ՙՙՀԱՅ ՇԱԽՄԱՏԻՍՏՆԵՐԻ ՆՈՐ ՆՎԱՃՈՒՄՆԵՐԸ

ՀԱՅ ՇԱԽՄԱՏԻՍՏՆԵՐԻ ՆՈՐ ՆՎԱՃՈՒՄՆԵՐԸ

Հայ շախմատիստներն այս օրերին մասնակցում են տարբեր մրցաշարերի` փորձելով լուրջ մրցակցություն ցուցաբերել ուժեղագույնների հետ պայքարում:
Շախմատի Հայաստանի նորընծա չեմպիոն Տիգրան Քոթանջյանը Լիբանանի մայրաքաղաք Բեյրութում անցկացվող օփենում վերջին տուրից առաջ 8 հնարավորից վաստակել է 6 միավոր: Հայ գրոսմայստերը կես միավոր է զիջում առաջատարներին` գրոսմայստերներ Կիրիլ Ստուպակին (Բելառուս), Ազեր Միրզոեւին (Ադրբեջան) եւ Սերգեյ Տիվյակովին (Հոլանդիա):
Իսկ գրոսմայստեր Վարուժան Հակոբյանը Սենթ Լուիսում անցկացվող ԱՄՆ-ի առաջնության 5-րդ տուրում սեւերով պարտության է մատնել առաջատարներից Թիմուր Գարեեւին եւ 3 միավորով բաժանում է 2-5-րդ տեղերը:
Գրոսմայստեր Կարեն Մովսիսյանը Իսպանիայի Յուկմայոր քաղաքում անցկացվող օփենում երեք տուրից հետո 3 միավորով 185 մասնակիցների մեջ գլխավորում է աղյուսակը: Նույնքան միավոր են վաստակել եւս 9 մասնակիցներ, բայց նրանք Մովսիսյանին զիջում են լրացուցիչ ցուցանիշներով: ԱՄՆ-ի կանանց առաջնությունում 4 տուրերից հետո գրոսմայստեր Տաթեւ Աբրահամյանը 2,5 միավորով ընթանում է երրորդ տեղում: Առաջատարը 3,5 միավոր հավաքած գրոսմայստեր Իրինա Կրաշն է: Միջազգային վարպետ Ռուսլան Կուրայանը (Ուկրաինա) Ֆրանսիայի Գրոսեթո-Պրունիա քաղաքում անցկացված օփենում 7 հնարավորից վաստակել է 6 միավոր եւ 120 մասնակիցների մեջ բաժանել է 1-5-րդ տեղերը: Լրացուցիչ ցուցանիշներով Կուրայանին շնորհվել է 5-րդ մրցանակը: Մրցաշարի հաղթող է դարձել գրոսմայստեր Լորան Ֆրեսինեն (Ֆրանսիա), հայտնում է Armchess-ը:
Իսկ Հայաստանի ուժեղագույն շախմատիստ Լեւոն Արոնյանը հունիսի 2-13-ը Նորվեգիայի Ստավանգեր քաղաքում կմասնակցի շախմատի Norway Chess-2014 սուպերմրցաշարին, որտեղ Արոնյանի մրցակիցները կլինեն աշխարհի չեմպիոն Մագնուս Կարլսենը, ռուսաստանցիներ Վլադիմիր Կրամնիկը, Սերգեյ Կարյակինը, Պյոտր Սվիդլերը, բուլղարացի Վեսելին Թոպալովը, իտալացի Ֆաբիանո Կարուանան, ուկրաինացի Ալեքսանդր Գրիշչուկը, հոլանդացի Անիշ Գիրին եւ նորվեգացի Սիմեն Ագդեստեյնը: Նախորդ տարի Norway Chess-ում հաղթել էր Սերգեյ Կարյակինը, Մագնուս Կարլսենը զբաղեցրել էր երկրորդ տեղը, իսկ Լեւոն Արոնյանը եզրափակել էր լավագույն հնգյակը:

ՔՐԻՍՏԻՆԵ ՊԵՏՐՈՍՅԱՆ