թույլ չտանք: Ես անձամբ բոլոր թեկնածուների հետ շատ նորմալ հարաբերությունների մեջ եմ: Ընդհանրապես չեմ հիշում մի դեպք, որ որեւէ մեկի հետ վատ հարաբերություններ ունենամ, առավել եւս` թեկնածուների հետ: Ինչ խոսք, բնականաբար, գորիսեցիները անտարբեր չեն կարող լինել իրենց ապագայի նկատմամբ. կա հետաքրքրություն` ընտրությունների ընթացքի հետ կապված, բայց որ ասեմ լարվածություն, խնդիրներ` նման բան չկա:
- Որո±նք են լինելու Ձեր առաջիկա անելիքները` քաղաքապետ ընտրվելու դեպքում:
- Չեմ ուզում շտապել եւ քարոզարշավից առաջ ծրագրերս ներկայացնել, բայց պետք է ասեմ, որ ունեմ բավականին լուրջ ծրագրեր: Ես առհասարակ կողմ եմ փոփոխություների` թե° կյանքում եւ թե° աշխատավայրում: Ընդամենը մի փոքր կյանք ենք ապրում, եւ այն պետք է բովանդակալից ապրել: Ես միշտ ձգտել եմ լինել այնտեղ, որտեղ իմ անհրաժեշտությունը զգացել են, որտեղ էլ աշխատել եմ` իմ հետքը թողել եմ, եւ հպարտ եմ, որ ինձանից հետո կարողացել եմ տեսանելի բան թողնել: Այդ իսկ պատճառով գտնում եմ, որ ունեմ մեծ հնարավորությունների պոտենցիալ` Գորիս քաղաքում նախկինում կատարված աշխատանքներին նորը ավելացնելու: Իհարկե, դրանով հանդերձ` ակնկալելով ողջ ազգաբնակչության աջակցությունը: Ընտրվելու դեպքում` իմ աշխատասենյակի դռները բաց են լինելու բոլորի առաջ, ես աշխատելու եմ բաց` բոլորի հետ խորհրդակցելով:
Ընդհանրապես կյանքում առաջնորդվում եմ հետեւյալ նշանաբանով` ՙԵրբեք չստել՚, նույնը պատգամել եմ որդիներիս: Տղամարդուն հարիր չէ ստելը, ցանկացած պարագայում գերադասում եմ դառը ճշմարտությունը, քան քաղցր սուտը: Հաճախ ընկերներս կատակով ասում են` դու ստել չգիտես` ինչպես կարող ես նման դեպքում քաղաքականությամբ զբաղվել: Սակայն ես միշտ կարողացել եմ իմ ճշմարտախոսության արդյունքում հաղթող դուրս գալ:
- Եվ վերջում, Ձեր կոչը գորիսեցիներին:
- Ես գորիսեցիներին կոչ կանեմ, որ յուրաքանչյուր թեկնածուի ընդունեն իրենց կատարածով եւ ըստ իրենց արժանիքների, քվեարկել խղճով` իրենց համոզմունքներին հավատարիմ: Պարտադիր չէ, որ ինձ ձայն տան: Ես ցանկանում եմ, որ գորիսեցիները պայքարեն իրենց ապագայի համար: Իմ ընտրվելու դեպքում, ինչպես հիմա, այնպես էլ հետո աշխատելու եմ Գորիս քաղաքի եւ գորիսեցու բարօրության համար: Ես երբեւէ իմ աշխատանքը անձնական նպատակների համար չեմ ծառայեցրել:

ԻԼՈՆԱ ԱԶԱՐՅԱՆ