Շ. ԱԶՆԱՎՈՒՐԸ «ՀԱՅԱԿԻՆ» ՀԵՏԵՎԵՑ ԳՐԵԹԵ ՄԻՆՉԵՎ ՎԵՐՋ

Շ. ԱԶՆԱՎՈՒՐԸ «ՀԱՅԱԿԻՆ» ՀԵՏԵՎԵՑ ԳՐԵԹԵ ՄԻՆՉԵՎ ՎԵՐՋ

Երեկ Ալ. Սպենդիարյանի անվան օպերայի և բալետի ազգային ակադեմիական թատրոնում կայացավ «Հայակ»  ազգային կինոյի մրցանակաբաշխությանը, որի ընթացքում հայտնի դարձան երեկոյի մրցանակակիրները:

«Լավագույն խաղարկային ֆիլմ» եւ «Լավագույն ռեժիսոր» «Հայակ» մրցանակների արժանացավ  Սերժ Ավետիքյանի և ուկրաինացի Օլենա Ֆետիսովայի  «Փարաջանով»  ֆիլմը: «Լավագույն դերասանուհի» դարձավ Լուսի Աբդալյանը «Կաուչո» ֆիլմում գլխավոր դերակատարման համար: «Լավագույն դերասան» համարվեց Սերժ Ավետիքյանը`  «Փարաջանով»  ֆիլմի գլխավոր դերակատարման համար:

«Երկրորդ պլանի լավագույն դերասանուհի» «Երկրորդ պլանի լավագույն դերասան» համարվեցին Խաչիկ Չալիկյանի «Անպոչ ճգնավորը» ֆիլմի դերակատարներ Նարինե Գրիգորյանն ու Աշոտ Ադամյանը:

«Լավագույն սցենար» ճանաչվեց  Արեգ Ազատյանի և Շողիկ Թադևոսյանի  «Ռոմանտիկներ» ֆիլմը: «Լավագույն օպերատոր»` Թամմամ Համզան` Սուրեն Բաբայանի «Փուշ» ֆիլմի համար:

«Լավագույն նկարիչ»` ուկրաինացի բեմադրող նկարիչ Վլադիսլավ Ռիժիկովը` «Փարաջանով» ֆիլմի համար: «Լավագույն կարճամետրաժ ֆիլմ»` Հրանտ Վարդանյանի «Սպիտակ գառան երազը»: «Լավագույն վավերագրական ֆիլմ»` Աշոտ Սարգսյանի «Նամակ մորը» ֆիլմը:

«Լավագույն անիմացիոն ֆիլմ»` Վրեժ Քասունու «Արշալույս» ֆիլմը:

«Լավագույն դեբյուտ»` Ալեքսանդր Բաղդասարյանի  «Ճանապարհ»  ֆիլմը:  «Լավագույն արտասահմանյան ֆիլմ»` բելգիահայ պրոդյուսեր և ռեժիսոր Րաֆֆի Աղեկյանի «Կինշասա. խենթ հող» վավերագրական կինոնկարը:

Ի դեպ, գրեթե ամբողջ երեկոյի ընթացքում իր ներկայությամբ «Հայակը» պատվեց կենդանի լեգենդ Շառլ Ազնավուրը, ով  արժանացավ «Հայակի»` Ռուբեն Մամուլյանի անվան հատուկ մրցանակի` համաշխարհային կինոյում ունեցած մեծ ներդրման համար: Հատուկ մրցանակի արժանացավ եւս մեկ կենդանի լեգենդ` Տիգրան Մանսուրյանը:

Այսօր արդեն «Հայակ» ազգային կինոյի մրցանակաբաշխության հյուրերն ու ժյուրիի անդամները` Ալբերտ Մկրտչյան, Սերժ Ավետիքյան, Էդգար Բաղդասարյան, Գեւորգ Գեվորգյան, Աշոտ Համբարձումյան, Միքայել Պողոսյան եւ այլոք,  հյուրընկալվել էին «Արմենիա» գինիների գործարան շրջայցի, որտեղ տնօրինության կողմից արժանացան հյուրասիրության:

ԼԻԼԻԹ ԵՂԻԱԶԱՐՅԱՆ