«ԴԵՄ» ԼԻՆԵԼԸ ԻՆՔՆԱՆՊԱՏԱԿ ՉԷ»

«ԴԵՄ» ԼԻՆԵԼԸ ԻՆՔՆԱՆՊԱՏԱԿ ՉԷ»

ԱԺ արտահերթ թեժ եւ ծանրաբեռնված նիստից հետո սպասվում է նոր կառավարության ծրագրի, ամենայն հավանականությամբ, ոչ պակաս թեժ քննարկումը: Թե ծրագրի քվեարկության ժամանակ ինչպես կվարվեն առավել սթափ ՀՅԴ-ն, խմբակցության ներսում իրենց իսկ սեփական ընդդիմություն դարձած` Հրանտ Բագրատյան ունեցող ՀԱԿ-ը, սակավաթիվ «Ժառանգությունն» ու ՕԵԿ-ը, որը ոչ վաղ անցյալում այդ ծրագրի մաս էր կազմում, ցույց կտա ժամանակը: Իսկ մինչ այդ «Իրավունքը» կառավարության նոր ծրագրի սպասվող քննարկման մասին զրուցեց ԱԺ ԲՀԿ խմբակցության պատգամավոր ՄԻՔԱՅԵԼ ՄԵԼՔՈՒՄՅԱՆԻ հետ:
- Պարոն Մելքումյան, շուտով ԱԺ-ում սպասվում է կառավարության ծրագրի քննարկումը, հաշվի առնելով «կուտակային կենսաթոշակների մասին» ՀՀ օրենքում փոփոխություն կատարելու մասին օրենքին քառյակի խիստ տարբեր քվեարկությանը, չե՞ք կարծում, որ քառյակի հակասություններն ավելի կխորանան այս հարցում:
- Ոչ, հենց այդ հարցում կարծում եմ, որ շատ հակասություններ չեն կարող լինել, եթե դու իշխանության մաս չես: Մեկ բան ակնհայտ է, որ պետք է ծրագրին «կողմ» քվեարկեն իշխանության մաս կազմող ուժերը: Ասենք, ես կողմ քվեարկեմ, որպեսզի իշխանությունն իր ծրագիրը կատարի՞, թեպետ սա իմ անձնական կարծիքն է ու դեռ խմբակցությունում քննարկումներ կլինեն: Առաջ անցնելով` ասեմ, որ մենք մեր առաջարկները տվել ենք կառավարությանը, թե ծրագիրն ինչպիսին պետք է լինի: Չեմ ուզում հարկային, ներդրումային տարբեր խնդիրների մեջ մտնել, բայց այդտեղ ծրագրի կատարման երաշխիքների մասին շատ կարեւոր բան եմ արձանագրել, որ ծրագրի անբաժանելի փաստաթուղթ պետք է լինի ծրագրի կատարման երաշխիքները: Եթե մենք ասում ենք, որ նախատեսված է վեց տոկոս աճ, բայց արդյունքում լինում է 2 կամ 3 տոկոս ի՞նչ է հետեւում դրան: Որեւէ բան չի հետեւում եւ այն թողնված է ՀՀ նախագահի կամքին: Բայց մենք ծրագրում արձանագրած ցուցանիշների չկատարման դեպքում պետք է պատասխանատվության ավտոմատ ռեժիմ մտցնենք: Կամ առանձին առանցքային նախարարների հրաժարակի ավտոմատ մեխանիզմ մշակենք, այսինքն` ծրագիրը պետք է ամրագրի, որ նախարարություններն են պատասխանատվություն կրում կամ եթե ամբողջական ծրագիրն է ձախողվել, բնականաբար, բարձրացվի կառավարության ամբողջական հրաժարականի հարցը:
- Նախնական տրմադրվածություն է երեւում, որ ԲՀԿ-ն պատրաստվում է չմասնակցել կառավարության ծրագրի քվեարկությանը: Նորմա՞լ եք համարում, որ երկրի քաղաքական թիվ երկրորդ ուժը այսպիսի կարեւորագույն հարցերում դիրքորոշում չի ունենում:
- Դուք գիտեք, որ վերջերս տեղի ունեցավ մեր կուսակցական քաղխորհրդի եւ խմբակցության համատեղ նիստը եւ բոլոր պատգամավորները ու քաղխորհրդի անդամներից շատերը իրենց կարծիքները ներկայացրեցին: Իհարկե, դա դեռ վերջնական չէ, դրանից հետո մեր կուսակցության նախագահը հավանաբար հարցազրույց կտա եւ դեռ լրացուցիչ քննարկումներ կլինեն: Բայց մենք, բնականաբար, կարծիքները լսեցինք, շոշափեցինք եւ ուզում եմ ասել, որ «ձեռնպահ» լինելն էլ քաղաքական ձեւ է: Այս առումով, փաստորեն, չեմ գտնում, որ այդ ձեւը պատեհ ձեւ չէ: Այդպիսի պրակտիկա էլ չկա աշխարհում, որ իշխանության մաս չկազմող կուսակցությունները «կողմ» քվեարկեն, չէ՞ որ մենք ծրագրի կատարման քաղաքական պատասխանատվությունը չենք կիսում: Եվ եթե չենք կիսում, այսինքն` քվեարկենք հետո ի՞նչ կլինի, հարցեր կառաջանան չէ՞: Հակառակը, ես սա նորմալ ձեւ եմ համարում: Այստեղ ուղղակի դեմ լինել-չլինելու հարցը այնքանով է, որքանով որ թող ծրագիրը գա, կտեսնենք: «Դեմ» լինելը ինքնանպատակ չէ, այսինքն` պետք է գա ծրագիրը, կտեսնենք ինչ է ասում կառավարության ղեկավարը եւ այլն, ապա նոր կորոշենք: Այնպես որ, մենք ուղղակի քաղաքական խորհրդում կարծիքները լսել ենք, բայց դեռ որոշում չենք ընդունել:

ՀՐԱՆՏ ՍԱՐԱՖՅԱՆ