ԱՐՎԵՍՏԻ ՎԵՑ ՃՅՈՒՂԵՐ ԿՄԵԿՏԵՂՎԵՆ ՙԱՐՏ ՖԵՍՏ՚-ՈՒՄ

ԱՐՎԵՍՏԻ ՎԵՑ ՃՅՈՒՂԵՐ ԿՄԵԿՏԵՂՎԵՆ ՙԱՐՏ ՖԵՍՏ՚-ՈՒՄ

Մի քանի օր շարունակ ՙԱրտ ֆեստ՚ երիտասարդական հանրապետական բաց փառատոնի շնորհիվ Հայաստանի տաղանդավոր երիտասարդները հնարավորություն կունենան հանրությանը ներկայացնել իրենց ստեղծագործությունները:

ՙԱրտ ֆեստը՚, որն իր մեջ ներառում է արվեստի 6 ճյուղ (թատերոն, կինո, գրաֆիկա, քանդակագործություն,  լուսանկարչություն, գեղանկարչություն), այս տարի կրում է ՙՄեկ տանիքի ներքո՚ խորագիրը եւ նվիրվում է ՀՀ արվեստի վաստակավոր գործիչ, ՙԱրտ ֆեստ՚ փառատոնի հիմնադիր Արմեն Մազմանյանի հիշատակին:
Փառատոնի հանդիսավոր բացումը տեղի ունեցավ մայիսի 10-ին, որն իր եզրագիծը կհատի մայիսի 22-ին: Փառատոնի տնօրեն ԷՐԻԿ ԲԱՐՍԵՂՅԱՆԻ խոսքով` նախորդ տարվա համեմատ, այս տարի ընդունվել են բազմաթիվ հայտեր. ՙԱյս տարի ունենք հայտերի աննախադեպ քանակ, սա ինձ համար որպես փառատոնի տնօրենի, շատ կարեւոր է: Նախորդ տարի ունեինք 132 հայտ, իսկ այս տարի` 155, ավելի քան 200 մասնակից: Շատ ակտիվ են մասնակցում Լոռու, Կոտայքի, Գյումրու, մարզերը, ինչպես նաեւ Երեւանի մշակութային բուհերը: Մարզերի ակտիվությունը շատ գոհացուցիչ է: Ուրախալի է այն հանգամանքը, որ նախորդ տարվա մեր փորձը ցույց է տվել, որ փառատոնին մասնակցած երիտասարդները համախմբվում են մեկ տանիքի ներքո եւ նորանոր նախագծերի ծնունդ տալիս: Այս փառատոնում սահմանափակումներ չկան, մենք հնարավորություն ենք տալիս ստեղծագործող երիտասարդներին ներկայացնել իրենց ստեղծագործությունները՚:
Խոսելով ՙԱրտ ֆեստ՚ երիտասարդական հանրապետական բաց փառատոնի կարեւորության մասին, Երեւանի թատրոնի եւ կինոյի պետական ինստիտուտի ռեկտորի (ԵԹԿՊԻ) ժամանակավոր պաշտոնակատար ԴԱՎԻԹ ՄՈՒՐԱԴՅԱՆԸ փաստեց, որ արվեստը նորանում է նոր անունների շնորհիվ, եւ այսօր այդ նոր անունների օրն է, ովքեր պետք է առաջ գան եւ հայտարարեն իրենց մասին: ՙԱյստեղ լավն այն է, որ այդ երիտասարդներն ունեն սխալվելու իրավունք: Սա այն ժամանակն է, որ արվեստագետը կարող է հետաքրքիր, տաղանդավոր ու  անսպասելի սխալվել, որը կարող է իր հետ մի նոր բան բերել: Արդեն երկրորդ տարին է` նշում ենք այս փառատոնը, հույս ունեմ կլինի նաեւ 3-րդ…, 10-րդ փառատոնը եւ կդառնա լավագույն հասցեն  երիտասարդ սերնդի համար՚:

ԶՎԱՐԹ ԽԱՉԱՏՐՅԱՆ