ԲԱՑՎԵՑ ՀԱԿՈԲ ՀԱԿՈԲՅԱՆԻ «ՆԵՐՀԱՅԵՑՈՒՄ»` ՀԵՏՄԱՀՈՒ ԱՌԱՋԻՆ ՑՈՒՑԱՀԱՆԴԵՍԸ

ԲԱՑՎԵՑ ՀԱԿՈԲ ՀԱԿՈԲՅԱՆԻ «ՆԵՐՀԱՅԵՑՈՒՄ»` ՀԵՏՄԱՀՈՒ ԱՌԱՋԻՆ ՑՈՒՑԱՀԱՆԴԵՍԸ

«Ինձ համար ամենատպավորիչ և հուզիչը մարդ ներկայացնող նկարն է, միայն շատ մեծ նկարիչը կարող է մարդ նկարել, մարդու մասին պատմել, միաժամանակ պատմել նաև իր մասին»:

Հակոբ Հակոբյան

Մայիսի 10-ին Հայաստանի ազգայի պատկերասրահում բացվեց ՀՀ ժողովրդական նկարիչ Հակոբ Հակոբյանի «Ներհայեցում» խորագրով հետմահու առաջին ցուցահանդեսը, որը բաց կլինի մեկ ամիս: Այս ցուցահանդեսը ընդհանուր պատկերացում է տալիս գեղանկարչի անցած ստեղծագործական ուղղու մասին, քանի որ ցուցահանդեսում ներկայացված են նրա տարբեր տարիների ստեղծագործությունները` Եգիպտոսից մինչև ԽՍՀՄ ու անկախության շրջան:

Ցուցահանդեսում ներկայացվել են նաև այնպիսի աշխատանքներ, որոնք արվեստասեր հասարակությունը կտեսնի առաջին անգամ: Հայաստանի ազգային պատկերասրահի տնօրեն ՓԱՐԱՎՈՆ ՄԻՐԶՈՅԱՆԸ ցուցահանդեսի բացման իր խոսքում նշեց, որ Ազգային պատկերասրահում հերթական տոնն է. «Բացվում է 20-րդ դարի լավագույն նկարիչներից մեկի ` Հակոբ Հակոբյանի հետմահու առաջին ցուցահանդեսը: Նա իսկապես ժողովրդական նկարիչ է ոչ միայն իր կոչումով, այլև` արվեստով: Այն նկարչությունը, որը 60-ական թվականներին եկավ Հայաստան, մենք տեսանք որ նոր էր, նա մեր կերպարվետ բերեց մտածելակերպ, արտահայտելու ձև ,որն արժանի է մեծ գնահատականի: Հակոբ Հակոբյանը կարողացավ ասել, որ Հայկական բնաշխարհը կարելի է ուրիշ ձև` յուրովի տեսնել: Արդեն երկար տարիներ վարպետը մեզ բոլորիս իր արվեստով հիացնում է, շնորհակալ ենք նրան»:

Մեծ վարպետը 40 տարեկան էր, երբ վերադարձավ Հայրենիք, որտեղ նրա համար իսկապես պայմաններ ստեղծվեցին ներկայացնելու իր ստեծագործությունները: ՀՀ նկարիչների միության նախագահ ԿԱՐԵՆ ԱՂԱՄՅԱՆԻ խոքով` դժվար կլիներ պատկերացնել Հակոբ Հակոբյանի ստեղծագործական ուղին, եթե նա չվերադառնար Հայրենիք. «Նա հայրենադարձ էր: Ես չգիտեմ, ինչպիսի ստեղծագործական կյանք կունենար, եթե չվերդառնար Հայաստան: Համոզված չեմ, այլ վայրում նա կշարունակեր զբաղվել կերպարվեստով և այսպիսի բարձունքների կհասներ, ինչպիսին այսօր է: Հայրենիքում պայմաններ ստեղծվեցին, որպեսզի Հակոբյանը իր հայրենի հողում ստեղծի հազարավոր ստեղծագործություններ, որոնք ցուցադրվում էին ամբողջ խորհրդային միության երկրներում: Հակոբ Հակոբյանը մեծ վարպետ է, նրա անունը ընդմիշտ կմնա մեր մշակույթի պատմության մեջ»:

Գեղանկարչի մտերիմ ընկեր Շահեն Խաչատրյանը, Հակոբ Հակոբյանին բնորոշեց, որպես հայ ժողովրդին ու հայ ազգին նվիրված բացառիկ արվեստագետի և հավելեց, որ նրա ստեղծագործությունների հետմահու առաջին ցուցադրությունը ևս մեկ անգամ կբացի այն խորությունն ու անհատականությունը, որը ճանաչվեց ամբողջ աշխարհում և արժանացավ բարձր գնահատականի:

ՀՀ ժողովրդական գեղանկարիչ, պետական մրցանակի դափնեկիր Հակոբ Հակոբյանը ծնվել է Եգիպտոսում` 1923 թվականին: Սովորել է Կիպրոսի Մելգոնյան վարժարանում, այնուհետև մասնագիտական կրթությունը ստացել է Կահիրեի գեղարվեստի և Փարիզի Գրան Շոմիե ակադեմիաներում: Վարպետը իր ստեղծագործության առաջին շրջանում ստեղծել է նատյուրմորտներ, որտեղ շեշտված են տխրության ու առանձնության զգացմունքները: Օտարության մեջ ապրելու տարիներին Հակոբյանը հիմնականում նկարել է թեմատիկ նկարներ, ուր յուրահատուկ ուժով ու նրբությամբ ընդանրացրել է հայրենիքից հեռու ապրող իր հետեղեռնյան սերնդակիցների հոգեվիճակը։ 1962 թվականին գեղանկարիչը ընտանիքով հայրենադարձվել է Հայրենիք: Հ. Հակոբյանը պարգևատրվել է ՀՀ սուրբ.Մեսրոպ Մաշտոցի, հայ եկեղեցու Սահակ-սուրբ. Մեսրոպ շքանշաններով, արժանացել «Հայաստան» համահայկական հիմնադրամի մրցանակին: Անհատական ցուցահանդեսներ է ունեցել Տալլինում, Տարտուում, Ռիգայում, Լվովում, Կիևում, Թբիլիսիում, Մոսկվայում, Փարիզում և այլուր: Հակոբյանի գործերից պահվում են Երևանի, Մոսկվայի, Ռիգայի, Կահիրեի, Ալեքսանդրիայի, Բեյրութի թանգարաններում և մասնավոր հավաքածուներում:

ԶՎԱՐԹ ԽԱՉԱՏՐՅԱՆ