ԱՐՏԱԿ ԶԻԼՖԻՄՅԱՆ. «ՉՈՒՏՈՂԻ ՄԱԼԸ, ՈՒՏՈՂԻՆ ՀԱԼԱԼ Է»

ԱՐՏԱԿ ԶԻԼՖԻՄՅԱՆ. «ՉՈՒՏՈՂԻ ՄԱԼԸ, ՈՒՏՈՂԻՆ ՀԱԼԱԼ Է»

Ռեժիսոր Արտակ Զիլֆիմյանը Ռուսաստանի հետ համատեղ նոր ֆիլմ է նկարահանում: Այս մասին «Իրավունքի» հետ զրույցում ռեժիսորը նշեց, որ առաջին հայացքից կարող է թվալ, թե ֆիլմը երկրաշարժի մասին է, սակայն իրականում այն պատմում է բոլորովին այլ բանի մասին. «Այն կոնկրետ երկրաշարժի մասին չէ և այս դեպքում, խնդիրը միայն երկրաշարժը չէ: Այն պարզապես ի հայտ է բերում բաներ, որոնց մասին մենք չենք մտածում սովորական պայմաններում»: Խնդիրը, այո, միայն երկրաշարժը չէ և ֆիլմի ստեղծագործական թիմը չի փորձում պայքարել բնության դեմ: Ընդհակառակը` նրանք բնական աղետի մեջ ցույց են տալիս բնության հրաշքը` սերը. «Ֆիլմում իր ամբողջ խորությամբ դրսևորվում է սերը՝ ոչ թե կնոջ-տղամարդու միջև, այլ, իմ կարծիքով, սիրո երևույթի գագաթնակետը համարվող մայրական սիրո զգացումը, թե ինչպես է կարողանում մայրը փրկել նորածին դստերը»:

Ֆիլմի սցենարի հեղինակներն են Լուսինե Մանուկանը և Հովիկ Չարխչյանը: Չնայած նրան, որ ֆիլմը հովանավորվում է Ռուսաստանի Դաշնության կողմից, սցենարին նրանց կողմից որևէ միջամտություն չի ցուցաբերվել. «Ռուսաստանից միայն պրոդյուսերական կողմից է միջամտություն եղել: Իսկ սցենարին որևէ կերպ չեն միջամտել»,-նշում է Արտակ Զիլֆիմյանը: Ռեժիսորի խոսքերով, այս պահին Հայաստանի կողմից առաժմ ստացել են միայն աջակցություն, իսկ ֆինանսավորումը դեռեւս միայն Ռուսաստանից է, քանի որ ֆիլմը գտնվում է սկզբնական փուլում և այս պահին նախապատրաստական աշխատանքներն են ընթանում. «Գյումրեցիներն այսպիսի մի խոսք ունեն, որը մեջբերելը տեղին է. «Չուտողի մալը, ուտողին հալալ է»»,- կատակով ասաց ռեժիսորը, շարունակելով. «կցանկանայի, որ այս տեսակ ազգային քայլերի նախաձեռնությունը մեր կողմից լիներ»:

Դերասանական կազմն արդեն որոշ չափով ընտրված է. կլինեն դերասաններ և' Հայաստանից, և' Ռուսաստանից. «Ֆիլմում նկարահանվելու է Արմեն Ջիգարխանյանը: Գլխավոր կերպարը վստահվել է Ռուսաստանի հայտնի դերասան Եվգենի Սիդիխինը: Հիմա դեռ չեմ ցանկանում բարձրաձայնել դերասանների անունները: Ֆիլմը մեծամասամբ նկարահանվելու է Գյումրիում, Սպիտակում, Մոսկվայում և Երևանում: Ֆիլմը կունենա միջազգային պրեմիերա և կցուցադրվի Հայաստանում, Ռուսաստանի Դաշնությունում, Եվրոպայում, ԱՄՆ-ում և ալուր:

Հիշեցնենք, որ ֆիլմի պրոդյուսերն է Ալեքս Շախը, իսկ նկարահանումները կսկվեն միայն այս տարվա նոյեմբերի:

ՀԱՍՄԻԿ ՄԱՆՈՒԿՅԱՆ