ԷԴԳԱՐ ԲԱՂԴԱՍԱՐՅԱՆ. «ԱՄԵՆԱՃԻՇՏԸ ԱՆԴԵՄ ՔԱՂԱՔԱԿԱՆ ԳՈՐԾՉԻ ԱՐՁԱՆ ԴՆԵԼՆ Է»

ԷԴԳԱՐ ԲԱՂԴԱՍԱՐՅԱՆ. «ԱՄԵՆԱՃԻՇՏԸ ԱՆԴԵՄ ՔԱՂԱՔԱԿԱՆ ԳՈՐԾՉԻ ԱՐՁԱՆ ԴՆԵԼՆ Է»

Վերջին օրերին Խորհրդային Միության քաղաքական գործիչ Անաստաս Միկոյանի արձանը տեղադրելու առաջարկը բուռն քննարկման առիթ հանդիսացավ: Կինոռեժիսոր ԷԴԳԱՐ ԲԱՂԴԱՍԱՐՅԱՆԸ կարծում է, որ քաղաքական գործիչների արձաններ տեղադրելն անիմաստ է, փոխարենը առաջարկում է դնել անդեմ արձան. «Մի լավ առաջարկ ունեմ, եթե այդ արձանը տեղադրողներն ունեն առողջ մշակութային տեսանկյուն, ինքնաիրոնյայի լավ զգացում, առաջարկում եմ` լրիվ լրջորեն, առանց կատակի, ցմահ քաղաքական գործչի արձան դնել, որը կլինի անդեմ: Աշխարհում նման բան դեռ չեն արել: Երբեւիցե դա պետք չի լինի հանել, փոխել եւ դրանով սահմանափակել` երբեւիցե քաղաքական գործիչներին չանդրադառնալ: Բոլորը թող գան, նայեն ու ասեն` ես եմ, նա է, կամ մյուսը, որովհետեւ քաղաքականությունը եւ պատմությունը այնպիսի ստոր ու կեղծ կատեգորիաներ են, որ շատ հաճախ փոխվում են` սպիտակը դառնում է սեւ, սեւը` սպիտակ: Կամ հանենք սրա արձանը, դնենք նրանը, կամ սա այսօր թշնամի է, մեկ էլ` տասը տարի հետո պարզվում է` ազգի հերոս: Դրա համար առաջարկում եմ տեղադրել մշակույթի գործիչների արձաններ, որ երբեւիցե խնդիր չունենանք հանելու: Կամ եթե դրված է` չհանենք, անգամ եթե քաղաքական գործիչ է, ես դեմ եմ դրան, որովհետեւ դա մեր պատմությունն է` լավ, թե վատ: Կամ էլ` քաղաքական գործիչների արձանները կենտրոնացնել մի տեղ, դարձնել քաղաքական գործիչների ծառուղի եւ շարել իրար կողքի` հին, նոր, իրար թշնամի եւ այդտեղով անցնելով մենք մեր երկրի պատմությունը կուսումնասիրենք, այլ ոչ թե կենտրոնացնել քաղաքի ամենալավ վայրերում: Ամենաճիշտը անդեմ քաղաքական գործչի արձան դնելն է: Բայց դրա համար պիտի խնդրենք կա՛մ Էռնեստ Նեիզվեստնիին, կա՛մ Միխայիլ Շեմյակինին` փայլուն ռուս նկարիչ, քանդակագործ, որպեսզի ինքն անի այդ քանդակը, ֆենոմենալ կլինի: Եթե Շեմյակինն արեց, ում արձանն ուզում է լինի` հանճարեղ կստացվի»:

ԼԻԼԻԹ ԵՂԻԱԶԱՐՅԱՆԸ